ଦୁର୍ବଳ ହେଲା ୟାସ୍ : ଅବପାତରେ ପରିଣତ ହୋଇ ଝାଡ଼ଖଣ୍ଡ ଆଡକୁ ମୁହାଁଇଲା ବାତ୍ୟା; ଆଜି ସୁନ୍ଦରଗଡ଼ ଓ ଦେଓଗଡ଼ ଜିଲ୍ଲାରେ ବର୍ଷା ସମ୍ଭାବନା
କନକ ବ୍ୟୁରୋ : ଦୁର୍ବଳ ହେବାରେ ଲାଗିଛି ବାତ୍ୟା ୟାସ୍ । ଅତି ଭୀଷଣ ସାମୁଦ୍ରିକ ଝଡ଼ରୁ ଭୀଷଣ ସାମୁଦ୍ରିକ ଝଡ଼ ଓ ପରେ ଗଭୀର ଅବପାତରେ ପରିଣତ ହେଉଛି । ଆଜି ସକାଳେ ଏହା ଆହୁରି ଦୁର୍ବଳ ହୋଇ ଅବପାତରେ ପରିଣତ ହୋଇଛି । ବାଲେଶ୍ୱରରୁ ମୟୁରଭଂଜ ଦେଇ ଝାଡ଼ଖଣ୍ଡ ମୁହାଁ ହୋଇଛି ବାତ୍ୟା । ଏହାର ପ୍ରଭାବରେ ସୁନ୍ଦରଗଡ ଓ ଦେଓଗଡ଼ ଜିଲ୍ଲାରେ ବର୍ଷା ହେବା ସମ୍ଭାବନା ରହିଛି । ବାତ୍ୟା ୟାସ୍ ଯୋଗୁଁ ଓଡ଼ିଶାରେ କ୍ଷୟକ୍ଷତି ହୋଇଛି ସତ, ତେବେ ଓଡ଼ିଶା ପାଇଁ ଟଳି ଯାଇଛି ଏକ ବଡ଼ ବିପଦ । ବାତ୍ୟାର ପ୍ରଭାବରେ ଧନଜୀବନହାନୀର ଯେତେ ବଡ଼ ଆଶଙ୍କା କରାଯାଉଥିଲା, ସୌଭାଗ୍ୟ ବଶତଃ ସେତେ ବଡ଼ ଧରଣର କ୍ଷୟକ୍ଷତି ହୋଇନାହିଁ ।
Kanak News is now on WhatsApp
Join and get latest news updates delivered to you via WhatsApp
ବାତ୍ୟା ପୂର୍ବରୁ ପ୍ରଶାସନର ସତର୍କତା ଏବଂ ଜନସାଧାରଣଙ୍କ ସଚେତନା, ୟାସ୍ ଭଳି ଏକ ବଡ଼ ବିପର୍ଯ୍ୟୟର ମୁକାବିଲା କରିବାରେ ସହାୟକ ହୋଇଛି । ବାତ୍ୟା ଚାଲିଯାଇଛି, ଆଉ ବାତ୍ୟା ଆଶ୍ରୟସ୍ଥଳୀରୁ ଘର ମୁହାଁ ହେଉଛନ୍ତି ବାତ୍ୟା ପ୍ରଭାବିତ ଲୋକେ ।ଜଗତସିଂହପୁର, କେନ୍ଦ୍ରାପଡା, ଯାଜପୁରରେ ବିଶେଷ କ୍ଷୟକ୍ଷତି ହୋଇଥିବା ନଥିବା ବେଳେ କିଛି ସ୍ଥାନରେ ଉପୁଡି ପଡିଛି । ଆଉ ଏହାକୁ ସଫା କରି ଯାତାୟତ ସ୍ୱାଭାବିକ୍ କରିବା ପାଇଁ ଉଦ୍ୟମ ଜାରି ରହିଛି । ଭଦ୍ରକ ଓ ବାଲେଶ୍ୱରରେ ୟାସ୍ର ପ୍ରଭାବ ବେଶି ଅନୁଭତ ହୋଇଥିବା ବେଳେ ପବନ କମିଥିବାରୁ ପୁନରୁଦ୍ଧାର କାମ ଆରମ୍ଭ ହୋଇଛି ।
ବାଲେଶ୍ୱରରେ ଜଣେ ଯୁବକଙ୍କ ମୃତ୍ୟୁ ହୋଇଥିବା ବେଳେ କେନ୍ଦୁଝର ଘସିପୁରାରେ ଆଉ ଜଣଙ୍କ ମୃତ୍ୟୁ ହୋଇଥିବା ଜଣାପଡ଼ିଛି । ଏପଟେ ବାତ୍ୟା ବିପଦ ଟଳିଯିବା ପରେ ଏନଡିଆରଏଫ, ଓଡ୍ରାଫ ଓ ଅଗ୍ନିଶମ ବିଭାଗ ଟିମ୍ ରାସ୍ତା ସଫା କାମରେ ଲାଗିଛନ୍ତି ।ଏତେ ବଡ଼ ବାତ୍ୟାରେ ହୁଏତ, ଧନଜୀବନ ବିଶେଷ ଭାବେ ପ୍ରଭାବିତ ହୋଇନାହିଁ । କିନ୍ତୁ ବାତ୍ୟା ପ୍ରଭାବିତ ଅଂଚଳରେ ଲୋକଙ୍କୁ ଅନେକ ଅସୁବିଧାର ସମ୍ମୁଖିନ ହେବାକୁ ପଡ଼ିଛି । କାରଣ, ବହୁ ଗାଁରେ ପାଣି ପଶିଛି । ବାହାନଗା, ରେମୁଣା, ବାଲେଶ୍ୱର ସଦର, ଧାମରାରେ ପଶିଛି ପାଣି ।