ବଦଳିବ ଭାଗ୍ୟ ! ଖୁବଶୀଘ୍ର ସମ୍ବଲପୁର ବିଶ୍ୱବିଦ୍ୟାଳୟକୁ ସ୍ଥାନାନ୍ତର ହେବ ଆଇଆଇଏମ୍
କନକ ବ୍ୟୁରୋ : ସମ୍ବଲପୁର ବିଶ୍ୱ ବିଦ୍ୟାଳୟ ପରିସରକୁ ସ୍ଥାନାନ୍ତରିତ ହେବ ଇଣ୍ଡିଆନ ଇନଷ୍ଟିଚ୍ୟୁଟ ଅଫ ମ୍ୟାନେଜମେଣ୍ଟ । ୨୦୧୮ ଜାନୁଆରୀ ସୁଦ୍ଧା ଏହା ବିଶ୍ୱ ବିଦ୍ୟାଳୟ ପରସରରେ ଥିବା ଏହାର ଅସ୍ଥାୟୀ କ୍ୟାମ୍ପସକୁ ସ୍ଥାନାନ୍ତର ହେବ ବୋଲି ନିଷ୍ପତି ନିଆଯାଇଛି । ଗତକାଲି ବୋର୍ଡ ଅଫ ଗଭର୍ନର୍ସ ମିଟିଂରେ ଏହି ନିଷ୍ପତି ନିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଭାରତୀୟ ଷ୍ଟେଟ ବ୍ୟାଙ୍କ ଅଧ୍ୟକ୍ଷା ଅରୁନ୍ଧତୀ ଭଟ୍ଟାଚାର୍ଯ୍ୟଙ୍କ ଅଧ୍ୟକ୍ଷତାରେ ଆୟୋଜିତ ବୈଠକରେ ମୁଖ୍ୟ ଶାସନ ସଚିବ ଆଦିତ୍ୟ ପ୍ରସାଦ ପାଢ଼ୀ ଯୋଗଦେଇଥିଲେ । ଦକ୍ଷତା ବିକାଶ ମନ୍ତ୍ରଣାଳୟର ସଚିବ ସଞ୍ଜୟ କୁମାର ସିଂ ଙ୍କ ସମେତ ମାନବସମ୍ବଳ ବିକାଶ ମନ୍ତ୍ରାଳୟ ଓ ଅର୍ଥ ମନ୍ତ୍ରାଳୟର ବରିଷ୍ଠ ଅଧିକାରୀ ମାନେଏହି ବୈଠକରେ ଯୋଗ ଦେଇଥିବା ବେଳେ ଆଇଆଇଏମ୍ ସମ୍ବଲପୁରର ନିର୍ଦ୍ଦେଶକ ଏମ୍ ପି ଜୟଶ୍ୱାଲ ବୈଠକରେ ସବିଶେଷ ବିବରଣୀ ପାଠ କରିଥିଲେ ।
ଗତ ଦୁଇବର୍ଷ ଧରି ଘରୋଇ କଲେଜ ସିଲିକନ ୟୁନିଭରସିଟି ପରିସରରେ ଆଇଆଇଏମ୍ ଚାଲୁଛି । ତେବେ ଏହି ସ୍ଥାନାନ୍ତରଣ ଦ୍ୱାରା ସରକାରୀ କୋଠାରେ ଅପଗ୍ରେଡେସନ ପାଇଁ ସରକାର ଟଙ୍କା ଖର୍ଚ୍ଚ କରିବା ସହଜ ହେବ । ପୂର୍ବରୁ ଘରୋଇ ଅନୁଷ୍ଠାନରେ ଏହା ଖର୍ଚ୍ଚ ହୋଇପାରୁନଥିଲା । ତେଣୁ କ୍ୟାମ୍ପସକୁ ବ୍ୟବସ୍ଥିତ କରାଇବା ସରକାରଙ୍କ ପାଇଁ ସୁବିଧାଜନକ ହେବ ।
ସମ୍ବଲପୁର ୟୁନିଭରିସିଟି ପରିସରରେ ଆଇଆଇଏମର ନୂଆ ଅସ୍ଥାୟୀ କ୍ୟାମ୍ପସ ସ୍ଥାପନ ପାଇଁ ପ୍ରାୟ ୭୯ କୋଟି ଟଙ୍କା ମଂଜୁର ହୋଇଥିବା ଜଣାପଡିଛି । ତେବେ ବୋର୍ଡ ଅଫ ଗଭର୍ନର୍ସ ରେ ନିଆଯାଇଥିବା ନିଷ୍ପତି ଅନୁଯାୟୀ, ଏହି ଅର୍ଥରେ ନୂଆ ଏକାଡେମିକ୍ ବିଲ୍ଡିଂ ଏବଂ ହଷ୍ଟେଲ ନିର୍ମାଣ କରାଯିବ । ଯାହା ଛାତ୍ରଛାତ୍ରୀଙ୍କ ପାଇଁ ଲାଭଦାୟକ ହେବ । ଏନେଇ ସମ୍ବଲପୁର ଆଇଆଇଏମ୍ ଓ ସମ୍ବଲପୁର ୟୁନିଭରିସିଟି ମଧ୍ୟରେ ଏକ ଏମଓୟୁ ସ୍ୱାକ୍ଷରିତ ହେବାକୁ ଯାଉଛି । ମିଳିଥିବା ତଥ୍ୟ ଅନୁସାରେ ମାନବସମ୍ବଳ ବିକାଶ ମନ୍ତ୍ରାଳୟ ମଧ୍ୟ ଏହି ଏମଓୟୁକୁ ଅନୁମୋଦନ ଦେଇସାରିଛି ଏବଂ ଏହି ଦିଗରେ କାର୍ଯ୍ୟକାରୀ କରିବାକୁ ଗ୍ରୀନ ସିଗନାଲ ମିଳିଛି ।
ଏହା ଭିତରେ ଆଇଆଇଏମ୍ ସମ୍ବଲପୁର ୬୦ରୁ ୧୨୦ ସିଟ ବଢ଼ାଇବାକୁ ଲକ୍ଷ୍ୟ ରଖିଛି । ତେଣୁ ଏହି ନୂଆ ଏକାଡେମିକ ବ୍ଲକ ଏଦିଗରେ ଯଥେଷ୍ଟ ସାହାଯ୍ୟ କରିବ । ଖାଲି ଏତିକି ନୁହେଁ ଏହାକୁ ନଜରରେ ରଖି ଅଧିକ ଫାକୁଲଟି ପଦ ପୁରଣ ପାଇଁ ଆଇଆଇଏମ୍ ପକ୍ଷରୁ ପ୍ରକିୟା ଆରମ୍ଭ ହେଉଛି ।
ସମ୍ବଲପୁର ଆଇଆଇଏମ୍ ହେଉଛି ଇଣ୍ଡିଆନ ଇନଷ୍ଟିଚ୍ୟୁଟ ଅଫ ମ୍ୟାନେଜମେଣ୍ଟ ଇନ ଇଣ୍ଡିଆର ୧୪ ତମ କ୍ୟାମ୍ପସ । ୨୦୧୫ରେ ଏହା ପ୍ରତିଷ୍ଠା କରାଯାଇଥିଲା ।