କରୋନା ଟିକାକରଣରେ ଇତିହାସ ରଚିବ ଭାରତ । ପ୍ରଥମ ପର୍ଯ୍ୟାୟରେ ୩କୋଟି ଲୋକଙ୍କୁ ଦିଆଯିବ ଭ୍ୟାକସିନ, ସୂଚନା ଦେଲେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ
କନକ ବ୍ୟୁରୋ : ଚିକିତ୍ସା ବିଜ୍ଞାନରେ ଏକ ବିରଳ ଇତିହାସ ରଚିବା ପାଇଁ ଆରମ୍ଭ ହୋଇଛି କସରତ୍ । ପ୍ରକୃତ ଟିକା ଦିଆଯାଉନି, ହେଲେ ଟିକାକରଣର ସବୁ ପ୍ରକ୍ରିୟା ସଂପାଦନ କରାଯାଉଛି । କରୋନା ବିରୋଧୀ ଲଢ଼େଇ ଏକ ନିର୍ଣ୍ଣାୟକ ମୋଡରେ ପହଁଚିଥିବା ବେଳେ କୋଟି କୋଟି ଲୋକଙ୍କ ଟିକାକରଣ ପାଇଁ ସାରା ଦେଶରେ ହୋଇଛି ଡ୍ରାଏ ରନ୍ ବା ପ୍ରାକ୍ ଅଭ୍ୟାସ । ବିଶାଳ ଜନସଂଖ୍ୟାର ଟିକାକରଣ ପୂର୍ବରୁ ଭାରତରେ ହୋଇଛି ଟିକା ପାଇଁ ଦୁନିଆର ସବୁଠୁ ବଡ଼ ମକଡ୍ରିଲ୍ ।
Kanak News is now on WhatsApp
Join and get latest news updates delivered to you via WhatsApp
ଦିଲ୍ଲୀର ଗୁରୁ ତେଗ୍ ବାହାଦୂର ହସପିଟାଲକୁ ଯାଇ ଡ୍ରାଏରନ୍ର ତଦାରଖ କରିବା ସହ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ହର୍ଷବର୍ଦ୍ଧନ କହିଛନ୍ତି, ସ୍ୱାସ୍ଥ୍ୟ କର୍ମୀ ଓ ଆଗଧାଡ଼ିର କରୋନା ଯୋଦ୍ଧାଙ୍କୁ ମିଶାଇ ପ୍ରାଥମିକ ପର୍ଯ୍ୟାୟରେ ୩ କୋଟି ଲୋକଙ୍କର ଟିକାକରଣ ହେବ ।
ଓଡିଶାରେ କ୍ୟାପିଟାଲ ହସ୍ପିଟାଲ ସମେତ ୩୦ଟି ଜିଲ୍ଲା ମୁଖ୍ୟ ଚିକିତ୍ସାଳୟରେ ଟିକାକରଣର ପ୍ରାକ୍ ଅଭ୍ୟାସ କରାଯାଇଛି । ସକାଳ ୧୦ଟାରୁ ୧୨ ଟା ପର୍ଯ୍ୟନ୍ତ ଡ୍ରାଏ ରନ୍ ଚାଲିଥିଲା । ଟିକା ଆସିବା ପରେ କିପରି ଟିକା ଦିଆଯିବ, ପୂରା ପ୍ରକ୍ରିୟାର ମକ୍ ଡ୍ରିଲ୍ କରାଯାଇଛି । ଟିକାକରଣ କେନ୍ଦ୍ରରେ ଜଣେ ଭ୍ୟାକ୍ସିନେଟରଙ୍କୁ ମିଶାଇ ୫ ଜଣ ଉପସ୍ଥିତ ରହିଥିବା ବେଳେ ୨୫ ଜଣ ସ୍ୱାସ୍ଥ୍ୟକର୍ମୀଙ୍କୁ ଏଥିରେ ସାମିଲ କରାଯାଇଛି ।
ଯେଉଁ ବ୍ୟବସ୍ଥା ଭିତରେ ଟିକାକରଣ ହେବ, ତା’ର ଅବିକଳ ଅଭ୍ୟାସ କରାଯାଇଥିଲା । ପ୍ରତ୍ୟେକ ଟିକାଦାନ କେନ୍ଦ୍ରରେ ଗୋଟିଏ ବିଶ୍ରାମ ଗୃହ, ଟିକାକରଣ ଗୃହ ଓ ଗୋଟିଏ ନିରୀକ୍ଷଣ ଗୃହ ରହିଥିବା ବେଳେ ଟିକା ନେବା ପରେ ଅଧଘଂଟା ପାଇଁ ନିରୀକ୍ଷଣରେ ରଖାଯିବା ବ୍ୟବସ୍ଥା ମଧ୍ୟ କରାଯାଇଥିଲା । ଡ୍ରାଏ ରନ୍ ସମୟରେ କୋଭିଡର ସମସ୍ତ ନିୟମ ପାଳନ କରାଯାଇଛି ।
ପ୍ରଥମ ପର୍ଯ୍ୟାୟରେ ରାଜ୍ୟରେ ସ୍ୱାସ୍ଥ୍ୟକର୍ମୀଙ୍କ ସମେତ ଅଙ୍ଗନବାଡି କର୍ମୀ ଆଦି କରୋନା ଟିକା ନେବେ । ଟିକାକରଣ ପାଇଁ ୩ ଲକ୍ଷ ୭୦ ହଜାର ଲୋକଙ୍କ ନାଁ ତାଲିକାଭୁକ୍ତ ହୋଇଛନ୍ତି । ଟିକା ନେବା ପାଇଁ ସେମାନେ ପ୍ରସ୍ତୁତ ହୋଇ ରହିଛନ୍ତି ବୋଲି କହିଛନ୍ତି କିଛି ସ୍ୱାସ୍ଥ୍ୟ କର୍ମୀ ।
ସିରମ୍ ଇନଷ୍ଟିଚ୍ୟୁଟ୍ ନିର୍ମାଣ କରୁଥିବା କରୋନା ଟିକା କୋଭିସିଲ୍ଡର ଜରୁରୀକାଳୀନ ବ୍ୟବହାର ପାଇଁ ବିଶେଷଜ୍ଞ ପ୍ୟାନେଲ ସୁପାରିସ୍ କରିବା ଓ ଟିକାକରଣ ପାଇଁ ବିଶ୍ୱର ସବୁଠୁ ବଡ଼ ମକ୍ ଡ୍ରିଲ୍ ହେବା ପରେ ଏବେ ଅପେକ୍ଷା ଡ୍ରଗ୍ସ କଂଟ୍ରୋଲର ଜେନେରାଲ ଅଫ୍ ଇଣ୍ଡିଆର ସବୁଜ ସଂକେତକୁ ।