କନକ ବ୍ୟୁରୋ: “ବିଶ୍ୱକପରେ ଭାରତରେ ରୋହିତ-ରାହୁଲ ଯୋଡି ସହ ପଡିଆକୁ ଓହ୍ଲାଇବ । ମୁଁ ୩ ନମ୍ବରରେ ବ୍ୟାଟିଂ କରିବି । ବର୍ତ୍ତମାନ ସମୟରେ ଏହି ଗୋଟିଏ ଖବର ହିଁ ମୁଁ ଆପଣଙ୍କୁ ଦେଇପାରିବି’’, ସୋମବାର ଇଂଲଣ୍ଡ ବିପକ୍ଷ ୱାର୍ମଅପ୍ ମ୍ୟାଚ୍ ସମୟରେ ଦଳର ବ୍ୟାଟିଂ ଲାଇନ୍ ଅପକୁ ନେଇ କିଛି ଏପରି କହିଛନ୍ତି ଟିମ୍ ଇଣ୍ଡିଆ ଅଧିନାୟକ ବିରାଟ କୋହଲି ।
Kanak News is now on WhatsApp
Join and get latest news updates delivered to you via WhatsApp
ଆସନ୍ତା ଅକ୍ଟୋବର ୨୪ ତାରିଖରେ ଟିମ୍ ଇଣ୍ଡିଆ ପାକିସ୍ତାନ ବିପକ୍ଷ ମ୍ୟାଚ ଖେଳି ବିଶ୍ୱକପ୍ ଅଭିଯାନ ଆରମ୍ଭ କରିବ । ଏହାପୂର୍ବରୁ ଦଳ ଆଜି ଇଂଲଣ୍ଡ ବିପକ୍ଷରେ ନିଜର ପ୍ରଥମ ଅଭ୍ୟାସ ମ୍ୟାଚ୍ ଖେଳୁଛି । ଏହି ମ୍ୟାଚର ଟସ୍ ସମୟରେ ଯେତେବେଳେ କୋହଲିଙ୍କୁ ଦଳର ବ୍ୟାଟିଂ ଲାଇନ୍ ଅପ ନେଇ ପ୍ରଶ୍ନ କରାଯାଇଥିଲା, ସେତେବେଳେ କୋହଲି କିଛି ଏଭଳି ଢଙ୍ଗରେ ଉତ୍ତର ରଖିଥିଲେ । ଖାଲି ସେତିକି ନୁହେଁ; କୋହଲି ଆହୁରି ମଧ୍ୟ କହିଥିଲେ, “ରୋହିତ ଜଣେ ବିଶ୍ୱସ୍ତରୀୟ ଖେଳାଳି, ପ୍ରଥମରୁ ସେ ମଜଭୁତ୍ ଆରମ୍ଭ ଦେବେ । ମୁଁ ୩ ନମ୍ବରରେ ବ୍ୟାଟିଂ କରିବି । କିନ୍ତୁ ରୋହିତଙ୍କ ସହିତ ରାହୁଲଙ୍କ ନାଁ ହିଁ ଓପନିଂ ପାଇଁ ବିଚାର କରାଯାଇପାରିବ ।”
ସୂଚନାଯୋଗ୍ୟ ଯେ, ସର୍ବାଧିକ ୩୦ଟି ଛକା ସହିତ ରାହୁଲ ଚଳିତ ଆଇପିଏଲରେ ମୋଟ ୬୨୮ ରନ୍ କରିଛନ୍ତି । ଯାହାକି ଚଳିତ ଆଇପିଏଲରେ ତୃତୀୟ ସର୍ବାଧିକ ବ୍ୟକ୍ତିଗତ ସ୍କୋର । ତେଣୁ ଟିମ୍ ଇଣ୍ଡିଆରେ ସେ ହିଁ ରୋହିତଙ୍କ ସହିତ ଓପନିଂ ଦାୟିତ୍ୱ ତୁଲାଇବେ ବୋଲି କୋହଲି ସୂଚନା ଦେଇଛନ୍ତି । ଅନ୍ୟପଟେ ଦଳକୁ ଅତୀତରେ ସଫଳତା ମିଳିଛି । ତେଣୁ ଏବେ ଆମେ ଜୋଶରେ ଅଛୁ । ବିଶେଷକରି ଫିଲଡିଂ ଉପରେ ଗୁରୁତ୍ୱ ଦେଉଛୁ । ଆଇପିଏଲ୍ ସମୟରେ ସମସ୍ତେ ଅଲଗା ଅଲଗା ହୋଇ ଖେଳୁଥିଲେ, ହେଲେ ଏବେ ଆମେ ୧୧ ଜଣ ସାଙ୍ଗ ହୋଇ ଖେଳୁଛୁ । ଭାରତୀୟ କ୍ରିକେଟ୍ ସମସ୍ତଙ୍କ ପାଇଁ ପ୍ରାଥମିକତା ବୋଲି କୋହଲି କହିଛନ୍ତି ।
ସୂଚନାଯୋଗ୍ୟ ଯେ, ଚଳିତ ବିଶ୍ୱକପ୍ କୋହଲିଙ୍କ ପାଇଁ ବେଶ ଗୁରୁତ୍ୱପୂର୍ଣ୍ଣ । ଏହି ବିଶ୍ୱକପ୍ ପରେ ସେ ଟି-୨୦ରେ ଆଉ ଦଳର ନେତୃତ୍ୱ ନେବେ ନାହିଁ । ତେଣୁ ଏହି ଶେଷ ଟୁର୍ଣ୍ଣାମେଣ୍ଟରେ ସେ ଦଳକୁ ବିଶ୍ୱବିଜୟୀ କରିବାକୁ ଲକ୍ଷ୍ୟ ରଖିଛନ୍ତି । ଅନ୍ୟପଟେ ମହେନ୍ଦ୍ର ସିଂହ ଧୋନୀ ମଧ୍ୟ ଦଳର ମେଣ୍ଟର ଭାବେ ନୂଆ କରି ଦାୟିତ୍ୱ ପାଇଛନ୍ତି । ତେଣୁ ଚଳିତ ବିଶ୍ୱକପରେ ଟିମ୍ ଇଣ୍ଡିଆକୁ ବିଶ୍ୱକପ୍ ବିଜୟୀ କରିବାକୁ କୋହଲି ଲକ୍ଷ୍ୟ ରଖିଛନ୍ତି ।