ବଙ୍ଗୋପସାଗରରେ ଡିପ୍ ଡିପ୍ରେସନ୍ ବାତ୍ୟାର ରୂପ ନେଲେ ନାଁ ରହିବ ‘ବୁଲବୁଲ’ । ପାଣିପାଗ ସଂସ୍ଥା ସ୍କାଇମେଟ ୱେଦରର ଆକଳନ, ଓଡ଼ିଶା ଓ ଆନ୍ଧ୍ର ମୁହାଁ ହୋଇଥାନ୍ତି ନଭେମ୍ବର ମାସର ବାତ୍ୟା ।
କନକ ବ୍ୟୁରୋ : ବଙ୍ଗୋପସାଗରରୁ ଆସିବ କି ‘ବୁଲବୁଲ’? ଉତ୍ତର ଆଣ୍ଡାମାନ ସାଗରରେ ସୃଷ୍ଟି ହୋଇଥିବା ଲଘୁଚାପ ବୁଧବାର ଅବପାତର ରୂପ ନେଇପାରେ ବୋଲି ପୂର୍ବାନୁମାନ କରାଯାଉଛି । ଆଉ ଏହି ସମୟରେ ଏହା କେନ୍ଦ୍ରୀୟ ବଙ୍ଗୋପସାଗରରେ ପ୍ରବେଶ କରିବ । ଏହାପରେ ଏହା ଆହୁରି ଶକ୍ତିଶାଳୀ ହେବା ସହ ପଶ୍ଚିମ ଓ ଉତ୍ତର ପଶ୍ଚିମ ଦିଗରେ ଗତି କରିପାରେ । ତେବେ ବଙ୍ଗୋପସାଗରରେ ଏହି ଅବପାତ ଯଦି ଡିପ୍ ଡିପ୍ରେସନ ସହ ବାତ୍ୟାର ରୂପ ନିଏ ତେବେ ଏହାର ନାଁ ବୁଲବୁଲ ରହିବ ବୋଲି କହିଛି ପାଣିପାଗ ସଂସ୍ଥା ସ୍କାଇମେଟ ୱେଦର । ତେବେ ଏହି ଅବପାତ ବାତ୍ୟାର ରୂପ ନେବ ନା ସମୁଦ୍ର ମଧ୍ୟରେ ଦୁର୍ବଳ ହୋଇଯିବ ସେନେଇ ଆସନ୍ତା ୬ କିମ୍ବା ୭ରେ ସ୍ପଷ୍ଟ ଚିତ୍ର ସାମ୍ନାକୁ ଆସିବ । ଯଦି ଏହା ବାତ୍ୟାର ରୂପ ନିଏ ତେବେ ସ୍ଥଳଭାଗ ଛୁଇଁବାକୁ ୫ରୁ ୬ ଦିନ ସମୟ ଲାଗିବ ।
Kanak News is now on WhatsApp
Join and get latest news updates delivered to you via WhatsApp
ପାଣିପାଗ ବିଶେଷଜ୍ଞଙ୍କ କହିବା କଥା ଉତ୍ତର ଆଣ୍ଡାମାନ ସାଗରରେ ସୃଷ୍ଟି ଲଘୁଚାପ ବାତ୍ୟାର ରୂପ ନେବା ପାଇଁ ପାରିପାଶ୍ୱିକ ସ୍ଥିତି ସୁହାଇଲା ଭଳି ରହିଛି । ଉତ୍ତର ଆଣ୍ଡାମାନ ସାଗରରେ ସୃଷ୍ଟି ହୋଇଥିବା ବାତ୍ୟା ଦୁର୍ବଳ ହେଲେ ବଙ୍ଗୋପ ସାଗରରେ ଅବପାତ ଘନିଭୂତ ହୋଇପାରେ । ବଙ୍ଗୋପ ସାଗରର ତାପମାତ୍ରା ଓ ପବନର ବେଗ ବାତ୍ୟା ଅନୁକୂଳ ପରିବେଶ ସୃଷ୍ଟି କରିଛି । ତେବେ ଏହା ବାତ୍ୟାର ରୂପ ନେଲେ ଓଡ଼ିଶା କିମ୍ବା ଆନ୍ଧ୍ରପ୍ରଦେଶ ଉପକୂଳ ଛୁଇଁବାର ସମ୍ଭାବନା ରହିଛି । ହେଲେ ଏହା ଓଡିଶାକୁ କେତେ ପ୍ରଭାବିତ କରିବ ତାହା ସ୍ପଷ୍ଟ ହୋଇନାହିଁ ।
ସେହିଭଳି ନଭେମ୍ବର ମାସରେ ବିକଶିତ ହେଉଥିବା ବାତ୍ୟା ଓଡ଼ିଶା ଓ ଆନ୍ଧ୍ର ଉପକୂଳରେ ଲ୍ୟାଣ୍ଡଫଲ୍ କରିବାର ଯଥେଷ୍ଟ ସମ୍ଭାବନା ରହିଥାଏ । ଏହାଛଡା ନଭେମ୍ବର ପରେ ବିକଶିତ ହେଉଥିବା ବାତ୍ୟା ତାମିଲନାଡୁ ମୁହାଁ ହୋଇଥାନ୍ତି । ତେଣୁ ଏହା ଯଦି ବାତ୍ୟାର ରୂପ ନିଏ ତେବେ ଓଡ଼ିଶା କିମ୍ବା ଆନ୍ଧ୍ରପ୍ରଦେଶର ଉପକୂଳ ଛୁଇଁପାରେ ।
ଓଡିଶା ପ୍ରତି ବାତ୍ୟାର ଆଶଙ୍କା ଥିଲେ ବି ଏହା ସ୍ପଷ୍ଟ ହୋଇନାହିଁ ବୋଲି କନକ ନ୍ୟୁଜକୁ ସୂଚନା ଦେଇଛନ୍ତି ଭାରତୀୟ ପାଣିପାଗ କେନ୍ଦ୍ରର ନିର୍ଦ୍ଦେଶକ ମୃତ୍ୟୁଞ୍ଜୟ ମହାପାତ୍ର । ଏପରିକି ବାତ୍ୟା ହେବ କି ନାହିଁ ସେନେଇ ୫୦-୫୦ ପ୍ରତିଶତ ସମ୍ଭାବନା ରହିଛି । କିନ୍ତୁ ଆଗକୁ ସମୁଦ୍ର ଅଶାନ୍ତ ରହିବାର ଆଶଙ୍କା ରହିଛି ତେଣୁ ମତ୍ସ୍ୟଜୀବୀ ମାନଙ୍କୁ ସମୁଦ୍ର ମଧ୍ୟକୁ ନ ଯିବାକୁ ପରାମର୍ଶ ଦେଇଛନ୍ତି ଆଇଏମଡି ଡିଜି ।