କନକ ବ୍ୟୁରୋ : କୋରାପୁଟ କୋଟିଆରେ ଜିଲ୍ଲା ପରିଷଦ ଆସନ ପାଇଁ ଇଲେକ୍ସନ ହେବ ନା ସିଲେକ୍ସନ । କାରଣ ସର୍ବଦଳୀୟ କମିଟି ଯେଉଁ ପ୍ରାର୍ଥୀଙ୍କୁ ମନୋନୟନ କରିଥିଲା ଗତକାଲି ସେ ନାମାଙ୍କନ ଦାଖଲ କରିଛନ୍ତି । ନିଷ୍ପତି ଅନୁସାରେ ଆଉ କେହି ପ୍ରତିଯୋଗୀ ମଇଦାନକୁ ଓହ୍ଲାଇବା କଥା ନୁହଁ । ହେଲେ ଆଶ୍ଚର୍ଯ୍ୟଜନକ ଭାବେ କାଲି ପ୍ରାର୍ଥିପତ୍ର ଦାଖଲର ଶେଷ ଦିନରେ ଆଉ ଦୁଇ ସ୍ୱାଧୀନ ପ୍ରାର୍ଥୀ ମଧ୍ୟ ଜିଲ୍ଲା ପରିଷଦ ଆସନ ପାଇଁ ପ୍ରାର୍ଥିପତ୍ର ଦାଖଲ କରିଛନ୍ତି । ଯାହାକୁ ନେଇ ପୁଣି ରାଜନୀତି ଜୋର ଧରିଛି ।
Kanak News is now on WhatsApp
Join and get latest news updates delivered to you via WhatsApp
ପଞ୍ଚାୟତ ନିର୍ବାଚନକୁୁ ନେଇ ଗାଁ ରାଜନୀତି ବେଶ ସରଗରମ ହୋଇଥିବା ବେଳେ ବିବାଦୀୟ କୋଟିଆ ଉପରେ ରହିଛି ସମସ୍ତଙ୍କ ନଜର । କୋଟିଆରେ କେମିତି ହେବ ନିର୍ବଚାନ ? କିଏ ହେବ ପ୍ରାର୍ଥୀ ? କ’ଣ ହେବ କୋଟିଆ ଭାଗ୍ୟ ? ଏମିତି ଚର୍ଚ୍ଚା ଭିତରେ ପ୍ରାର୍ଥୀ ଚୟନ କରିଛନ୍ତି ସର୍ବଦଳୀୟ ନେତା । କିନ୍ତୁ ଏଇଠି କଥା ସରିନି, ଏବେ ଆଉ ଏକ ନୂଆ ବିବାଦ ମୁଣ୍ଡ ଟେକିଛି । କୋରାପୁଟ ବୈଠକରେ ସର୍ବଦଳୀୟ ନେତାଙ୍କ ସହମତିରେ ଜିଲ୍ଲା ପରିଷଦ ପ୍ରାର୍ଥୀ ମମତା ଜାନୀ ନାମାଙ୍କନ ଭରିଥିବା ବେଳେ ଆଉ ୨ ଜଣ ସ୍ୱାଧୀନ ପ୍ରାର୍ଥୀ ନାମାଙ୍କନ ଦାଖଲ କରିଛନ୍ତି । ଯାହା ସର୍ବଦଳୀୟ ନେତାଙ୍କୁ ଅଡୁଆରେ ପକାଇ ଦେଇଛି ।
କୋଟିଆକୁ ନେଇ ବିବାଦ ଭିତରେ ଆନ୍ଧ୍ର ପଞ୍ଚାୟତ ନିର୍ବାଚନ କରି ନିଜର କରିବାକୁ ଚେଷ୍ଟା ଚଳାଇଛି । ଆନ୍ଧ୍ରକୁ ଚେକ୍ ଦେବା ପାଇଁ କୋରାପୁଟର ସ୍ଥାନୀୟ ନେତାଙ୍କ ସର୍ବସମ୍ମତିରେ ଚୟନ ହୋଇଥିବା ପ୍ରାର୍ଥୀ ନାମାଙ୍କନ କରିଛନ୍ତି । କିନ୍ତୁ ଅନ୍ୟ ଦୁଇ ଜଣ ସ୍ୱାଧୀନ ପ୍ରାର୍ଥୀ ପ୍ରାର୍ଥୀପତ୍ର ଦାଖଲ କରିବା ପରେ ଗୋଳିଆ ହୋଇଛି କୋଟିଆ ରାଜନୀତି । ତେବେ ସ୍ୱାଧୀନ ପ୍ରାର୍ଥୀ ନାମାଙ୍କନ ପ୍ରତ୍ୟାହାର କରିବେ ବୋଲି ସର୍ବଦଳୀୟ ନେତା କହୁଛନ୍ତି । ଏପଟେ ବିଜେପିର କିଛି ନେତା ଏହାକୁ ବିରୋଧ କରିଛନ୍ତି ।
କୋଟିଆ ପଞ୍ଚାୟତରେ ୧୩ଟି ୱାର୍ଡ଼ମେମ୍ବର ପଦ ରହିଥିବା ବେଳେ ପଟାଙ୍ଗୀ ବ୍ଳକର ଜୋନ-୧ରେ ରହିଛି କୋଟିଆ ଜିଲ୍ଳା ପରିଷଦ ଆସନ । ତେବେ ଚଳିତ ପଞ୍ଚାୟତ ନିର୍ବାଚନରେ କୋଟିଆ ଭାଗ୍ୟ କ’ଣ ହେବ, ତାହା ଆସନ୍ତା ୨୫ ତାରିଖରେ ଚୂଡାନ୍ତ ପ୍ରାର୍ଥୀ ତାଲିକା ଆସିବା ପରେ ଜଣାପଡିବ ।