ପାକ୍ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ବଡ ଆଶ୍ୱସ୍ତି । ନ୍ୟାସନାଲ ଆସେମ୍ଲିରେ ବିଶ୍ୱାସ ମତରେ ଜିତିଲେ ଇମ୍ରାନ ଖାନ୍ ।
କନକ ବ୍ୟୁରୋ: ଶକ୍ତି ପରୀକ୍ଷାରେ ବିଜୟ ସହିତ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ବଡ ଆଶ୍ୱସ୍ତି ମିଳିଛି । ଶକ୍ତି ପରୀକ୍ଷାରେ ବିଜୟ ସହିତ ପାକିସ୍ତାନରେ ଇମ୍ରାନ ଖାନ ସରକାରକୁ ନେଇ ଲାଗି ରହିଥିବା ଆଶା ଆଶଙ୍କା ମଧ୍ୟ ଟଳିଯାଇଛି । ଶୁକ୍ରବାର ପାକ୍ ସଂସଦରେ ହୋଇଥିବା ଶକ୍ତି ପରୀକ୍ଷାକୁ ବର୍ଜନ କରିଥିଲେ ବିରୋଧୀ ଦଳ । ଆଉ ଇମ୍ରାନ୍ ଖାନଙ୍କ ଦଳ ତେହରିକ୍ ଇ ଇନସାଫ୍ ଦଳ ସପକ୍ଷରେ ଯାଇଥିଲା ୧୭୮ ଟି ମତ ।
Kanak News is now on WhatsApp
Join and get latest news updates delivered to you via WhatsApp
ପାକିସ୍ତାନରେ ୧୧ଟି ରାଜନୈତିକ ଦଳକୁ ନେଇ ଗଠିତ ପାକିସ୍ତାନ ଡେମୋକ୍ରାଟିକ ମୁଭମେଂଟ ଇମ୍ରାନ ଖାନ ସରକାରର ଏହି ଶକ୍ତି ପରୀକ୍ଷାକୁ ବର୍ଜନ କରିଥିଲା । ବିରୋଧୀଙ୍କ ଏହି ନିଷ୍ପତି ପରେ , ଇମ୍ରାନ ଖାନଙ୍କ ବିଜୟ ରାସ୍ତା ସଫା ହୋଇଯାଇଥିଲା ।
ନିକଟରେ ପାକିସ୍ତାନ ସିନେଟ୍ ଚୟନ ପାଇଁ ଭୋଟିଂ ହୋଇଥିଲା । ଏହି ନିର୍ବାଚନରେ ପାକିସ୍ତାନ ପ୍ରଧାନମନ୍ତ୍ରୀଙ୍କ ସମର୍ଥିତ ପ୍ରାର୍ଥୀ ଅବଦୁଲ୍ ହଫିଜ୍ ସୈଖଙ୍କୁ ପରାସ୍ତ କରିଥିଲେ, ପାକିସ୍ତାନ ଡେମୋକ୍ରାଟିକ ମୁଭମେଂଟର ପ୍ରାର୍ଥୀ , ତଥା ପୂର୍ବତନ ପ୍ରଧାନମନ୍ତ୍ରୀ ୟୁସୁଫ୍ ରାଜା ଗିଲାନୀ । ଏହା ପରେ ଇମ୍ରାନ ଖାନଙ୍କ ସରକାର ଉପରେ ଚାପ ବଢିଥିଲା । କାରଣ ନିର୍ବାଚନରେ ହାରିଥିଲେ ପାକିସ୍ତାନର ଜଣେ କ୍ୟାବିନେଟ୍ ମନ୍ତ୍ରୀ । ଇମ୍ରାନ୍ ଖାନ୍ ସେତେବେଳେ ପାକିସ୍ତାନର ନାସନାଲ ଟିଭି ଚ୍ୟାନେଲରେ ଆସି ବିଶ୍ୱାସମତ ଦେବାର କଥା କହିଥିଲେ । ଆଉ ଶେଷରେ ଏହି ପରୀକ୍ଷା ପାସ୍ କରିଛନ୍ତି ଇମ୍ରାନ ଖାନ୍ ।
୨୦୧୮ ମସିହାରେ ନିର୍ବାଚନରେ ଜାଲିଆତି କରାଯାଇଥିବା ଅଭିଯୋଗ ଆଣି ପାକିସ୍ତାନରେ ଛୋଟ ବଡ ୧୧ଟି ରାଜନୈତିକ ଦଳ ଏକାଠି ହୋଇ ଗଠନ କରିଛନ୍ତି ପାକିସ୍ତାନ ଡେମୋକ୍ରାଟିକ୍ ମୁଭମେଂଟ । ଏହି ବିରୋଧୀ ଇମ୍ରାନ୍ ଖାନଙ୍କୁ କ୍ଷମତାରୁ ବିଦା କରିବାକୁ ଉଦ୍ୟମ ଜାରି ରଖିଛନ୍ତି । ୨୦୧୮ରେ ଇମ୍ରାନ୍ ଖାନ ୧୭୬ଟି ଭୋଟ୍ ପାଇ ସରକାର ଗଢିଥିଲେ । ଏବେ ବିଶ୍ୱାସମତରେ ୧୭୮ଟି ମତ ପାଇ ସରକାରରେ ସଂଖ୍ୟା ଗରିଷ୍ଠତାର ପ୍ରମାଣ ଦେଇଛନ୍ତି ।