ସୀମାରେ ନୁହେଁ, ସର୍ଚ୍ଚ ଅପରେସନ ବେଳେ ଯବାନ ଦେଲେ ମାନବିକତାର ଅନନ୍ୟ ଉଦାହରଣ । ଗୁରୁତର ଆହତ ବ୍ୟକ୍ତିଙ୍କୁ ଖଟିଆରେ ବୋହି ଚାଲିଲେ ୫ କିଲୋମିଟର
ଆମ୍ବୁଲାନ୍ସରେ ପହଞ୍ଚିଲେ ହସ୍ପିଟାଲ; ଚିକିତ୍ସା ପରେ ଆହତ ବ୍ୟକ୍ତିଙ୍କ ସ୍ୱାସ୍ଥ୍ୟାବସ୍ଥା ସ୍ଥିର
କନକ ବ୍ୟୁରୋ: କେତେବେଳେ ନକ୍ସଲମାନଙ୍କୁ ମୁକାବିଲା କରୁଛନ୍ତି ତ ଆଉ କେତେବେଳେ ସୀମାରେ ସୁରକ୍ଷା ଦେଉଛନ୍ତି ଆମ ଯବାନ । ହେଲେ ସେହି ଯବାନମାନେ କିଛି ଏମିତି କାମ କରିଦେଖାଇଛନ୍ତି ଯାହା ଦେଖିଲେ ଆପଣ ବି କହିବେ ସାବାସ ସିପାହୀ । ଏ ଚିତ୍ର ହେଉଛି ବସ୍ତର ଅଂଚଳର ।
Kanak News is now on WhatsApp
Join and get latest news updates delivered to you via WhatsApp
ବିଜାପୁରର ବାସାଗୁଡା ଥାନା ବୁଡଗିଚେର ଅଂଚଳରେ ଜଣେ ବ୍ୟକ୍ତି ଟ୍ରାକ୍ଟରରୁ ଖସିପଡି ଗୁରୁତର ଆହତ ହୋଇଥିଲେ । ଗୁରୁତର ଆହତ ବ୍ୟକ୍ତିଙ୍କୁ ଚିକିତ୍ସା ଜରୁରୀ ହୋଇପଡିଥିଲା । ହେଲେ ତାଙ୍କୁ ଏକ ଘରେ ରଖାଯାଇଥିଲା । ଜଗି ରହିଥିଲେ ପରିବାର ଲୋକେ । ଠିକ ସେତିକି ବେଳେ ସର୍ଚ୍ଚ ଅପରେସନରେ ସାମିଲ ଥିବା କିଛି ଯବାନ ପହଞ୍ଚିଯାଇଥିଲେ ସେଠାରେ । ଏକ ଖଟିଆରେ ଆହତ ବ୍ୟକ୍ତିଙ୍କୁ ହସ୍ପିଟାଲରେ ପହଂଚାଇବା ପାଇଁ ଆରମ୍ଭ ହେଲା ଉଦ୍ୟମ । ଏଥିପାଇଁ ତାଙ୍କୁ ପରିବାରଲୋକଙ୍କ ପ୍ରତିରୋଧର ମଧ୍ୟ ସମ୍ମୁଖୀନ ହେବାକୁ ପଡିଥିଲା ।
ହେଲେ ପରିବାରଲୋକଙ୍କୁ ବୁଝାଇଥିଲେ । ଖଟିଆରେ ଗୁରୁତର ଆହତ ବ୍ୟକ୍ତିଙ୍କୁ ନେଇ ଚାଲି ଚାଲି ପ୍ରାୟ ୫ କିଲୋମିଟର ରାସ୍ତା ଅତିକ୍ରମ କରିଥିଲେ । ତା ପରେ ଆହତ ବ୍ୟକ୍ତିଙ୍କୁ ଏକ ଆମ୍ବୁଲାନ୍ସ ଯୋଗେ ହସ୍ପିଟାଲ ନେଇଥିଲେ ଏହି ଯବାନ ମାନେ । ସେଠାରେ ତୁରନ୍ତ ଚିକିତ୍ସା କରାଯିବା ପରେ ବ୍ୟକ୍ତି ଜଣଙ୍କ ଏବେ ସାମାନ୍ୟ ସୁସ୍ଥ ଥିବା ଜଣାପଡିଛି । ଯବାନଙ୍କ ଏପରି କାମକୁ ବିଭିନ୍ନ ମହଲରେ ପ୍ରଶଂସା କରାଯାଇଛି ।