ବର୍ଷା ବୁଡାଇଦେଲା ଚଷା ପୁଅର ବର୍ଷକର ଦାନା । ବିଲରେ ଭାସୁଛି ଧାନ । କଣ କରିବ କୃଷକ, ଚାଷୀ ଆଖିରେ ଲୁହ ।
କନକ ବ୍ୟୁରୋ : ବିଲରେ ଭିଜୁଛି ଚାଷୀର ପାଚିଲା ଧାନ । ଅଦିନିଆ ବର୍ଷା ପରର ଏପରି ଚିତ୍ରକୁ ନେଇ ଏବେ ଚିନ୍ତାରେ ଚାଷୀ । ଧାନ ହେଉ କି କପା ଚାଷ ଏବେ ବର୍ଷା ପାଇଁ ପ୍ରଭାବିତ ହୋଇଛି ଅମଳ । ଯଦିଓ ପାଗରେ କିଛିଟା ସୁଧାର ଆସିଛି ହେଲେ ବିଲରୁ ପାଣି କମିନି । ତେଣୁ ସରକାରୀ ସହାୟତା ଏବଂ ଫସଲର ଉଚିତ ପ୍ରାପ୍ୟ ପାଇଁ ସରକାରଙ୍କୁ ନିବେଦନ କରିଛନ୍ତି ଚାଷୀ ।
Kanak News is now on WhatsApp
Join and get latest news updates delivered to you via WhatsApp
ତିନି ଦିନର ଲଗାଣ ବର୍ଷା ପରେ କେନ୍ଦ୍ରାପଡା ଜିଲ୍ଲାର ରାଜନଗର ଏବଂ ରାଜକନିକାରେ ବିଲରେ ଭିଜିଛି ଚାଷୀର ପାଚିଲା ଧାନ । ଫସଲ ଅମଳ ହେବା ସମୟରେ ଏପରି ସ୍ଥିତି ଦେଖି ଚାଷୀ ଏବେ ମୁଣ୍ଡରେ ହାତ ଦେଇଛି । ଫସଲ ପାଣିରେ ଭିଜି ଏବେ ଗଜା ହେବାରେ ଲାଗିଲାଣି । ଏବେ ବର୍ଷା କମିଛି, କିନ୍ତୁ ବିଲରୁ ପାଣି କମୁନି । ଆଗକୁ ପୂର୍ଣ୍ଣିମା ରହିଥିବାରୁ ପାଣି ଏବେ କମିବା ଆଶଙ୍କା କମ୍, ଆଉ ଯାହାକୁ ନେଇ ଚିନ୍ତାରେ ଚାଷୀ । ସେହିଭଳି ଗଞ୍ଜାମ ଖଲ୍ଲିକୋଟରେ ମଧ୍ୟ ସମାନ ସ୍ଥିତି । ଦାନପୁର ପଞ୍ଚାୟତ ଫାସିପଡା ଗାଁ ଦେଇ ଯାଇଥିବା ଖରଖରି ନଦୀ ବର୍ଷା ପାଣି ଯୋଗୁଁ ଏହି ପାଣି ବିଲରେ ପଶିଛି । ଯାହା ବିଲରେ କଟା ହୋଇଥିବା ଫସଲକୁ ଧୋଇ ନେଇଯାଇଛି ।
ଖାଲି ଧାନ ନୁହେଁ କପା ଚାଷ ବି ଏହି ବର୍ଷାରେ ପ୍ରଭାବିତ ହୋଇଛି । ଲଗାଣ ବର୍ଷା ଯୋଗୁଁ ରାୟଗଡା ଜିଲ୍ଲାର ଚାଷୀଙ୍କ କଷ୍ଟ ଅର୍ଜିତ ଫସଲ ଏବେ ମାଟିରେ ମିଶିଛି । ବର୍ଷା ମାଡରେ ଫସଲ କଳା ପଡି ସଢ଼ି ଯାଉଥିବା ବେଳେ ଫୁଲ ଛିଣ୍ଡି ତଳେ ପଡି ନଷ୍ଟ ହୋଇଯାଉଛି । ଅଦିନିଆ ବର୍ଷା ମାଡରେ କପାର ଆଦ୍ରତା କମି ଯାଇଥିବାରୁ ଉଚିତ ମୂଲ୍ୟ ପାଇବାରୁ ବଞ୍ଚିତ ହେବେ କପା ଚାଷୀ ।