କନକ ବ୍ୟୁରୋ : କୋଲ ବ୍ଲକ ଆବଣ୍ଟନ ମାମଲାରେ ସ୍ୱତନ୍ତ୍ର କୋର୍ଟ ପୂର୍ବତନ କେନ୍ଦ୍ରମନ୍ତ୍ରୀ ଦିଲ୍ଲୀପ ରାୟଙ୍କ ସମେତ ୫ ଜଣଙ୍କୁ ଦୋଷୀ ସାବ୍ୟସ୍ତ କରିଛନ୍ତି । ୧୯୯୯ ମସିହାରେ ଏନଡିଏ ସରକାରରେ ଦିଲ୍ଲୀପ ରାୟ କେନ୍ଦ୍ର କୋଇଲା ରାଷ୍ଟ୍ରମନ୍ତ୍ରୀ ଥିଲେ । ଏହି ସମୟରେ ଝାରଖଣ୍ଡରେ ଏକ କୋଲବ୍ଲକ ଆବଣ୍ଟନ ବେଳେ ଅନୁକମ୍ପା ଦେଖାଇଥିବା ନେଇ ଦିଲ୍ଲୀପ ରାୟ ଓ ଅନ୍ୟ ୫ ଜଣଙ୍କ ସଂପୃକ୍ତି ଥିବା ଅଭିଯୋଗ ହୋଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଏନଡିଏ ସରକାରଙ୍କ ପ୍ରଥମ ମନ୍ତ୍ରୀ ଦିଲ୍ଲୀପ ରାୟ ଯାହାଙ୍କ ନାମରେ ଏହି ଅଭିଯୋଗ ନେଇ ସମନ ଜାରି କରିଥିଲା ସିବିଆଇର ସ୍ୱତନ୍ତ୍ର କୋର୍ଟ । ଦିଲ୍ଲୀପଙ୍କ ସହ ଅନ୍ୟ ଯେଉଁ ୫ ଜଣଙ୍କ ନାମରେ ସମନ ଆସିଥିଲା ସେମାନଙ୍କ ମଧ୍ୟରେ ରହିଛନ୍ତି କୋଇଲା ମନ୍ତ୍ରଣାଳୟର ପୂର୍ବତନ ଆଡିସିନାଲ ସେକ୍ରେଟାରୀ ପ୍ରଦୀପ କୁମାର ବାନାର୍ଜୀ, କାଷ୍ଟ୍ରୋନ ଟେକନୋଲୋଜିର ନିର୍ଦ୍ଦେଶକ ମହେନ୍ଦ୍ର କୁମାର ଅଗ୍ରୱାଲ ପ୍ରମୁଖ । ଏମାନଙ୍କ ବିରୋଧରେ ଆଇପିିସିର ଦଫା ୧୨୦ (ବି),୪୨୦ ଓ ୪୦୯ ଲଗାଯାଇଥିଲା ।
୧୯୯୮ ରେ ଝାରଖଣ୍ଡର ବ୍ରହ୍ମଡିହା କୋଲବ୍ଲକ ପାଇଁ କାଷ୍ଟ୍ରୋନ ମାଇନିଂ ଲିମିଟେଡ ଆବେଦନ କରିଥିଲା । କାଷ୍ଟ୍ରୋନ ମାଇନିଂ ଲିମିଟେଡର ମାଲିକ ହେଉଛନ୍ତି ବରିଷ୍ଠ ବିଜେପି ନେତା ତଥା ପୂର୍ବତନ ରାଜ୍ୟସଭା ସଦସ୍ୟ ସ୍ୱର୍ଗତ ପି.କେ ଅଗ୍ରୱାଲ । ପାଖରେ ଜନବସତି ଓ ୱାଟର ଚ୍ୟାନେଲିଂରେ ସମସ୍ୟା ଥିବାରୁ ଏମପାୱାରଡ କମିଟି ପ୍ରଥମେ ଏହାକୁ ଅଗ୍ରାହ୍ୟ କରିଥିଲା । ହେଲେ ସେତେବେଳେ ବାଜପେୟୀ ସରକାରରେ କୋଇଲା ରାଷ୍ଟ୍ରମନ୍ତ୍ରୀ ଥିବା ଦିଲ୍ଲୀପ ରାୟ ସୁପାରିଶ କରିଥିଲେ । ସିବିଆଇ ନିଜ ଚାର୍ଜସିଟରେ ଦର୍ଶାଇଥିଲେ କି ଏ ସଂପର୍କିତ ଫାଇଲ ୧୯୯୯ ମସିହା ଏପ୍ରିଲ ୨୩ ତାରିଖରେ ଦିଲ୍ଲୀପ ରାୟଙ୍କ ପାଖକୁ ଆସିଥିଲା । ଏହାପରେ ୧୯୯୯ ମେ ୧୨ ତାରିଖରେ ନୂଆ ଆବେଦନ କରିଥିଲା କାଷ୍ଟ୍ରୋନ ମାଇନିଂ ଲିମିଟେଡ । ଏହି ନୂତନ ଆବେଦନରେ ପୁର୍ନବିଚାର କରିବାକୁ ଏମପାୱାରଡ କମିଟିକୁ ଅନୁରୋଧ କରିଥିଲେ ଦିଲ୍ଲୀପ ରାୟ ।
ଦିଲ୍ଲୀପ ରାୟଙ୍କ ସୁପାରିଶ ଆଧାରରେ ୧୯୯୯ ସେପ୍ଟେମ୍ବର ୧ ତାରିଖରେ ବ୍ରହ୍ମଡିହା କୋଲବ୍ଲକକୁ କାଷ୍ଟ୍ରୋନ ମାଇନିଂକୁ ବ୍ରହ୍ମଡିହା କୋଲବ୍ଲକ ଦିଆଯାଇଥିଲା । ୨୦୧୨ରେ କୋଲବ୍ଲକର ବିକାଶ ହୋଇନଥିବା ଦର୍ଶାଇ ଆବଣ୍ଟନକୁ ରଦ୍ଦ କରିଥିଲେ ୟୁପିଏ ସରକାର । ଏହାପରେ କୋଲବ୍ଲକରେ ଦୁର୍ନୀତି ନେଇ ରୁଜୁ ହୋଇଥିଲା ମାମଲା ।
କୋଲ ଇଣ୍ଡିଆ ଲିମିଟେଡ ଏବଂ ସେଣ୍ଟ୍ରାଲ ମାଇନିଂ ପ୍ଲାନିଂ ଏଣ୍ଡ ଡିଜାଇନ ଇନଷ୍ଟିଚ୍ୟୁଟ୍ ଲିମିଟେଡର ବିରୋଧ ସତ୍ତେ୍ୱ କାଷ୍ଟ୍ରୋନ ମାଇନିଂକୁ ଅହେତୁକ ଅନୁକମ୍ପା ଦେଖାଇ କୋଇଲା ବ୍ଲକ ବଣ୍ଟନରେ ଅନିୟମିତତା ନେଇ ମାମଲା ରୁଜୁ ହୋଇଥିଲା । ଏହି ମାମଲାର ଶୁଣାଣି କରି ସିବିଆଇର ଏକ ସ୍ୱତନ୍ତ୍ର କୋର୍ଟ ଏମାନଙ୍କୁ ଦୋଷୀ ସାବ୍ୟସ୍ତ କରିଛି ।