ସରକାରଙ୍କ ଟାର୍ଗେଟରେ ଆମେରିକୀୟ କମ୍ପାନୀ ଟ୍ୱିଟର : ବିବାଦ ପରେ ଦେଶୀ ମାଇକ୍ରୋ ବ୍ଲଗିଂ ସାଇଟ ‘କୁ’ ବ୍ୟବହାର କରିବାକୁ ପ୍ରୋତ୍ସାହନ
ଦେଶୀ ଆପ ବ୍ୟବହାର କରିବାକୁ ପରାମର୍ଶ ଦେଲେ ମନ୍ତ୍ରୀ, ସାଂସଦ; ଆତ୍ମନିର୍ଭର ଭାରତ ପ୍ରତିଯୋଗିତାରେ ବିଜୟୀ ହୋଇଥିଲା ଦେଶୀ ଆପ ‘କୁ’
କନକ ବ୍ୟୁରୋ : କେନ୍ଦ୍ରମନ୍ତ୍ରୀ ପୀଉଷ ଗୋଏଲ ଟ୍ୱିଟ କରି ସେ ‘କୁ’ ଆପ ବ୍ୟବହାର କରୁଥିବା ଲେଖିଛନ୍ତି । ଏପରିକି ଏହି ଭାରତୀୟ ମାଇକ୍ରୋ ବ୍ଲଗିଂ ପ୍ଲାଟଫର୍ମରେ ତାଙ୍କ ସହ ଯୋଡି ହେବାକୁ ପରାମର୍ଶ ଦେଇଛନ୍ତି କେନ୍ଦ୍ରମନ୍ତ୍ରୀ । ଆମେରିକା କମ୍ପାନି ଟ୍ୱିଟର ସହିତ ବିବାଦ ପରେ କେବଳ କେନ୍ଦ୍ରମନ୍ତ୍ରୀ ପୀଉଷ ଗୋଏଲ କାହିଁକି ଏକାଧିକ ମନ୍ତ୍ରୀ ଓ ସାଂସଦ ଏହି ଦେଶୀ ଆପକୁ ବ୍ୟବହାର କରିବାକୁ ପରାମର୍ଶ ଦେଉଛନ୍ତି । ଆତ୍ମନିର୍ଭର ଭାରତ ପ୍ରତିଯୋଦିତାରେ ଏହି ଆପ ବିଜୟୀ ହୋଇଥିଲା । ତେଣୁ ସ୍ୱଦେଶୀକୁ ଗୁରୁତ୍ୱ ଦେଉଥିବା କେନ୍ଦ୍ର ସରକାର ‘କୁ’ ଆପର ବହୁଳ ବ୍ୟବହାର ପାଇଁ ପ୍ରୋତ୍ସାହିତ କରୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସୋସିଆଲ ମିଡିଆରେ ମତ ପ୍ରକାଶ କରିବା ଏବଂ ପ୍ରତିକ୍ରିୟା ରଖିବାର ଏକ ପ୍ରମୁଖ ମାଧ୍ୟମ ଟ୍ୱିଟର ପାଲଟି ସାରିଥିବାବେଳେ ଏହି ଆମେରିକୀୟ କମ୍ପାନି ଏବେ ଭାରତ ସରକାରଙ୍କ ଟାର୍ଗେଟକୁ ଚାଲିଆସିଛି । ଆଉ ଏହାରି ଭିତରେ ଟ୍ୱିଟରକୁ ଟକ୍କର ଦେଉଛି ଦେଶୀ ମାଇକ୍ରୋ ବ୍ଲଗିଂ ପ୍ଲାଟଫର୍ମ- ‘କୁ’ ଆପ୍ । ଉଭୟ ଆଣ୍ଡ୍ରଏଡ ଏବଂ ଆଇଓଏସ ପ୍ଲାଟଫର୍ମରେ ଆପଟି ରହିଛି । ଏହାର ୱେବପେଜ ମଧ୍ୟ ରହିଛି । ଭାରତ ସରକାରଙ୍କ ପକ୍ଷରୁ ୨୦୨୦ ମାର୍ଚ୍ଚରେ ହୋଇଥିବା ଆତ୍ମନିର୍ଭର ଭାରତ ଆପ ପ୍ରତିଯୋଗିତାରେ ଏହି ଆପ୍ଲିକେସନଟି ବିଜୟୀ ହୋଇଥିଲା । ସେତେବେଳେ ଏହା ଲୋକଙ୍କ ଦୃଷ୍ଟିକୁ ସେତେଟା ଆସିନଥିଲା । କିନ୍ତୁ ହଠାତ ଏହି ଆପଟି ଏବେ ଚର୍ଚ୍ଚାକୁ ଚାଲିଆସିଛି ।
ଏହି ଘରୋଇ ଆପକୁ ବହୁଳମାତ୍ରାରେ ବ୍ୟବହାର କରିବା ପାଇଁ ଏବେ ସରକାର ପ୍ରୋତ୍ସାହିତ କରୁଛନ୍ତି । ଏଥିରେ ଟ୍ୱିଟର ଭଳି ଫିଚର୍ସ ରହିଛି । ବିଭିନ୍ନ ବ୍ୟକ୍ତିଙ୍କୁ ଏଥିରେ ଫଲୋ କରାଯାଇପାରିବ । ସେହିପରି ବ୍ରାଉଜ କରାଯାଇ ପାରିବ । ମେସେଜକୁ ଅକ୍ଷରରେ କିମ୍ବା ଅଡିଓ, ଭିଡିଓ ମାଧ୍ୟମରେ ପଠାଇ ହେବ । ଇଂରାଜୀ ସମେତ ୬ଟି ଭାରତୀୟ ଭାଷାର ବିକଳ୍ପ ମଧ୍ୟ ଏହି ଦେଶୀ ଆପରେ ରହିଛି । ‘କୁ’ ଆପକୁ ୩୦ ଲକ୍ଷ ଥର ଡାଉନଲୋଡ କରାଯାଇ ସାରିଥିବା ଜଣାପଡିଛି ।