ଉପଭୋକ୍ତା ବିବାଦ କମିଶନଙ୍କ ରାୟରେ ବଲିଉଡ଼ ଚଳଚିତ୍ର ‘ଓ ମାଇ ଗଡ୍’ର ପ୍ରତିଫଳନ : ୨୦ ବର୍ଷ ତଳର ଏକ ବିଦ୍ୟୁତ ସଂକ୍ରାନ୍ତ ଅଭିଯୋଗର ଆସିଲା ରାୟ

କନକ ବ୍ୟୁରୋ : ଉପଭୋକ୍ତା ବିବାଦ କମିଶନଙ୍କ ରାୟର ବଲିଉଡ ଫିଲ୍ମ ‘ଓ ମାଇ ଗଡ’ର ପ୍ରତିଫଳନ । ଝଡ଼ର କାରଣ ପ୍ରକୃତି ହୋଇପାରେ କିନ୍ତୁ କ୍ଷତି ପାଇଁ ବିଦ୍ୟୁତ ବିଭାଗ ଦାୟୀ । ଝଡ଼ ପାଇଁ ପ୍ରକୃତିକୁ ଦାୟୀ କରାଯାଇପାରେ କିନ୍ତୁ ବିଦ୍ୟୁତ ଯୋଗାଣ ନହୋଇପାରିବାରୁ ଯେଉଁ କ୍ଷତି ଘଟୁଛି ସେଥିପାଇଁ ବିଦ୍ୟୁତ ବିଭାଗ ନିଶ୍ଚିତ ଭାବେ ଦାୟୀ ।

ଝଡ଼ ପାଇଁ ବିଦ୍ୟୁତ ଯୋଗାଣରେ ହୋଇଥିବା ବିଭ୍ରାଟକୁ ଦାୟୀ କରି ରୁଜୁ ଏକ ମାମଲାରେ ରାଜ୍ୟ ଉପଭୋକ୍ତା ବିବାଦ ସମାଧାନ କମିସନ ଏଭଳି ଏକ ଗୁରୁତ୍ୱପୂର୍ଣ୍ଣ ମତ ଦେବା ସହ ବିଦ୍ୟୁତ ଯୋଗାଣକାରୀ ସଂସ୍ଥା ଉପରେ ୩ଲକ୍ଷ ଟଙ୍କର ଜରିମାନା କରିଛନ୍ତି । ଏହି ଜରିମାନା ଅର୍ଥ ଉପଭୋକ୍ତା ଆଇନ ସହାୟତା ଫଣ୍ଡରେ ଜମା କରାଯିବ ବୋଲି କମିସନ ନିର୍ଦ୍ଦେଶ ଦେଇଛନ୍ତି ।

୨୦୦୩ ମସିହାରୁ ଏହି ମାମଲା ଚାଲିଆସିଥିବାରୁ ଅଭିଯୋଗକାରୀଙ୍କୁ ୧ଲକ୍ଷ ଟଙ୍କାର କ୍ଷତିପୂରଣ ଏବଂ ମାମଲା ପରିଚାଳନା ବାବଦରେ ୫୦ହଜାର ଟଙ୍କା ଦେବାକୁ କମିସନ ନିର୍ଦ୍ଦେଶ ଦେଇଛନ୍ତି । କଟକର ଜଣେ ଉପଭୋକ୍ତା ଗିରିଜା ପ୍ରସାଦ ତ୍ରିପାଠୀଙ୍କ ପକ୍ଷରୁ ଆଗତ ମାମଲାର ଶୁଣାଣି କରି ରାଜ୍ୟ ଉପଭୋକ୍ତା ବିବାଦ ସମାଧାନ କମିସନର ତକ୍ରାଳିନ ସଭାପତି ଜଷ୍ଟିସ ଡିପି ଚୌଧୁରୀ, ସଦସ୍ୟ ପିକେ ପୃଷ୍ଟି, ଓ ଅନ୍ୟତମ ସଦସ୍ୟା ଏସଏଲ ପଟ୍ଟନାୟକଙ୍କୁ ନେଇ ଗଠିତ ୩ଜଣିଆ ଖଣ୍ଡପୀଠ ଏହି ନିର୍ଦ୍ଦେଶ ଦେଇଛନ୍ତି ।