ଅଡୁଆରେ ପାକିସ୍ତାନର ଇମ୍ରାନ ଖାନ ସରକାର । ସିନେଟ ନିର୍ବାଚନରେ ହାରିଗଲେ ଇମ୍ରାନ କ୍ୟାବିନେଟର ଅର୍ଥମନ୍ତ୍ରୀ । ବିରୋଧୀଙ୍କ ଦାବି ପଦ ଛାଡ଼ ଇମ୍ରାନ ।
କନକ ବ୍ୟୁରୋ: ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ରାଜନୈତିକ ଅଡୁଆ ବଢ଼ିଛି । ଇମ୍ରାନଙ୍କ କ୍ୟାବିନେଟରେ ଅର୍ଥମନ୍ତ୍ରୀ ଥିବା ଅବଦୁଲ ହଫିଜ୍ ସେଖ ସିନେଟ୍ ନିର୍ବାଚନରେ ହାରି ଯାଇଛନ୍ତି । ଆଉ ଏହାପରେ ଇମ୍ରାନ ସରକାର ବହୁମତ ହରାଇଥିବା ଅଭିଯୋଗ ଆଣିଛନ୍ତି ବିରୋଧୀ । ଏହାସହ ଇମ୍ରାନ ଖାନ ତୁରନ୍ତ ଇସ୍ତଫା ଦେବାକୁ ବିରୋଧୀ ଦାବି କରିଛନ୍ତି । ଫଳରେ ଇମ୍ରାନ ସରକାର ଖୁବ୍ ଶୀଘ୍ର ଆସ୍ଥା ଭୋଟର ସମ୍ମୁଖୀନ ହେବାକୁ ଯାଉଛି । ଆସ୍ଥା ଭୋଟର ସମ୍ମୁଖୀନ ହେବାକୁ ଇମ୍ରାନ ସରକାର ପ୍ରସ୍ତୁତି ଚଳାଇଛି । ତେବେ ପାକିସ୍ତାନ ସଂସଦର ନିମ୍ନ ସଦନ ନ୍ୟାସନାଲ ଆସେମ୍ବଲିରେ କେବେ ଏହି ଆସ୍ଥା ଭୋଟ ହେବ ଜଣାପଡ଼ି ନାହିଁ ।
Kanak News is now on WhatsApp
Join and get latest news updates delivered to you via WhatsApp
ପାକିସ୍ତାନ ଅର୍ଥମନ୍ତ୍ରୀ ଅବଦୁଲ ହଫିଜ୍ ସେଖ ସିନେଟ୍ ନିର୍ବାଚନରେ ପୂର୍ବତନ ପ୍ରଧାନମନ୍ତ୍ରୀ ୟୁସୁଫ ରାଜା ଗିଲାନିଙ୍କ ଠାରୁ ହାରିଯାଇଛନ୍ତି । ଗିଲାନିଙ୍କୁ ୧୧ଟି ବିରୋଧୀ ଦଳ ସମର୍ଥନ କରିଥିଲେ । ଗିଲାନିଙ୍କୁ ମୋଟ୍ ୧୭୯ଟି ଭୋଟ୍ ମିଳିଥିବା ବେଳେ ଅବଦୁଲ ହାଫିଜଙ୍କୁ ୧୬୪ଟି ଭୋଟ୍ ମିଳିଛି । ଏହି ପରାଜୟ ପରେ ନ୍ୟାସନାଲ ଆସେମ୍ବ୍ଲି ଇମ୍ରାନଙ୍କ ସରକାରର ବହୁ ମତ ଅଛି କି ନାହିଁ, ତାକୁ ନେଇ ପ୍ରଶ୍ନ ଉଠିଛି । ନ୍ୟାସନାଲ ଆସେମ୍ବଲିର ମୋଟ୍ ସଦସ୍ୟ ସଂଖ୍ୟା ୩୪୨ । ଇମ୍ରାନ କ୍ଷମତାକୁ ଆସିବା ବେଳେ ତାଂକୁ ନ୍ୟାସନାଲ ଆସେମ୍ବଲିର ୧୮୦ ସାଂସଦଙ୍କ ସମର୍ଥନ ରହିଥିଲା ।
ପାକିସ୍ତାନ ସଂସଦର ଉଚ୍ଚ ସଦନ ହେଉଛି ସିନେଟ୍ । ନ୍ୟାସନାଲ ଆସେମ୍ବଲିର ସଦସ୍ୟମାନେ ସିନେଟ ସଦସ୍ୟଙ୍କୁ ନିର୍ବାଚିତ କରିଥାନ୍ତି । ତେଣୁ ଜଣେ ମନ୍ତ୍ରୀ ସିନେଟ ନିର୍ବାଚନରେ ହାରିବା ଇମ୍ରାନ ସରକାରକୁ ଝଟକା ଦେଇଛି । ପାକିସ୍ତାନ ସିନେଟରେ ମୋଟ୍ ଶହେ ଆସନ ରହିଛି । ଇମ୍ରାନଙ୍କ ତେହେରିକ-ଇ-ଇନସାଫ ପାର୍ଟିର ଏଠାରେ ୨୬ ସଦସ୍ୟ ରହିଛନ୍ତି । ସିନେଟର ସବୁ ସଦସ୍ୟଙ୍କ ତାଲିକା ପ୍ରକାଶ ପାଇ ନାହିଁ । ତେବେ ତେହେରିକ-ଇ-ଇନସାଫକୁ ସିନେଟରେ ୫୦ ସିଟ୍ ମିଳିବା ସମ୍ଭାବନା ଖୁବ୍ କମ୍ ବୋଲି ଡନ୍ ଖବର କାଗଜ କହିଛି । ପ୍ରମୁଖ ବିଲ୍ ଗୁଡ଼ିକୁ ପାସ୍ କରାଇବାକୁ ଉଭୟ ନ୍ୟାସନାଲ ଆସେମ୍ବଲି ଓ ସିନେଟରେ ବହୁମତ ଆବଶ୍ୟକ । ତେଣୁ ସିନେଟ ବିରୋଧୀଙ୍କ କବଜାରେ ରହିଲେ ଏହା ଇମ୍ରାନଙ୍କ ପାଇଁ ଅଡ଼ୁଆ ବଢ଼ାଇ ପାରେ ।
ଇମ୍ରାନ ସରକାରକୁ ଏବେ ବିରୋଧୀ ନାକେଦମ୍ କରିସାରିଲେଣି । ବିରୋଧୀଙ୍କ ମିଳିତ ଆକ୍ରମଣର ସାମ୍ନାକୁ କରିବାକୁ ବହୁ ଅସୁବିଧାର ସାମ୍ନା କରୁଛନ୍ତି ପାକ୍ ପ୍ରଧାନମନ୍ତ୍ରୀ । ଏସବୁ ଭିତରେ ବିରୋଧୀମାନେ ମାର୍ଚ୍ଚ ୨୬ରେ ଇସଲାମାବାଦରେ ଏକ ବଡ଼ ଧରଣର ରାଲି କରିବାକୁ ଯାଉଛନ୍ତି । ପାକିସ୍ତାନ ମୁସଲିମ୍ ଲିଗ ଓ ପାକିସ୍ତାନ ପିପୁଲସ୍ ପାର୍ଟି ଇମ୍ରାନ ବିରୋଧରେ ଏକାଠି ହୋଇଛନ୍ତି । ପୂର୍ବରୁ ବିରୋଧୀ ମାନେ ପାକିସ୍ତାନର ବିଭିନ୍ନ ସହରରେ ମେଗା ରାଲି କରିସାରିଛନ୍ତି । ଏହି ରାଲିରେ ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ନୱାଜ ସରିଫଙ୍କ ଝିଅ ମରିୟମ ନୱାଜ ସରିଫ ନେତୃତ୍ୱ ନେଉଥିବା ଦେଖିବାକୁ ମିଳିଛି । ପୂର୍ବତନ ପ୍ରଧାନମନ୍ତ୍ରୀ ବେନେଜେର ଭୋଟୋଙ୍କ ପୁଅ ବିଲାୱଲ ଭୋଟୋଙ୍କ ସହ ମିଶି ମରିୟମ ଏହି ରାଲି କରୁଛନ୍ତି ।