ସଂଖ୍ୟା ଖେଳରେ ଫସିଗଲେ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ । ନ୍ୟାସନାଲ ଆସେମ୍ବଲିରେ ଭୋଟିଂ କରିବାକୁ ବିରୋଧୀଙ୍କ ଦାବି, ଏପ୍ରିଲ ୩ ଯାଏ ସ୍ଥଗିତ ରହିଲା ସଂସଦ ।
କନକ ବ୍ୟୁରୋ : ଆଜି ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ ଇସ୍ତ୍ରଫା ଦେଇପାରନ୍ତି । ଆଜି ରାତିରେ ସେ ପାକିସ୍ତାନବାସୀଙ୍କୁ ସମ୍ବୋଧନ କରିବାର କାର୍ଯ୍ୟକ୍ରମ ରହିଛି । ଇମ୍ରାନ ଖାନଙ୍କ ସରକାରକୁ ସମର୍ଥନ କରୁଥିବା ସହଯୋଗୀ ଦଳ ହାତ ଛାଡିଦେଇଛନ୍ତି । ତେଣୁ ସଂସଦରେ ସରକାର ଗଢିବା ପାଇଁ ଆବଶ୍ୟକ ଥିବା ମ୍ୟାଜିକ ନମ୍ବର ହରାଇସାରିଛନ୍ତି ଇମ୍ରାନ୍ । ଆଜି ପାକିସ୍ତାନ ସଂସଦରେ ପ୍ରଧାନମନ୍ତ୍ରୀ ଇମ୍ରାନ ଖାନ ସରକାର ବିରୋଧରେ ଆଗତ ଅନାସ୍ଥା ପ୍ରସ୍ତାବ ଉପରେ ଆଲୋଚନା ହେବାର ଥିଲା । କିନ୍ତୁ ନ୍ୟାସନାଲ ଆସେମ୍ବଲି କିଛି ସମୟ ଚାଲିବା ପରେ ଏପ୍ରିଲ ୩ ଯାଏ ସ୍ଥଗିତ ରଖାଯାଇଛି । ବିରୋଧୀ ସାଂସଦ ଅନାସ୍ଥା ପ୍ରସ୍ତାବ ଉପରେ ଶୀଘ୍ର ଭୋଟିଂ କରିବାକୁ ଦାବି କରିବା ପରେ ସଂସଦ ଅଧିବେଶନକୁ ସ୍ଥଗିତ ରଖାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଏହା ପୂର୍ବରୁ କିନ୍ତୁ ବିରୋଧୀ ଦଳର ନେତା ଶାହବାଜ ସରିଫଙ୍କ ସହ ଇମ୍ରାନ୍ ବୈଠକ କରିଥିବା ସୂଚନା ରହିଛି । ଯଦି ବିରୋଧୀ ଅନାସ୍ଥା ପ୍ରସ୍ତାବ ପ୍ରତ୍ୟାହାର କରିବେ ତାହେଲେ ସେ ସରକାର ଭାଙ୍ଗିବାକୁ ପ୍ରସ୍ତାବ ଦେଇଥିବା ସୂଚନା ରହିଛି । ଅନ୍ୟପଟେ ଇମ୍ରାନ ପାକିସ୍ତାନ ସେନାର ମୁଖ୍ୟ ଜେନେରାଲ ବାଜୱାଙ୍କଠୁ ସମ୍ମାନଜନକ ବିଦାୟ ମାଗିଥିବା ଜଣାପଡିଛି । ମିଳିଥିବା ସୂଚନା ଅନୁଯାୟୀ ଇମ୍ରାନ ଦାବି କରିଛନ୍ତି ଯେ ତାଙ୍କ ସରକାରକୁ ଭାଙ୍ଗିବା ପଛରେ ରହିଛି ବିଦେଶୀ ଶକ୍ତି । ଯଦି ସେ ଏବେ ସରକାର ଭାଙ୍ଗିବେ ଏବଂ ସାଧାରଣ ନିର୍ବାଚନ ହେବ ତାହେଲେ ଇମ୍ରାନ ଖାନ ପୁଣିଥରେ ନିର୍ବାଚିତ ହେବେ ବୋଲି ବିଶ୍ୱାସ ରଖିଥିବା ଆକଳନ କରିଛନ୍ତି ପାକିସ୍ତାନୀ ଗଣମାଧ୍ୟମ ।