ପୂର୍ତ୍ତ ସଚିବଙ୍କ ‘ପଲିଟିକ୍ସ’ ପୋଷ୍ଟର । ୨୦୧୯ରେ ବିଜେଡି ଟିକେଟରେ ଆସିବେ କି ମୈଦାନକୁ?
ଅପରାଜିତା ଷଡଙ୍ଗୀ ଚାକିରୀରୁ ଅବସର ନେଇ ବିଜେପିରେ ଯୋଗ ଦେଇଥିବା ବେଳେ ପୂର୍ବତନ ଏଜି ଅମର ପଟ୍ଟନାୟକ ଓ ପୂର୍ବତନ ଆଇପିଏସ ଅରୂପ ପଟ୍ଟନାୟକ ବିଜେଡି କ୍ୟାମ୍ପ ଯାଇଥିବା ବେଳେ ପୂର୍ବତନ ଆଇଏଏସ ଅଶୋକ ତ୍ରିପାଠୀ ବିଜେପି ଶିବିରରେ ଯୋଗ ଦେଇଥିଲେ । ଆଉ ଏବେ ପାଳି ନଳିନୀ ପ୍ରଧାନଙ୍କର?
ରାଜନୀତିକୁ ଆସିବାକୁ ମନ ବଳାଇଲେଣି ପୂର୍ତ୍ତ ସଚିବ ନଳିନୀ ପ୍ରଧାନ । ରେଢାଖୋଲରେ ବିକାଶ ସମାବେଶ ନାଁରେ ଲାଗିଥିବା କିଛି ପୋଷ୍ଟର ଏବେ ଆସିଛି ଚର୍ଚ୍ଚାର ଘେରକୁ । ଯେଉଁଥିରେ ସରକାରୀ ଅଧିକାରୀଙ୍କ ଫଟୋ ଅନେକଙ୍କୁ ତାଜୁବ କରିଦେଇଛି । ନୂଆବର୍ଷର ଅଭିନନ୍ଦନ ନାଁରେ ନେତାଙ୍କର ପତିଆରା ଦେଖାଇବାର ଯେଉଁ ଅବକାଶ ସୃଷ୍ଟି ହୋଇଛି, ତାକୁ ବିଲକୁଲ ହାତଛଡା କରିବାକୁ ବୋଧହୁଏ ଚାହୁଁନାହାନ୍ତି ପୂର୍ତ୍ତ ସଚିବ ।
Kanak News is now on WhatsApp
Join and get latest news updates delivered to you via WhatsApp
ଲାଗିଥିବା ପୋଷ୍ଟରରେ ଗତ ୨୮ ତାରିଖରେ ରେଢାଖୋଲର କଦମ୍ବ ପଡିଆରେ ଆୟୋଜିତ ହୋଇଥିବା ବିକାଶ ସମାବେଶ ବାବଦରେ ଉଲ୍ଲେଖ ରହିଛି । ଏଥିରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ମନ୍ତ୍ରୀ ପ୍ରଫୁଲ୍ଲ ମଲ୍ଲିକ, ସମ୍ବଲପୁର ସାଂସଦ ନଗେନ୍ଦ୍ର ପ୍ରଧାନ, ସାଂସଦ ତଥା ସମ୍ବଲପୁର ପର୍ଯ୍ୟବେକ୍ଷକ ପ୍ରତାପ କେଶରୀ ଦେବ, ରେଢାଖୋଲ ବିଧାୟକ ରୋହିତ ପୂଜାରୀଙ୍କ ସହ ସଚିବ ନଳିନୀ କାନ୍ତ ପ୍ରଧାନଙ୍କ ଫଟୋ ରହିଛି । ଯାହା ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।
ଅନୁମାନ କରାଯାଉଛି, ସମ୍ବଲପୁର ଲୋକସଭା ଆସନ ଅନ୍ତର୍ଗତ କୈାଣସି ବିଧାନସଭା ଆସନ ଉପରେ ରହିଛି ନଳିନୀ ପ୍ରଧାନଙ୍କ ନଜର । ଆଉ ଏହାକୁ ବାସ୍ତବତାର ରୂପ ଦେବାକୁ ଭିତରେ ଭିତରେ ସଚିବ ଉଦ୍ୟମ କରୁଥିବା କଥା କୁହାଯାଉଛି । ହେଲେ ସରକାରୀ ପଦ ପଦବୀରେ ଥାଇ ରାଜନୀତିର ପୋଷ୍ଟର ୱାରରେ ସାମିଲ ହେବା ଏକ ବଡ ବିତର୍କ ସୃଷ୍ଟି କରିଛି ।
ଏମିତିରେ ମଧ୍ୟ ପାୱାର କରିଡରରେ ନଳିନୀ ପ୍ରଧାନଙ୍କ ଲବି ଖୁବ ଶକ୍ତିଶାଳୀ ରହିଛି । ବାରମ୍ବାର ନିଜ ବିଭାଗରେ ଅଘଟଣ ଘଟୁଥିଲେ ମଧ୍ୟ ସରକାର ତାଙ୍କ ଉପରେ କୈାଣସି କାର୍ଯ୍ୟାନୁଷ୍ଠାନ ଗ୍ରହଣ କରୁନଥିଲେ । ଏପରିକି ତାଙ୍କ କାର୍ଯ୍ୟକାଳକୁ ବଢାଇ ମଧ୍ୟ ଦିଆଯାଇଥିଲା । ଯାହା ସଚିବାଳୟର ପାୱାର କରିଡରରେ ବେଶ ଚର୍ଚ୍ଚାର ବିଷୟ ପାଲଟିଥିଲା । ଦଳୀୟ ପାଣ୍ଠି ଯୋଗାଡ ପାଇଁ ସଚିବଙ୍କୁ ବ୍ୟବହାର କରାଯାଉଥିବା ଅତୀତତରେ ବିରୋଧୀ ଅଭିଯୋଗ ଆଣିଥିଲେ । ହେଲେ ଏହାରି ଭିତରେ ସଚିବଙ୍କ ରାଜନୈତିକ ଅଭିଳାଷା ମଧ୍ୟ ସାମ୍ନାକୁ ଆସିଛି ।
୨୦୧୯ ସାଧାରଣ ନିର୍ବାଚନ ବେଳକୁ ଚାକିରୀରୁ ଇସ୍ତଫା ଦେଇ ନିର୍ବାଚନୀ ମୈଦାନକୁ କେଉଁ ଆସନରୁ ନଳିନୀ ପ୍ରଧାନ ଓହ୍ଲାଇବେ ଏବେ ତାଉପରେ ସମସ୍ତଙ୍କ ନଜର । ତେବେ ଲାଗିଥିବା ପୋଷ୍ଟର ସଚିବଙ୍କ ଜାଣତରେ ହୋଇଛି ନା ତାଙ୍କ ଅଜାଣତରେ ତାଙ୍କୁ ବଦନାମ କରିବାକୁ ଉଦ୍ୟମ କରାଯାଇଛି, ତାହା ଏବେ ଚର୍ଚ୍ଚାର ବିଷୟ ପାଲଟିଛି । ତେବେ ଏନେଇ ସଚିବ ନଳିନୀ ପ୍ରଧାନଙ୍କ ପ୍ରତିକ୍ରିୟା ମିଳିପାରିନାହିଁ ।