ପାକିସ୍ତାନର ଅସଲି ଚିତ୍ର ବଖାଣିଲେ ପିଟିଆଇର ପୂର୍ବତନ ବିଧାୟକ ବଳଦେବ କୁମାର ସିଂହ । କହିଲେ, ମୁସଲିମ ବି ପାକିସ୍ତାନରେ ନୁହନ୍ତି ସୁରକ୍ଷିତ
କନକ ବ୍ୟୁରୋ : ପାକିସ୍ତାନର ମୁଖା ଖୋଲିଲେ ଇମ୍ରାନ ସରକାରଙ୍କ ନେତା । ପାକ୍ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ପାର୍ଟି ତେହରିକ-ଏ-ଇନସାଫ୍ ବା ପିଟିଆଇରୁ ପୂର୍ବରୁ ବିଧାୟକ ରହିଥିବା ବଳଦେବ କୁମାର ସିଂହ ଏବେ ପାକିସ୍ତାନ ଛାଡି ଭାରତ ଚାଲିଆସିଛନ୍ତି । ଭାରତ ଆସିବା ପରେ ବଳଦେବ ସେଠାକାର କାହାଣୀ ବଖାଣିଛନ୍ତି । ପାକିସ୍ତାନରେ କିଭଳି ଅତ୍ୟାଚାର ହେଉଛି ସେନେଇ ସେ ପୁରା କାହାଣୀ କହିଛନ୍ତିି । ଏହାସହ ସେ କହିଛନ୍ତି ଯେ ସେ ସେଠାରେ ସୁରକ୍ଷିତ ନଥିଲେ । କେବଳ ସେ ନୁହଁନ୍ତି ସେଠାରେ ସମସ୍ତ ହିନ୍ଦୁ ଓ ଶିଖମାନଙ୍କ ପ୍ରତି ବିପଦ ରହିଛି । ତାଙ୍କ ଉପରେ ଅତ୍ୟାଚାର ବଢିଚାଲିବା କାରଣରୁ ସେ ଭାରତକୁ ଆସିଲେ । ଇମ୍ରାନଖାନ ତାଙ୍କର କୌଣସି ପ୍ରତିଶ୍ରୁତି ପାଳନ କରିନଥିବା ସେ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏସବୁକୁ ନେଇ ବଳଦେବ, ମୋଦି ସରକାରଙ୍କ ଦୃଷ୍ଟ ଆକର୍ଷଣ କରିବା ସହ ତାଙ୍କୁ ଏଦିଗରେ ଦୃଷ୍ଟି ଦେବାକୁ ଗୁହାରି କରିଛନ୍ତି । ମୋଦି ତାଙ୍କୁ ଶରଣ ଦିଅନ୍ତୁ ବୋଲି କହିବା ସହ ସେଠାରେ ଥିବା ସମସ୍ତ ହିନ୍ଦୁ ଓ ଶିଖମାନଙ୍କ କଥା ବୁଝନ୍ତୁ ବୋଲି ସେ ଆବେଦନ କରିଛନ୍ତି । ବଳଦେବ କୁମାର ସିଂହ ପାକିସ୍ତାନର ଖୈବର ପଖତୁନଖ୍ୱା ପ୍ରାନ୍ତର ବାରିକୋଟ ଆସନରୁ ବିଧାୟକ ରହିଥିଲେ । ବର୍ତମାନ ସପରିବାର ସହ ଜୀବନ ବଂଚାଇ ଭାରତ ଫେରି ଆସିଛନ୍ତି ।