ଶାଶୁଘର ଆଗରେ ବୋହୂର ଧାରଣା । ସ୍ୱାମୀ ଓ ପରିବାର ସହ ଶାଶୁଘରେ ରହିବା ପାଇଁ ଦାବି କଲେ ବିଦୁସ୍ମିତା ।
ସ୍ତ୍ରୀ ବାପାଘରେ ଥିବା ବେଳେ ସ୍ୱାମୀଙ୍କ ଦ୍ୱିତୀୟ ବିବାହ ପାଇଁ ଯୋଜନା ଚାଲିଥିବା ଅଭିଯୋଗ ।
କନକ ବ୍ୟୁରୋ: ହକ୍ ପାଇଁ ସ୍ୱାମୀର ଘର ଆଗରେ ଧାରଣାରେ ବସିଲେ ସ୍ତ୍ରୀ । ଶଶୁର ଘରେ ରହିବା ପାଇଁ ନେହୁରା ହୋଇ କବାଟ ବାଡେଇଲେ ବୋହୂ କିନ୍ତୁ କଠୋର ହୃଦୟଧାରୀ ସ୍ୱାମୀକୁ ଶୁଭିଲାନି ନିଜ ସ୍ତ୍ରୀ କାନ୍ଦ କି ଛୁଆର ଡାକ । ଏଭଳି ଏକ ସମ୍ବେଦନଶୀଳ ଘଟଣା ଘଟିଛି ମୟୂରଭଂଜ ଜିଲ୍ଲା ରାଇରଙ୍ଗପୁର ଗ୍ରାମାଂଚଳ ଥାନା ବଡାମତଳିଆ ଗାଁରେ ।
Kanak News is now on WhatsApp
Join and get latest news updates delivered to you via WhatsApp
ଦିନେ ପାଟ ଶାଢୀ ପିନ୍ଧି ଫୁଲସଜା ଗାଡିରେ ଶାଶୁଘରକୁ ଆସିଥିଲେ ବାଲେଶ୍ୱର ମାଣିଖମ୍ବ ଗାଁର ବିଜୟ ରଣାଙ୍କ ଝିଅ ବିଦୁସ୍ମିତା । କିନ୍ତୁ ଆଜି ସେହି ଶାଶୁଘରେ ରହିବା ପାଇଁ ଧାରଣା ଦେଇଛନ୍ତି ବିଦୁସ୍ମିତା । ହେଲେ ହୃଦୟହୀନ ସ୍ୱାମୀଙ୍କୁ ଦେଖାଯାଉନି ସ୍ତ୍ରୀର କାନ୍ଦ କି ଶୁଭୁନି ପୁଅର ଡାକ । ୨୦୧୪ ଫେବୃଆରୀ ୧୮ରେ ମୟୂରଭଂଜ ରାଇରଙ୍ଗପୁର ଗ୍ରାମାଂଚଳ ଥାନା ବଡାମତଳିଆ ଗାଁର ସିଦ୍ଧାର୍ଥ ପରିଡାଙ୍କୁ ବିବାହ କରିଥିଲେ ବିଦୁସ୍ମିତା । ଖୁବ୍ ହସ ଖୁସିରେ ଆରମ୍ଭ ହୋଇଥିଲା ସେମାନଙ୍କ ସଂସାର । ବିବାହ କିଛି ମାସ ପରେ ବିଦୁସ୍ମିତା ଗର୍ଭବତୀ ହେବା ପରେ ତାଙ୍କ ଉପରେ ଆରମ୍ଭ ହୋଇଯାଇଥିଲା ଯୌତୁକ ନିର୍ଯାତନା ।
ବିଦୁସ୍ମିତାଙ୍କ ଅଭିଯୋଗ, ଯୌତୁକ ଦାବି କରିବା ସହ ଭୃଣ ହତ୍ୟା ପାଇଁ ଚାପ ପକାଉଥିଲେ ସ୍ୱାମୀ ଓ ଶାଶୁଘର ଲୋକ । ସେମାନଙ୍କ ନିର୍ଯାତନା ସହି ନପାରି ବାପାଘରକୁ ଚାଲି ଯାଇଥିଲେ, ପିଲା ଜନ୍ମ ହେବା ପରେ ଶାଶୁଘରକୁ ଆସିଥିଲେ । ପରେ ନିର୍ଯାତନା ମାତ୍ରା ବଢିବାରୁ ଫ୍ୟାମିଲି କୋର୍ଟର ଦ୍ୱାରସ୍ଥ ହୋଇଥିଲେ । ଏବେ ବିଦୁସ୍ମିତା ବାପାଘରେ ରହୁଥିବା ବେଳେ ସ୍ୱାମୀ ସିଦ୍ଧାର୍ଥ ଅନ୍ୟତ୍ର ବିବାହ କରିବା ପାଇଁ ଯୋଜନା କରୁଥିବା ଖବର ପାଇ ଶାଶୁଘରକୁ ଧାଇଁ ଆସିଥିଲେ । ହେଲେ ଶାଶୁଘର ଲୋକ ତାଙ୍କୁ ଗ୍ରହଣ ନକରିବାରୁ ସେ ଧାରଣା ଦେଇଥିଲେ । ତେବେ ଶାଶୁଘରେ ରହିବା ପାଇଁ ସ୍ୱାମୀ ସିଦ୍ଧାର୍ଥ ଅନୁମତି ନଦେବା ସହ ଦ୍ୱିତୀୟ ବିବାହ କରିବା ପାଇଁ ଯୋଜନା କରୁଥିବାରୁ ସ୍ୱାମୀଙ୍କ ନାଁରେ ଥାନାରେ ଏତଲା ଦେଇଛନ୍ତି ବିଦୁସ୍ମିତା । ତେବେ ଗ୍ରାମାଂଚଳ ଥାନା ପୋଲିସର ବୁଝାସୁଝା କରି ବିଦୁସ୍ମିତା ଧାରଣାରୁ ଉଠିନେଇ ଘରେ ଛାଡି ଦେଇଛନ୍ତି ।