ପୋଲିସ ହାଉସିଂ ବୋର୍ଡ ଡେପୁଟି ମ୍ୟାନେଜର ଚାକିରିରେ ୧୫ କୋଟିର ଟଙ୍କାର ଅଚଳାଚଳ ସମ୍ପତ୍ତି । ବାବୁଙ୍କ ସମ୍ପତ୍ତି ଦେଖି କାବା ହୋଇଗଲେ ଭିଜିଲାନ୍ସ ଅଧିକାରୀ ।
ଆୟର ୧୦ ଗୁଣ ସମ୍ପତ୍ତିି ଠୁଳ ଅଭିଯୋଗରେ ପ୍ରତାପ ସାମଲଙ୍କୁ ଗିରଫ କଲା ଭିଜିଲାନ୍ସ
କନକ ବ୍ୟୁରୋ: ପୋଲିସ ହାଉସିଂ ବୋର୍ଡ଼ ଡ଼େପୁଟି ମ୍ୟାନେଜର ପ୍ରତାପ ସାମଲଙ୍କ ସମ୍ପତ୍ତି ଦେଖି ଖୋଦ ଭିଜିଲାନ୍ସ ଅଧିକାରୀମାନେ କାବା ହୋଇ ଯାଇଛନ୍ତି । ଜଣେ ଡେପୁଟି ମ୍ୟାନେଜର ଏତେ ପରିମାଣର ସମ୍ପତ୍ତିି ଠୁଳ କରିଥିବେ ବୋଲି କେହି କେବେ ଅନୁମାନ କରିପାରିନଥିଲେ । ଭିଜିଲାନ୍ସର ଅଧିକାରୀମାନେ ଯେତେ ଖୋଜି ଚାଲିଥିଲେ, ସେତେ ସମ୍ପତ୍ତି ମିଳି ଚାଲିଥିଲା । ୨୭ ପ୍ଲଟ, ୫ କୋଠା, ୨୦ ହଜାର ବର୍ଗଫୁଟ ସ୍ଥାନରେ ବିଶାଳ ଅଟ୍ଟାଳିକା, ରାଜଧାନୀର ଛାତି ନୟାପଲ୍ଲୀରେ ରାଜକୀୟ କୋଠା, ଏମିତି ଆହୁରି କେତେ କଣ ।
Kanak News is now on WhatsApp
Join and get latest news updates delivered to you via WhatsApp
ଜୀବନ ସାରା ପରିଶ୍ରମ କରି ଘର ଖଣ୍ଡେ କରିବା ସାଧାରଣ ମଣିଷ ପାଇଁ କାଠିକର ପାଠ ହୋଇଯାଉଥିବାବେଳେ, ବିରାଟ ବିରାଟ ଅଟ୍ଟାଳିକା କରିଥିଲେ ଓଡିଶା ପୁଲିସ ହାଉସିଂ କର୍ପୋରେସନର ଡେପୁଟି ମ୍ୟାନେଜର ଭାବେ କାର୍ଯ୍ୟ କରୁଥିବା ପ୍ରତାପ ସାମଲ । ଯାହାକୁ ଦେଖି ତଦନ୍ତକାରୀ ଅଧିକାରୀ କାବା ହୋଇଯାଇଛନ୍ତି ।
କୁବେର ସରକାରୀ ବାବୁ ପ୍ରତାପ ସାମଲଙ୍କ ବିଭିନ୍ନ ଠିକଣାରେ ରେଡ୍ ପରେ , ତଦନ୍ତ ଯେତିକି ଯେତିକି ଆଗଉଛି ତାଙ୍କ ସମ୍ପତ୍ତିର ପରିମାଣ ସେତିକି ବଢ଼ି ବଢ଼ି ଚାଲିଛି । ଏପର୍ଯ୍ୟନ୍ତ ଭିଜିଲାନ୍ସ ଠାବ କରିଥିବା ପ୍ରତାପଙ୍କ ସମ୍ପତ୍ତିର ପରିମାଣ ତାଙ୍କ ଆୟଠାରୁ ୧୦ ଗୁଣ ଅଧିକ ବୋଲି ଜଣାପଡିଛି । ସରକାରୀ ଭାବେ ୧ ହଜାର ୭୧ ପ୍ରତିଶତ ବୋଲି କୁହାଯାଇଛି । ମୋଟ ସମ୍ପତିର ମୂଲ୍ୟ ୧୪ କୋଟି ୮୭ ଲକ୍ଷ ବୋଲି ଭିଜିଲାନ୍ସ କହିଛି । ଏଥିରେ ରହିଛି, ପ୍ରତାପ ଓ ତାଙ୍କ ପରିବାର ନାଁରେ ବ୍ୟାଙ୍କରେ ଥିବା ୧ କୋଟି ୬୧ ଲକ୍ଷ ୩୫ ହଜାର ୮୧୨ ଟଙ୍କା । ପ୍ରତାପ ଓ ତାଙ୍କ ପରିବାରଙ୍କ ନାଁରେ ଥିବା ୨୫ଟି ଜମି, କୋଠା ଓ ଫ୍ଲାଟ ।
୩୩ ବର୍ଷର ଚାକିରୀ ଭିତରେ ପ୍ରତାପ କେମିତି ଏତେ ଟଙ୍କା ଆଣିଲେ ତାକୁ ନେଇ ଜୋର ଧରିଛି ଚର୍ଚ୍ଚା । କୁହାଯାଉଛି, ସେ ବିଭିନ୍ନ ଜିଲ୍ଲାରେ ଦାୟିତ୍ୱରେ ଥିବାବେଳେ ନିଜ ଇଛା ଅନୁସାରେ ନିର୍ମାଣ କାର୍ଯ୍ୟର କାଗଜପତ୍ର କରିବା ସହ ଠିକାଦାର ଚୟନ କରୁଥିଲେ । ଆଉ ସେମାନଙ୍କ ଠାରୁ ମୋଟା ଅଙ୍କର ଟଙ୍କା ନେଇ ନିର୍ମାଣ ହେଉଥିଲା ବିଭିନ୍ନ କୋଠା । ଅସତ ଉପାୟରେ ଆୟ କରିଥିବା ସେହି ଟଙ୍କାରେ କୁବେର ପାଲଟି ଯାଇଥିଲେ ପ୍ରତାପ । ହେଲେ ପ୍ରଶ୍ନ ଉଠୁଛି,
- ପ୍ରତାପ ଏକୁଟିଆ ଏହି କାମ କରୁଥିଲେ ନା ତାଙ୍କର କିଏ ଗଡଫାଦର ଥିଲେ?
- ଏକୁଟିଆ ଏତେ ବଡ ଦୁର୍ନୀତି କରିବା କଣ ସମ୍ଭବ ହୋଇଥିବ?
- ଭିଜିଲାନ୍ସର କାମ ଏଇଠି ଅଟକି ଯିବ ନା ଆଗକୁ ବଢ଼ିବ?