ନୟାଗଡ଼ ପୁଣି ଚାଲିଛି ବେଆଇନ ଭୃଣ ହତ୍ୟା : ଆନନ୍ଦ ଭବନ ଆଦିତ୍ୟ ହସ୍ପିଟାଲ ଆଣ୍ଡ କ୍ଲିନିକରେ ରାତି ଅଧିଆ ଚଢ଼ଉ
ଦଲାଲ ସମେତ ୫ ଗିରଫ
କନକ ବ୍ୟୁରୋ : ବେଆଇନ ଗର୍ଭପାତ ଅଭିଯୋଗରେ ପୋଲିସର ଚଢଉ । ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟ ନିକଟରେ ଥିବା ଆନନ୍ଦ ଭବନ ହସ୍ପିଟାଲରେ ଚଢ଼ଉ କରିଛି ପୋଲିସ । ହସ୍ପିଟାଲର ମାଲିକଙ୍କ ସମେତ ୫ ଜଣଙ୍କୁ ଗିରଫ କରିଛି ପୋଲିସ । ହସ୍ପିଟାଲରେ କନ୍ୟା ଭୃଣ ଚିହ୍ନଟ କରି ଗର୍ଭପାତ କରାଯାଉଥିବା ନେଇ ଅଭିଯୋଗ ଆସିଥିଲା । ଏହା ପରେ ଜିଲ୍ଲା ପ୍ରଶାସନ ସିଡିଏମଓଙ୍କ ନେତୃତ୍ୱର ଏକ ଟିମ ଗଠନ କରିବା ସହ ଏନେଇ ସ୍ଥାନୀୟ ଟାଉନ ଥାନାରେ ଅଭିଯୋଗ କରିଥିଲେ । ଗତକାଲି ବିଳମ୍ବିତ ରାତିରେ ପୋଲିସ ହସ୍ପିଟାଲରେ ଚଢଉ କରି ୬ ଜଣଙ୍କୁ ଥାନାକୁ ଆଣି ପଚରାଉଚରା କରିବା ପରେ ଗିରଫ କରିଛି ।
Kanak News is now on WhatsApp
Join and get latest news updates delivered to you via WhatsApp
ଖବର ମିଳିବା ପରେ, ଗତକାଲି ବିଳମ୍ବିତ ରାତିରେ ଜିଲ୍ଲାପାଳଙ୍କ ନିର୍ଦ୍ଦେଶ କ୍ରମେ ଏହି ଚଢ଼ଉ କରାଯାଇଥିଲା। ଏନେଇ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ଡ. ଶକ୍ତିପ୍ରସାଦ ମିଶ୍ର ଏକ ଟିମ୍ ଗଠନ କରିଥିଲେ । ଜିଲ୍ଲା ମୁଖ୍ୟ ଚିକିତ୍ସାଳୟର ସ୍ତ୍ରୀ ରୋଗ ବିଶେଷଜ୍ଞ ଅରବିନ୍ଦ ମହାପାତ୍ର, ଲିଗାଲ୍ ଆଫାୟାର୍ସ ସହକାରୀ ମ୍ୟାନେଜର ଜୟକୃଷ୍ଣ ସାହୁ ପ୍ରମୁଖଙ୍କୁ ଉକ୍ତ କ୍ଲିନିକ୍କୁ ପଠାଯାଇଥିଲା । ନୟାଗଡ଼ ତହସିଲଦାର ଭିକାରି ସାହୁଙ୍କ ଉପସ୍ଥିତିରେ ଟାଉନ ଥାନା ଆଇଆଇସି ଜୟଦୀପ ମହାନ୍ତି ଓ ତାଙ୍କ ଟିମ୍ ଉକ୍ତ କ୍ଲିନିକ୍ରେ ଚଢ଼ଉ କରିଥିଲେ । ଗର୍ଭପାତ ପରେ ମହିଳା ଚିକିତ୍ସାଧୀନ ଥିବାରୁ ତାଙ୍କୁ ଆଣି ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା।
ମହିଳା ଜଣକ ପ୍ରାୟ ୪ ମାସର ଗର୍ଭବତୀ ଥିଲେ। ତେବେ ତାଙ୍କ ପେଟରେ ବଢ଼ୁଥିବା ପିଲାର ସ୍ବାସ୍ଥ୍ୟ ବିଷୟରେ ଜାଣିବାକୁ ସେ ନୟାଗଡ଼ର ସନ୍ ଆପୋଲୋ କ୍ଲିନିକ୍ରେ ଗର୍ଭ ପରୀକ୍ଷା କରାଇଥିଲେ । ତଦନ୍ତ ସମୟରେ ମହିଳାଙ୍କ ପକ୍ଷରୁ ଉକ୍ତ ରିପୋର୍ଟ ଦେଖାଯାଇଥିବା ଡ. ମହାପାତ୍ର କହିଛନ୍ତି । ସେଥିରୁ ମହିଳାଙ୍କ ଗର୍ଭରେ ଥିବା ଭ୍ରୂଣ ପୁଅ କି ଝିଅ ଜାଣିବା ଏହି ସମୟରେ ଅସମ୍ଭବ । କିନ୍ତୁ ଗର୍ଭରେ ବଢ଼ୁଥିବା ପିଲାଟି ‘ସ୍କେଲିଡାଲ୍ ଡିସ୍ପ୍ଲାସିଆ’ ରୋଗ ଅର୍ଥାତ୍ ବାମନ ହେବାର ଆଶଙ୍କା ରହିଥିଲା । ସେହି ଦୃଷ୍ଟିରୁ ଉକ୍ତ ଦମ୍ପତି ଗର୍ଭପାତ କରାଇବାକୁ ଚାହିଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି । କିନ୍ତୁ, ଏଭଳି ଗର୍ଭପାତ ଆଇନସମ୍ମତ ଭାବେ କରାଇବାର ଆବଶ୍ୟକତା ରହିଥିଲା ବୋଲି ସେ କହିଛନ୍ତି । ନୟାଗଡ଼ ଜିଲ୍ଲା ଏସପି ଘଟଣାସ୍ଥଳରେ ପହଂଚି ଅଧିକ ତଦନ୍ତ ଜାରି ରଖିଛନ୍ତି ।