ଏଟିଏମରୁ ଚିରା ଫଟା ନୋଟ ବାହାରିଲେ ଚିନ୍ତା କରିବାର କିଛି ନାହଁ । ତୁରନ୍ତ ବ୍ୟାଙ୍କକୁ ଯାଇ ଏଭଳି ପ୍ରକ୍ରିୟାରେ କରନ୍ତୁ ଆବେଦନ । ବ୍ୟାଙ୍କ ତୁରନ୍ତ ବଦଳାଇବ ଆପଣଙ୍କ ନୋଟ
କନକ ବ୍ୟୁରୋ : ଆଜିର ସମୟରେ ନଗଦ ଟଙ୍କାର ଆବଶ୍ୟକତା ପଡିଲେ ଲୋକମାନେ ତୁରନ୍ତ ଏଟିଏମ ଯାଇ ନିଜର ଆବଶ୍ୟକ ମୁତାବକ ଟଙ୍କା ବାହାର କରିଥାନ୍ତି । ମାତ୍ର ବେଳେ ବେଳେ ଏମିତି ହୋଇଥାଏ କି ଏଟିଏମରୁ ବାହାରିଥିବା ନୋଟ ମଧ୍ୟରୁ କିଛି ଚିରା ଫଟା ନୋଟ ଥାଏ । ଏହାକୁ ନେଇ ଲୋକମାନେ ଚିନ୍ତାବ୍ୟକ୍ତ କରିଥାନ୍ତି । କାରଣ ଏହି ଚିରା ଫଟା ନୋଟ ବଜାରରେ ଚଳି ନଥାଏ । ହେଲେ ଏନେଇ କଣ କରିଲେ ଆପଣ ଆପଣଙ୍କ ନୋଟ ବଦଳାଇ ପାରିବେ ।
Kanak News is now on WhatsApp
Join and get latest news updates delivered to you via WhatsApp
ଯଦି ଏଟିଏମରୁ ବାହାର କରିଥିବା ଟଙ୍କା ଭିତରୁ କିଛି ଚିରା ଫଟା ନୋଟ ଥାଏ, ତାହାଲେ ଚିନ୍ତା କରିବାର କିଛି ନାହିଁ । ଏହି ନୋଟକୁ ଆପଣ ସହଜରେ ବଦଳାଇପାରିବେ । ଭାରତୀୟ ରିଜର୍ଭ ବ୍ୟାଙ୍କ ନିୟମ ମୁତାବକ ଏହି ଚିରା ଫଟା ନୋଟକୁ ବଦଳାଇବାକୁ କୌଣସି ବ୍ୟାଙ୍କ ମନାକରିପାରିବ ନାହିଁ । ଏଥିପାଇଁ ଅଧିକ ସମୟର ଆବଶ୍ୟକତା ନାହିଁ । କିଛି ମିନିଟ୍ ମଧ୍ୟରେ ବଦଳାଇପାରିବେ ଏହି ନୋଟ ।
ଏଟିଏମରୁ ବାହାରି ଥିବା ଚିରା ଫଟା ନୋଟକୁ ଆପଣ ସେହି ବ୍ୟାଙ୍କକୁ ନେଇକି ଯାଆନ୍ତୁ, ସେହି ଏଟିଏମ ସହିତ ଯେଉଁ ବ୍ୟାଙ୍କର ଲିଙ୍କ୍ ଥିବ । ସେଠାରେ ପହଂଚି ଆପଣ ଏକ ଦରଖାସ୍ତ ଲେଖନ୍ତୁ । ଏହି ଦରଖାସ୍ତରେ ଆପଣ ଏଟିଏମରୁ କେଉଁ ତାରିଖରେ ଟଙ୍କା ବାହାର କରିଛନ୍ତି । ଟଙ୍କା ବାହାର କରିବାର ସମୟ ଓ ଏଟିଏମଟି କେଉଁ ସ୍ଥାନରେ ଅବସ୍ଥିତ ତାହା ଉଲ୍ଲେଖ କରନ୍ତୁ । ଏହି ଦରଖାସ୍ତ ସହ ଟଙ୍କା ଉଠାଣ ବେଳେ ଏଟିଏମରୁ ବାହାରିଥିବା ସ୍ଲିପକୁ ସଲଗ୍ନ କରନ୍ତୁ । ଯଦି ସ୍ଲିପ୍ ମିଳିନାହିଁ ତେବେ ମୋବାଇଲକୁ ଆସିଥିବା ମେସେଜର ସୂଚନା ଦେବାକୁ ହେବ । ଏହା ଆପଣ ବ୍ୟାଙ୍କ ଶାଖାରେ ଜମା କରିବାର କିଛି ସମୟ ମଧ୍ୟରେ ବ୍ୟାଙ୍କ ଆପଣଙ୍କ ଚିରା ଫଟା ନୋଟ ବଦଳାଇ ଭଲ ନୋଟ ଦେଇଦେବ ।
କହିରଖୁ କି ୨୦୧୭ ଏପ୍ରିଲ ମାସରେ ଭାରତୀୟ ରିଜର୍ଭ ବ୍ୟାଙ୍କ ଏକ ଗାଇଡଲାଇନ ଜାରି କରିଥିଲେ । ଏଥିରେ କୁହାଯାଇଥିଲା କି ସମସ୍ତ ବ୍ୟାଙ୍କ ଚିରା ଫଟା ନୋଟ ବଦଳାଇବାକୁ ବାଧ୍ୟ । ଏହାସହ ଯଦି ଆପଣଙ୍କ ବ୍ୟାଙ୍କ ଏହାକୁ ବଦଳାଇବାକୁ ମନାକରେ ତେବେ ବ୍ୟାଙ୍କ ଉପରେ ୧୦ ହଜାର ଟଙ୍କାର ଜରିମାନା ଲାଗିବ ବୋଲି ରିଜର୍ଭ ବ୍ୟାଙ୍କ ତାଙ୍କ ଗାଇଡ ଲାଇନରେ କହିଛନ୍ତି ।