ଆଇସିସି ପକ୍ଷରୁ ଆୟୋଜିତ ହେଲା ସ୍ୱାସ୍ଥ୍ୟ ସମ୍ମିଳନୀ । ମୁଖ୍ୟ ଅତିଥି ଭାବେ ଯୋଗଦେଲେ ଅନୁ ଗର୍ଗ

କନକ ବ୍ୟୁରୋ : ଇଣ୍ଡିଆନ ଚାମ୍ବର ଅଫ୍ କମର୍ସ, ସ୍ବାସ୍ଥ୍ୟ ଏବଂ ପରିବାର କଲ୍ୟାଣ ବିଭାଗ, ଓଡିଶା ସରକାର ଏବଂ ସ୍ୱାସ୍ଥ୍ୟ ସେବା ପ୍ରଦାନକାରୀ ସଂଘର ମିଳିତ ସହଯୋଗରେ ଚତୁର୍ଥ ସ୍ବାସ୍ଥ୍ୟ ସମ୍ମିଳନୀ ଅନୁଷ୍ଠିତ ହୋଇଯାଇଛି । ଆଇସିସି ଓଡିଶା ର ଅଧ୍ୟକ୍ଷ ଜେ ବି ପାଣିଙ୍କ ଅଧ୍ୟକ୍ଷତାରେ ଆୟୋଜିତ ଏହି କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ଯୋଗଦେଇ ଉନ୍ନୟନ କମିସନର ତଥା ଜଳ ସଂପଦ ବିଭାଗର ଅତିରିକ୍ତ ସଚିବ ଅନୁ ଗର୍ଗ କହିଥିଲେ ଯେ ସ୍ବାସ୍ଥ୍ୟ ଆମ ପାଇ ଗୁରୁତ୍ୱପୂର୍ଣ୍ଣ । ବିଗତ ଦିନରେ ବଜେଟ୍ ୩୦୦ କୋଟି ଥିବା ବେଳେ ବର୍ତମାନ ଏହାକୁ ୧୫୦୦ କୋଟିକୁ ବୃଦ୍ଧି କରାଯାଇଛି । ରାଜ୍ୟର ସ୍ବାସ୍ଥ୍ୟସେବାରେ ଉନ୍ନତିକରଣ ଯୋଗୁ ମ୍ୟାଲେରିଆ ଓ ଟ୍ୟୁବକଲେସିସ୍ ନିରାକରଣରେ ଉଲ୍ଲେଖନୀୟ ସଫଳତା ହାସଲ କରିଛି । ସ୍ବତନ୍ତ୍ର ଏୟାର ସେବା ଦ୍ବାରା ଡାକ୍ଟରୀ ସେବାକୁ ତୃଣମୂଳ ସ୍ତରରେ ପହଞ୍ଚାଇବା ନିମନ୍ତେ ରାଜ୍ୟ ସରକାର ତରଫରୁ ବ୍ଲୁପ୍ରିଣ୍ଟ ପ୍ରସ୍ତୁତ କରାଯାଉଛି ।

ଅନ୍ୟ ଅତିଥି ଭାବେ ଯୋଗଦେଇ ପୁଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ କହିଥିଲେ ଯେ ରାଜ୍ୟରେ ସ୍ବାସ୍ଥ୍ୟ ସେବା ପାଇଁ ବିଭିନ୍ନ ଯୋଜନା କରାଯାଉଛି । ଏହା ପୂର୍ବରୁ ମେଡିକାଲ କଲେଜ ସଂଖ୍ୟା ବୃଦ୍ଧି କରାଯାଇ ପୋଷ୍ଟ ଗ୍ରାଜୁଏସନ ବ୍ୟବଧାନକୁ ବଢାଯାଉ । ରୋଗୀ ହସ୍ପିଟାଲରେ ଆଡମିଶନ ସମୟରେ ସମ୍ପର୍କୀୟଙ୍କ ଭଲରେ କାଉନସେଲିଂ କରାଯାଉ । ଚିକିତ୍ସା ସମୟରେ ରୋଗୀ ସମ୍ପର୍କୀୟଙ୍କୁ ସମସ୍ଥ ସୂଚନା ଦିଆଯାଉ । ଯାହା ଦ୍ବାରା ହସ୍ପିଟାଲରେ ବହୁ ମାତ୍ରାରେ ଗଣ୍ଡଗୋଳ କମିପାରିବ । କଳିଙ୍ଗ ହସ୍ପିଟାଲର ପରିଚାଳନା ନିର୍ଦ୍ଦେଶକ ତଥା ଏଏଚପିଆଇ ଓଡିଶା ଚାପ୍ଟର ସମ୍ପାଦକ ନୀଳାଞ୍ଜନା ମୁଖାର୍ଜୀ କହିଛନ୍ତି ରାଜ୍ୟରେ ହେଲଥ୍ କେୟାର ଓ ହସ୍ପିଟାଲ ସଂଖ୍ୟା ବଢୁଛି । ସେହି ସ୍ଥାନରେ ପ୍ରଦୂଷଣ ବୋର୍ଡ, ଅଗ୍ନି ନିରାପତ୍ତା ଓ ସିଙ୍ଗଲ ଓ୍ବିଣ୍ଡୋ ସିଷ୍ଟମ ସଂଖ୍ୟା ବୃଦ୍ଧି କରିଯାଉ । "ଅବିଶ୍ୱାସନୀୟ ଭାରତ ପାଇଁ ସ୍ୱାସ୍ଥ୍ୟସେବା" ମୁଖ୍ୟ ବିଷୟବସ୍ତୁକୁ ନେଇ ଏହି ସମ୍ମିଳନୀ ଆୟୋଜନ କରାଯାଇଥିଲା ।

ଏଥିରେ ୪ଟି ଟେକନିକାଲ ଅଧିବେଶନ ଅନୁଷ୍ଠିତ ହୋଇଥିଲା । ସ୍ୱାସ୍ଥ୍ୟସେବା ପ୍ରଫେସନାଲ ଏବଂ ଆଇନଗତ ଅଦ୍ୟତନ ବିରୋଧରେ ହିଂସା, ସ୍ୱାସ୍ଥ୍ୟସେବାରେ ଗୁଣବତ୍ତା ଏବଂ ପରିମାଣକୁ ସନ୍ତୁଳନ କରିବା ପାଇଁ ଦକ୍ଷତା ବିକାଶ, କର୍ମଶାଳା ପରିଚାଳନା ଭାରତୀୟ ସ୍ୱାସ୍ଥ୍ୟସେବା ଏବଂ ଦୃଢ ସ୍ୱାସ୍ଥ୍ୟସେବା ଭିତ୍ତିଭୂମି ନିର୍ମାଣରେ ନୀତି ଏବଂ ନିୟମାବଳୀ, ମେସିନ୍ ଲର୍ନିଂ ଓ ଆର୍ଟିଫିସିଆଲ୍ ଇଣ୍ଟେଲିଜେନ୍ସରୁ ସ୍ୱାସ୍ଥ୍ୟସେବା କ’ଣ ଇଚ୍ଛା କରେ ଏନେଇ ଆଲୋଚନାଚକ୍ରର ବିଷୟବସ୍ତୁ ରଖାଯାଇଥିଲା । ଏହି ଚାରୋଟି ଅଧିବେଶନରେ ଆଜିର ସମୟରେ ସ୍ୱାସ୍ଥ୍ୟସେବାରେ ସମ୍ମୁଖୀନ ହେଉଥିବା ଗୁରୁତ୍ବ ପୂର୍ଣ୍ଣ ସମସ୍ୟାର ସମାଧାନ ପାଇଁ ଆଲୋଚନା ହୋଇଥିଲା। ଗ୍ରାମୀଣ କୋଣରେ ପ୍ରାଥମିକ ସ୍ୱାସ୍ଥ୍ୟସେବା ଭିତ୍ତିଭୂମିକୁ ବୃଦ୍ଧି କରିବା ଠାରୁ ଆରମ୍ଭ କରି ଡିଜିଟାଲ୍ ଟେକ୍ନୋଲୋଜି ସ୍ବାସ୍ଥ୍ୟ ପ୍ରଯୁକ୍ତିବିଦ୍ୟାର ଶକ୍ତି ବ୍ୟବହାର କରିବା, ଅଣ-ସଂକ୍ରମଣ ରୋଗର ବିକାଶର ଭାରକୁ ଦୂର କରିବା ଠାରୁ ଆରମ୍ଭ କରି ଗୁଣାତ୍ମକ ଚିକିତ୍ସାର ସମାନ ସୁବିଧା ସୁନିଶ୍ଚିତ କରିବା ପର୍ଯ୍ୟନ୍ତ, ବିଚାର ବିମର୍ଶ କରିଯାଇଥିଲା ।

କାର୍ଯ୍ୟକ୍ରମରେ ଓଡ଼ିଶା ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ବିଭାଗର ଅତିରିକ୍ତ ନିର୍ଦ୍ଦେଶକ ଡଃ. ବିଷ୍ଣୁ ପ୍ରସାଦ ମହାପାତ୍ର, ଏଏଚପିଆଇ ମହା ନିର୍ଦ୍ଦେଶକ ଡ.ଗିର୍ଧର ଜେ ଜ୍ଞାନି, ଏଏଚପିଆଇ ଓଡିଶା ଚାପ୍ଟର ସଭାପତି ଡ.ଦୀପକ ମିତ୍ର , ଆଇସିସି ଓଡିଶା ଡେପୁଟି ଡାଇରେକ୍ଟର ତଥା ଆଞ୍ଚଳିକ ମୁଖ୍ୟ ଜ୍ୟୋତିପ୍ରକାଶ ପାଲ ଯୋଗଦେଇ ସ୍ବାସ୍ଥ୍ୟ ସେବାର ବିଭିନ୍ନ ଦିଗ ଉପରେ ଆଲୋଚନା କରିଥିଲେ।