କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ପାଖରେ ନାହିଁ ଟଙ୍କା । ଲୋକସଭା ନିର୍ବାଚନ ପାଇଁ ଟିକେଟ୍ ଅଫର ହୋଇଥିଲେ ମଧ୍ୟ ଲଢିବେ ନାହିଁ ବୋଲି କଲେ ସ୍ପଷ୍ଟ
କନକ ବ୍ୟୁରୋ : ଚଳିତ ନିର୍ବାଚନରେ ଅନେକ ରାଜ୍ୟସଭା ସାଂସଦଙ୍କୁ ପ୍ରାର୍ଥୀ କରିଛି ବିଜେପି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ପୀୟୁଷ ଗୋଏଲ, ଭୂପେନ୍ଦ୍ର ଯାଦବ, ରାଜୀବ ଚନ୍ଦ୍ରଶେଖର ଏବଂ ଜ୍ୟୋର୍ତିାଦିତ୍ୟ ସିନ୍ଧିଆ ପ୍ରମୁଖ ଲୋକସଭା ପ୍ରାର୍ଥୀ ହୋଇଛନ୍ତି । କିନ୍ତୁ ମୋଦୀ ସରକାରର ଅର୍ଥମନ୍ତ୍ରୀ ନିର୍ମଳା ସୀତାରମଣ ନିର୍ବାଚନ ଲଢିବା ପ୍ରସ୍ତାବକୁ ଖାରଜ କରିଦେଇଛନ୍ତି । ଯାହାକୁ ନେଇ ନାନା ଚର୍ଚ୍ଚା । ଦଳ ତାଙ୍କୁ ଆନ୍ଧ୍ରପ୍ରଦେଶ ଏବଂ ତାମିଲନାଡୁରୁ ଲୋକସଭା ଟିକେଟ୍ ଦେବ ବୋଲି କହିଥିଲା । କିନ୍ତୁ ସୀତାରମଣ ଏହି ପ୍ରସ୍ତାବକୁ ଅଗ୍ରାହ୍ୟ କରିଛନ୍ତି ବୋଲି କହିଛନ୍ତି । ତାଙ୍କ ପାଖରେ ନିର୍ବାଚନ ଲଢିବାକୁ ଆବଶ୍ୟକ ପଇସା ନାହିଁ । ତେଣୁ ସେ ଅଗ୍ରାହ୍ୟ କରିଛନ୍ତି ବୋଲି ସ୍ପଷ୍ଟ କରିଛନ୍ତି । ଦେଶର ସେ ଅର୍ଥମନ୍ତ୍ରୀ । ବଜେଟଠୁ ଆରମ୍ଭ କରି ଅନେକ କ୍ଷେତ୍ରରେ ତାଙ୍କର ରହିଛି ନିୟନ୍ତ୍ରଣ । ଆଉ ଏକ ବଡ଼ କଥା ହେଲା ଦେଶର ସବୁଠୁ ବଡ ରାଜନୈତିକ ଦଳର ସଦସ୍ୟ । ଏବଂ ନିର୍ବାଚନୀ ବଣ୍ଡ ଜରିଆରେ ସର୍ବାଧିକ ଚାନ୍ଦା ପାଇଥିବା ଦଳ । ସାରା ଦେଶରେ ବିଜେପି ପଦ୍ମ ଫୁଟାଇବ ବୋଲି ଦମ୍ବୋକ୍ତି ପ୍ରକାଶ କରିଛି । ଏବଂ ଦୁଇ ତୃତୀୟାଂଶ ଆସନ ଜିତିବ ବୋଲି ନାରା ଦେଇଛି । ଏହି ସମୟରେ ଦଳର ବରିଷ୍ଠ ନେତ୍ରୀ ତଥା ଅର୍ଥମନ୍ତ୍ରୀ ସୀତାରମଣ ନିର୍ବାଚନ ଲଢିବେ ନାହିଁ ବୋଲି କହିବା ଭିନ୍ନ ଚର୍ଚ୍ଚା ସୃଷ୍ଟି କରିଛି ।
Kanak News is now on WhatsApp
Join and get latest news updates delivered to you via WhatsApp
ନିର୍ବାଚନ ଲଢିବେ ନାହିଁ ବୋଲି ସୀତାରମଣ କହିବା ପରେ ତାଙ୍କର ସମ୍ପତି କେତେ ତାକୁ ନେଇ ଚର୍ଚ୍ଚା ହେଉଛି । ଜାତୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ନିର୍ମଳା ସୀତାରମଣଙ୍କ ମୋଟ ସମ୍ପତ୍ତି ୨ କୋଟି ୫୦ ଲକ୍ଷ ୯୯ ହଜାର ୩୯୬ ଟଙ୍କା ରହିଛି । ଏଥିରେ ଉଭୟ ସ୍ଥାବର ଓ ଅସ୍ଥାବର ସମ୍ପତ୍ତି ରହିଛି । ନିର୍ମଳା ସୀତାରମଣଙ୍କ ନିକଟରେ ୩୧୫ ଗ୍ରାମ ସୁନା ଓ ୨ କେଜି ରୁପା ରହିଛି । ନିର୍ମଳାଙ୍କ ଉପରେ ୩୦ ଲକ୍ଷ ଟଙ୍କାର ଦାୟିତ୍ୱ ରହିଛି । ନିର୍ମଳା ସୀତାରମଣଙ୍କ ପାଖରେ କାର୍ ନାହିଁ । ଏକ ବଜାଜ ଚେତକ ସ୍କୁଟର ରହିଛି । ଏହାର ମୂଲ୍ୟ ୨୮ ହଜାର ୨୦୦ ଟଙ୍କା ରହିଛି । ହାଇଦ୍ରାବାଦରେ ସୀତାରମଣଙ୍କର ପ୍ରାୟ ୧୬ ଲକ୍ଷ ଟଙ୍କା ମୂଲ୍ୟର ଏକ ଅଣକୃଷି ଜମି ରହିଛି । ଅସ୍ଥାବର ସମ୍ପତ୍ତିର ମୂଲ୍ୟ ୧ କୋଟି ୮୭ ଲକ୍ଷ ୬୦ ହଜାର ୨୦୦ ଟଙ୍କା ରହିଛି । ସୀତାରମଣଙ୍କ ନାମରେ ୩୦ ଲକ୍ଷ ଟଙ୍କାର ଋଣ ମଧ୍ୟ ରହିଛି । ରାଜ୍ୟସଭା ପାଇଁ ନିର୍ବାଚନୀ ସତ୍ୟପାଠରେ ସେ ନଗଦ ୧୭ ହଜାର ୨୦୦ ଟଙ୍କା ଘୋଷଣା କରିଥିଲେ । ଏହାବ୍ୟତୀତ ବ୍ୟାଙ୍କ ଏଫଡିରେ ୪୫ ଲକ୍ଷ ୦୪ ହଜାର ୪୭୯ ଟଙ୍କା ସୂଚନା ଦିଆଯାଇଥିଲା । ସେହିପରି ନିର୍ବାଚନ ଆୟୋଗଙ୍କ ସୂଚନା ଅନୁଯାୟୀ, ଲୋକସଭା ଓ ବିଧାନସଭା ନିର୍ବାଚନରେ ଜଣେ ପ୍ରାର୍ଥୀଙ୍କ ଖର୍ଚ୍ଚର ପରିସର ଅଲଗା ଅଲଗା । ଲୋକସଭା ନିର୍ବାଚନରେ ଜଣେ ପ୍ରାର୍ଥୀ ୯୫ ଲକ୍ଷ ଟଙ୍କା ପର୍ଯ୍ୟନ୍ତ ଖର୍ଚ୍ଚ କରିପାରିବେ । ୨୦୨୨ରେ ଏହି ପରିମାଣ ବୃଦ୍ଧି କରାଯାଇଥିଲା । ପୂର୍ବରୁ ଏହା ୭୦ ଲକ୍ଷ ଟଙ୍କା ଥିଲା । ସେହିପରି ରାଜ୍ୟ ବିଧାନସଭା ନିର୍ବାଚନ ପାଇଁ ଖର୍ଚ୍ଚ ସୀମା ୨୮ ଲକ୍ଷ ଟଙ୍କାରୁ ୪୦ ଲକ୍ଷ ଟଙ୍କାକୁ ବୃଦ୍ଧି କରାଯାଇଛି ।
ବଡକଥା ହେଉଛି ଯେଉଁ ଦୁଇ ରାଜ୍ୟରୁ ଦଳ ଟିକେଟ୍ ଦେବ ବୋଲି ପ୍ରସ୍ତାବ ଦେଇଛି । ଏହି ଦୁଇ ରାଜ୍ୟରେ ବିଜେପିର ପତିଆରା ସେଭଳି କିଛି ନାହିଁ । ଏପରି ସ୍ଥିତିରେ ନିର୍ବାଚନ ହାରିଯିବା ଆଶଙ୍କାରେ ଦଳର ଅର୍ଥମନ୍ତ୍ରୀ ଲୋକସଭା ନିର୍ବାଚନ ଲଢିବା ପ୍ରସ୍ତାବକୁ ଖାରଜ କରିଥିବା ଚର୍ଚ୍ଚା ହେଉଛି ।