ସୁନା ଋଣ ସଂସ୍ଥାରୁ ଲୁଟକୁ ନେଇ ବଢୁଛି ସନ୍ଦେହ । ୪ ବର୍ଷ ତଳେ ସମାନ ଢଙ୍ଗରେ ରାଉରକେଲା ଆଇଆଇଏଫଏଲରୁ ଚୋରି ହୋଇଥିଲା ୨ କୋଟି ଟଙ୍କା
କନକ ବ୍ୟୁରୋ : କଟକ ସ୍ଥିତ ଇଣ୍ଡିଆ ଇନଫୋ ଲାଇନ ଫାଇନାନ୍ସ ଲିମିଟେଡ୍ ବା ଆଇଆଇଏଫଏଲ ଋଣ ସଂସ୍ଥାରୁ ଯେଭଳି ଲୁଟ ହୋଇଛି , ଗତ ୪ ବର୍ଷ ତଳେ ଠିକ ଏହି ଢଙ୍ଗରେ ରାଉରକେଲାର ଆଇଆଇଏଫଏଲ ଶାଖାରୁ ଚୋରି ହୋଇଥିଲା । ଲୁଟ ହୋଇଥିବା ସୁନା ମୂଲ୍ୟ ସେତେବେଳେ ୨ କୋଟି ଟଙ୍କା ହେବ ବୋଲି ସଂସ୍ଥା ପକ୍ଷରୁ କୁହାଯାଇଥିଲା । ସବୁଠୁ ବଡ କଥା ହେଉଛି ଏହି ଲୁଟ ବେଳେ ମଧ୍ୟ ସାଇରନ ବାଜିନଥିଲା , ସିସିଟିଭି ବି ଅଚଳ ଥିଲା ଓ ଆଶ୍ଚର୍ଯ୍ୟର କଥା ହେଉଛି କୌଣସି ସୁରକ୍ଷା କର୍ମୀ ମଧ୍ୟ ନଥିଲେ । ଆଉ ଦୀର୍ଘ ୪ ବର୍ଷ ବିତି ଯାଇଥିଲେ ମଧ୍ୟ କିଏ ଲୁଟ କଲା ଏପର୍ଯ୍ୟନ୍ତ ଧରିପାରିନି ପୋଲିସ୍ । ଏବଂ ସେ ଫାଇଲ ବୋଧ ହୁଏ ବନ୍ଦ ହୋଇ ଗଲାଣି ।
Kanak News is now on WhatsApp
Join and get latest news updates delivered to you via WhatsApp
ନଭେମ୍ବର ୨୦୨୦ ଠିକ ସମାନ ଢ଼ଙ୍ଗରେ କଟକର ଜନଗହଳି ପୂର୍ଣ୍ଣ ନୟାସଡକ ଅଂଚଳରେ ଥିବା ଆଇଆଇଏଫଏଲରୁ ସକାଳ ୯ଟା ୪୫ରେ କୁଆଡେ ୪୨ କିଲୋ ସୁନା ଚୋରି ହୋଇଗଲା । ଏଠି ବି ରାଉରକେଲା ଷ୍ଟାଇଲ ଥିଲା । ସିସିଟିଭି ଅଚଳ ଥିଲା, ଲୁଟ ବେଳେ ସାଇରନ ବି ବାଜି ନଥିଲା । ୪ବର୍ଷ ତଳେ ରାଉରକେଲାରେ ଯେମିତି ନିର୍ଦ୍ଧାରିତ ସମୟର କିଛି ସମୟର ପୂର୍ବରୁ ସଂସ୍ଥା ଖୋଲିଥିଲା ଏବେ କଟକରେ ବି ସେମିତି କିଛି ସମୟ ପୂର୍ବରୁ ଅଫିସ ଖୋଲିଥିଲା ।
ରାଉରକେଲା ଓ କଟକର ଆଇଆଇଏଫଏଲ ସଂସ୍ଥାରୁ ଆଶ୍ଚର୍ଯ୍ୟ ଜନକ ଭାବେ ସମାନ ଢ଼ଙ୍ଗରେ ଲୁଟ ଘଟଣା କମିଶନରେଟ ପୋଲିସକୁ ଆଶ୍ଚର୍ଯ୍ୟ କରି ଦେଇଛି । ପୋଲିସ ସଂସ୍ଥାର ଅଧିକାଂଶ କର୍ମଚାରୀଙ୍କୁ ଡାକି ପଚରାଉଚରା କରିଛି । ଆଉ ଏବେ ପୋଲିସର ସନ୍ଦେହ ଆଇଆଇଏଫଏଲର କର୍ମଚାରୀଙ୍କ ଉପରକୁ ମଧ୍ୟ ଯାଉଛି ।
କନକ ନ୍ୟୁଜକୁ ମିଳିଥିବା ଏହି ଫଟୋ ବୟାନ କରୁଛି ଯେ ଲୁଟେରାମାନେ ଲୁଟ କରିବା ପରେ ୪୦/ ୪୨ କିଲୋର ସୁନା ଧରି ଯାଇ ନାହାଁନ୍ତି । କାରଣ ସେମାନେ ଯାଉଥିବାବେଳେ ଜଣଙ୍କ ପିଠିରେ ଏକ ଛୋଟ କଳାରଙ୍ଗର ବ୍ୟାଗ ଥିଲା ଏବଂ ସେଥିରେ ବେଶୀ ପରିମାଣର ସାମଗ୍ରୀ ନଥିବା ପରି ମନେ ହେଉଛି । ଏଥିସହ ଏକ ଧଳାରଙ୍ଗର ଜରି ଅଖା ବ୍ୟାଗ ରହିଛି । ଯାହାର ଉପରପଟ ଖୋଲା ରହିଛି । ଏବଂ ଏହି ବ୍ୟାଗରେ ମଧ୍ୟ ସେଭଳି କିଛି ବେଶି ସାମଗ୍ରୀ ଥିବା ଭଳି ଜଣାପଡୁନି ।
ସେପଟେ କମିଶନରେଟ ପୋଲିସ ସୁନା ଋଣ ସଂସ୍ଥାକୁ ପ୍ରବେଶ କରୁଥିବା ଲୋକମାନଙ୍କ ସିସିଟିଭି ଫୁଟେଜ ମାଗିଛି । ସେଥିରୁ ପୁଲିସ ଜାଣିବା ପାଇଁ ଚାହୁଁଛି ସଂସ୍ଥାକୁ କେହି ଲୋକ ରେକି କରିବା ପାଇଁ ଆସି ଥିଲେ କି?