ଯଦି ବିଶ୍ୱ ଟେଷ୍ଟ ଚାମ୍ପିୟନସିପ ଫାଇନାଲ ମୁକାବିଲା ଡ୍ର ହୁଏ, ତେବେ କାହାକୁ ମିଳିବ ଫାଇନାଲ ଟ୍ରଫି । ଆଇସିସି ଦେଲା ବଡ ସୂଚନା ।
କନକ ବ୍ୟୁରୋ : ଇଂଲଣ୍ଡରେ ଆସନ୍ତା ଜୁନ୍ ୧୮ରୁ ୨୨ ମଧ୍ୟରେ ବିଶ୍ୱ ଟେଷ୍ଟ ଚାମ୍ପିୟନସିପ୍ ଫାଇନାଲ ମୁକାବିଲା ଖେଳାଯିବ । ମୁହାଁମୁହିଁ ହେବେ ଭାରତ ଓ ନ୍ୟୁଜିଲାଣ୍ଡ । ତେବେ ଟେଷ୍ଟ ମ୍ୟାଚରେ ଅଧିକତମ ମ୍ୟାଚ୍ ଡ୍ର ହେଉଥିବାରୁ ଏହି ଫାଇନାଲ ମ୍ୟାଚର ବିଜେତା କିଭଳି ବଛାଯିବ ତାହାକୁ ନେଇ ଦର୍ଶକଙ୍କ ମନରେ ଦ୍ୱନ୍ଦ୍ୱ ରହିଛି । ଯାହାକୁ ଦୂର କରିଛି ଆଇସିସି । ଶୁକ୍ରବାର ଆଇସିସି ଫାଇନାଲ ମ୍ୟାଚର ଫଳାଫଳ ବାବଦରେ ସ୍ପଷ୍ଟ ସୂଚନା ଜାରି କରିଛି ।
Kanak News is now on WhatsApp
Join and get latest news updates delivered to you via WhatsApp
ବିଶ୍ୱ ଟେଷ୍ଟ ଚାମ୍ପିୟନସିପର ଫାଇନାଲ ମ୍ୟାଚକୁ ନେଇ ଆଇସିସି କହିଛି, ଯଦି ଫାଇନାଲ ମ୍ୟାଚ୍ ଡ୍ର ବା ଅମୀମାଂସିତ ରୁହେ ତେବେ ଉଭୟ ଟିମ୍ ଯୁଗ୍ମ ବିଜେତା ଭାବେ ଘୋଷଣା କରାଯିବ । ଯୁଗ୍ମ ବିଜେତା ଭାବେ ଉଭୟ ଟିମ ଫାଇନାଲ ଟ୍ରଫି ହାତେଇବେ । ଏପରିକି ଫାଇନାଲ ମୁକାବିଲା ପାଇଁ ଜୁନ୍ ୨୩କୁ ରିଜର୍ଭ ଡେ ରଖାଯାଇଛି । ରିଜର୍ଭ ଡେର ବ୍ୟବହାର ସେତେବେଳେ କରାଯିବ ଯଦି ପ୍ରଥମ ୫ ଦିନ ମଧ୍ୟରେ ୩୦ ଘଣ୍ଟାରୁ ଅଧିକ ସମୟ ଖେଳ ହୋଇପାରିନଥିବ ।
ମ୍ୟାଚ୍ ମଝିରେ ଜାଣିଶୁଣି ସମୟ ନଷ୍ଟ କରାଗଲେ ଆଇସିସି ରେଫରୀଙ୍କ ପକ୍ଷରୁ ଟିମକୁ ରିଜର୍ଭ ଡେ ବ୍ୟବହାର କେଉଁ ସମୟରେ କରାଯିବ ସେ ବାବଦରେ ଅବଗତ କରିବେ । ରିଜର୍ଭ ଡେର ବ୍ୟବହାର ହେବ କି ନାହିଁ ତାହା ମ୍ୟାଚର ଅନ୍ତିମ ଦିନ ଖେଳ ଆରମ୍ଭରୁ ଗୋଟିଏ ଘଣ୍ଟା ପୂର୍ବରୁ ଘୋଷଣା କରାଯିବ ।
ଆଇସିସି ବିଶ୍ୱ ଟେଷ୍ଟ ଚାମ୍ପିୟନସିପ୍ ପାଇଁ ନ୍ୟୁଜିଲାଣ୍ଡ ଦଳ ପୂର୍ବରୁ ଇଂଲଣ୍ଡରେ ପହଞ୍ଚି ସାରିଥିବା ବେଳେ ଭାରତ ଆସନ୍ତା ଜୁନ୍ ୨ରେ ଇଂଲଣ୍ଡ ଗସ୍ତ କରିବ ।