କନକ ବ୍ୟୁରୋ : ଗତ ଦୁଇଦିନ ଧରି ଲଘୁଚାପ ପ୍ରଭାବରେ ପ୍ରବଳ ବର୍ଷା ଲାଗି ରହିଛି । ଯାହା ଫଳରେ ପୋଖରୀ ନାଳରେ ପାଣି ଭର୍ତ୍ତି ହେବା ସହ ନଦୀ ଗୁଡିକରେ ବର୍ଷା ଜଳ କୂଳ ଲଂଘିବାରେ ଲାଗିଛି । ନିଅଣ୍ଟିଆ ବର୍ଷା ପାଇଁ ସବୁ ଶୁଖିଲା ପଡ଼ିଥିବା ବେଳେ ବର୍ତମାନ ବର୍ଷା ଫଳରେ ଜଳପୂର୍ଣ୍ଣ ହେବାରେ ଲାଗିଛି । ବର୍ତମାନ ସୁଦ୍ଧା ସ୍ଥିତି ନିୟନ୍ତ୍ରଣରେ ଥିବା ବେଳେ ବର୍ଷା ଜାରି ରହିଥିବାରୁ ଆଗାମୀ ସମୟରେ ବନ୍ୟା ଆଶଙ୍କା ସୃଷ୍ଟି ହୋଇଛି । ଲୋହାରାଖଣ୍ଡି, ବଡ଼ ନଦୀ, ପଦ୍ମା ନଦୀ ଓ ବୋଡା ନଦୀରେ ଦୁଇ କୂଳ ଉଛୁଳି ପାଣି ଯାଉଥିବା ଦେଖିବାକୁ ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ବେଲଗୁଣ୍ଠା ବ୍ଲକ୍ ଚଢ଼େୟା ପଲ୍ଲୀ ନିକଟରେ ବୋଡା ନଦୀ ସେତୁ ନିର୍ମାଣାଧୀନ ଥିବା ବେଳେ ଏଥି ପାଇ ନିର୍ମିତ ଡାଇଭର୍ସନ୍ ରୋଡ଼ ଉପରେ ୫ ଫୁଟ ଉଚ୍ଚରେ ବର୍ଷାଜଳ ପ୍ରଭାବିତ ହୋଇଛି । ଯାହା ଫଳରେ ବେଲଗୁଣ୍ଠା ବାଲିପଦର ଯୋଗାଯୋଗ ବିଚ୍ଛିନ୍ନ ହୋଇଯାଇଛି । ଏହି ରାସ୍ତା ଉପରେ ପ୍ରାୟ ୪୦ରୁ ଉର୍ଦ୍ଧ ଗ୍ରାମବାସୀ ନିର୍ଭର କରୁଥିବା ବେଳେ ଗମନାଗମନ ସମୂର୍ଣ୍ଣ ଠପ୍ ହୋଇଯାଇଛି । ଅନ୍ୟପଟେ ଜଳ ଭଣ୍ଡାର ଗୁଡ଼ିକ ମଧ୍ୟ ଜଳସ୍ତର ବଢ଼ିବାରେ ଲାଗିଛି । ଅନବରତ ବର୍ଷା ଯୋଗୁ ଜନଜୀବନ ପ୍ରଭାବିତ ହୋଇଛି । ଯାତାୟତ ଏକ ପ୍ରକାର ଠପ୍ ହୋଇଯାଇଛି । ଯେ କୌଣସି ପ୍ରକାରର ପରିସ୍ଥିତି ପାଇଁ ପ୍ରଶାସନ ସଜାଗ ରହିଥିବା ବେଳେ ବନ୍ୟା ଆଶଙ୍କା ରହିଥିବା ଅଞ୍ଚଳ ଗୁଡିକରେ ତୀକ୍ଷ୍ଣ ନଜର ରଖାଯାଇଥିବା ଭଞ୍ଜନଗର ଉପଜିଲ୍ଲାପାଳ କହିଛନ୍ତି । ଆବଶ୍ୟକ ପଡିଲେ ଲୋକମାନଙ୍କୁ ସ୍ଥାନାନ୍ତର କରାଯିବା ନେଇ ସେ ସୂଚନା ଦେଇଛନ୍ତି ।