ରଜ ପାଇଁ ବଜାରରେ ଲୋକଙ୍କ ପ୍ରବଳ ଗହଳି । ମାନିଲେନି କରୋନା କଟକଣା, ସ୍ଥିତି ଅସମ୍ଭାଳ ପରେ ଆକ୍ସନ ମୋଡକୁ ଆସିଲା ପ୍ରଶାସନ । ଭୁବନେଶ୍ୱରର ମାର୍କେଟ ବିଲ୍ଡିଂକୁ ସିଲ୍ କଲା ବିଏମସି ।
କନକ ବ୍ୟୁରୋ: ଦିନକ ପରେ ଓଡିଶାର ଗଣପର୍ବ ରଜ । ତେଣୁ ବହୁ ସଂଖ୍ୟାରେ ଲୋକ ଆଜି ବଜାରକୁ ବାହାରି ଆସିଥିଲେ କିଣାକିଣି କରିବା ପାଇଁ । ଆଜି ସରକାର କର୍ଫ୍ୟୁ ବି ରାତି ୧୦ଟା ପର୍ଯ୍ୟନ୍ତ କୋହଳ କରିବା ପାଇଁ ଘୋଷଣା କରିଥିଲେ । କିନ୍ତୁ ରାଜଧାନୀ ଭୁବନେଶ୍ୱରର ମାର୍କେଟ ବିଲ୍ଡିଂର ଦୃଶ୍ୟ ଯାହାକୁ ନେଇ ସଂକ୍ରମଣ ବ୍ୟାପିବା ଆଶଙ୍କାକୁ ଏଡ଼ାଇ ନଦିଆଯାଇପାରେ । ହଜାର ହଜାର ଲୋକ କିଣାକିଣି କରିବା ପାଇଁ ପହଁଚି ଯାଇଥିଲେ ମାର୍କେଟ ବିଲ୍ଡିଂରେ । ଏମିତି ଲାଗୁଥିଲା ଯେ ସମସ୍ତେ ସାମାଜିକ ଦୂରତା କଥା ଓ ମହାମାରୀ କରୋନାର ଭୟାବହତା କଥା ଭୁଲି ଯାଇଛନ୍ତି । ପୂରା ମାର୍କେଟ ବିଲ୍ଡିଂ ଖଚାଖଚ ଭିଡ ହୋଇଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ବ୍ୟବସାୟୀ ମାନେ ବି ଉତ୍ସାହିତ ହୋଇ ବେଶ ପୂର୍ବରୁ ଦୋକାନ ବଜାର ଖୋଲି ବ୍ୟବସାୟ କରିବା ପାଇଁ ପ୍ରସ୍ତୁତ ହୋଇଯାଇଥିଲେ । କାରଣ ପ୍ରାୟ ତିନି ମାସ ହେବ ଲକଡାଉନ ଅଛି, ଦୋକାନ ବଜାର ସବୁ ବନ୍ଦ । ଗୋଟିଏ ଦିନ ପରେ ରଜ ଥିବାରୁ ଉଭୟ ଗ୍ରାହକ ଓ ବ୍ୟବସାୟୀଙ୍କ ଭିତରେ ବେଶ୍ ଉତ୍ସାହ ଥିଲା । କିନ୍ତୁ, ମହାମାରୀର ସଂକ୍ରମଣର ସମ୍ଭାବନା ଏଭଳି ପରିସ୍ଥିତିରେ କେତେ ବଢ଼ିଯାଏ ଏହାକୁ ସମସ୍ତେ ଭୁଲି ଯାଇଥିଲେ । ତେବେ ଏଭଳି ଭିଡ଼ ଦୃଶ୍ୟ ଟେଲିଭିଜନ ପରଦାରେ ପ୍ରସାରଣ ହେବା ପରେ ପ୍ରଶାସନ ଆକ୍ସନ ମୋଡକୁ ଆସି ଯାଇଥିଲା ।
ସେପଟେ ବିଏମସି ଡେପୁଟି କମିଶନରଙ୍କ ନେତୃତ୍ୱରେ ଏକ ସ୍କାର୍ଡ ମାର୍କେଟ ବିଲ୍ଡିଂରେ ପହଁଚି ସିଲ୍ କରିବା ଆରମ୍ଭ କରିଦେଇଥିଲେ । କିନ୍ତୁ ,ପ୍ରଶାସନର ଏଭଳି ପଦକ୍ଷେପକୁ ସହଜରେ ଗ୍ରହଣ କରି ପାରିନଥିଲେ ବ୍ୟବସାୟୀ । ପ୍ରଥମ ଥର ପାଇଁ ସେମାନଙ୍କ ଭିତରେ ଅସନ୍ତୋଷ ଦେଖିବାକୁ ମିଳିଥିଲା । ମାର୍କେଟ ବିଲ୍ଡିଂକୁ ସିଲ୍ କରିବା ପରେ କ୍ୟାମେରା ଆଗରେ ଜଣେ ବ୍ୟବସାୟୀ କହୁଥିଲେ ସରକାର ତାଙ୍କୁ ଟିକେ ବିଷ ଦେଇଦିଅନ୍ତୁ, ସେମାନେ ଏଭଳି କ୍ଷତି ସହି ପାରିବେ ନାହିଁ ।