ଆପଣ ଡାଇବେଟିସକୁ ନେଇ ଚିନ୍ତିତ କି ? ନିଜଠୁ କେମିତି ଦୂରେଇ ରଖିବେ ଡାଇବେଟିସ୍
କନକ ବ୍ୟୁରୋ : ଡାଇବେଟିସ୍ । ବର୍ତମାନର ଜୀବନରେ ଏହି ରୋଗକୁ ନେଇ ଏବେ ଅନେକ କଥା ଚର୍ଚ୍ଚା । ହେଲେ କଥା ଉଠୁଛି ଡାଇବେଟିସ୍ ହେଉଛି କାହିଁକି ? ଏବଂ ଏହାକୁ କ’ଣ ଏଡାଇ ହେବ ନାହିଁ । ବିଶେଷଜ୍ଞ ଡାକ୍ତରଙ୍କ କହିବା ମୁତାବକ, ଡାଇବେଟିସକୁ ଜଣେ ବ୍ୟକ୍ତି ଚାହିଁଲେ ଏଡାଇ ଦେଇପାରିବେ । ହେଲେ ଏଥିପାଇଁ ଦରକାର ସ୍ୱାସ୍ଥ୍ୟ ସଚେତନତା ଓ ନିୟନ୍ତ୍ରିତ ଜୀବନଶୈଳୀ । ତେଣୁ ଆଜି ଆସନ୍ତୁ ଜାଣିବା କେମିତି ରୋକିବେ ଡାଇବେଟିସ୍ ।
Kanak News is now on WhatsApp
Join and get latest news updates delivered to you via WhatsApp
ଜଣେ ବ୍ୟକ୍ତିଙ୍କର ରକ୍ତରେ ସୁଗାର ପରିମାଣ ଖାଲି ପେଟରେ ୧୨୬ ମିଲିଗ୍ରାମ ପର୍ ଡେସିଲିଟର ରହିଲେ ତାକୁ ଡାଇବେଟିସ୍ ବୋଲି କୁହାଯାଏ । ସେହିପରି ଖାଇବାର ୨ ଘଂଟା ପରେ ରକ୍ତରେ ସୁଗାରର ପରିମାଣ ୨୦୦ ମିଲିଗ୍ରାମ ପର୍ ଡେସିଲିଟରରୁ ଅଧିକ ରହିଲେ ତାକୁ ଆମେ ଡାଇବେଟିସ୍ ବୋଲି କହିଥାଉ । ତେବେ ଯେଉଁ ବ୍ୟକ୍ତିମାନଙ୍କର ରକ୍ତରେ ଶର୍କରା ପରିମାଣ ୧୪୦ ରୁ ୧୯୯ ମିଲିଗ୍ରାମ ପର୍ ଡେସିଲିଟର ଭିତରେ ରହିଥାଏ ତାକୁ ଆମେ ପ୍ରି-ଡାଇବେଟିସ୍ ବୋଲି କହିଥାଉ । ଅର୍ଥାତ ସେହି ବ୍ୟକ୍ତିମାନଙ୍କୁ ଭବିଷ୍ୟତରେ ଡାଇବେଟିସ୍ ହୋଇପାରେ । ହେଲେ ଏହି ଅବସ୍ଥାରେ ସ୍ୱାସ୍ଥ୍ୟ ପ୍ରତି ସଚେତନ ହୋଇ ନିଜ ଖାଦ୍ୟପେୟରେ ନିୟନ୍ତ୍ରଣ ଆଣିଲେ, ଜଣେ ବ୍ୟକ୍ତିଙ୍କୁ କେବେ ବି ଡାଇବେଟିସ୍ ହେବ ନାହିଁ ବୋଲି ବିଶେଷଜ୍ଞ ଡାକ୍ତରମାନେ କହିଥାନ୍ତି ।
କେଉଁମାନଙ୍କୁ ହେବାର ସମ୍ଭାବନା ଅଧିକ ?
ସାଧାରଣତଃ ୪୫ ବର୍ଷରୁ ଅଧିକ ବୟସରର ବ୍ୟକ୍ତିଙ୍କୁ ଡାଇବେଟିସ୍ ହେବାର ସମ୍ଭାବନା ଅଧିକ ରହିଛି । ସେହିପରି ଯେଉଁମାନଙ୍କ ପାଖରେ ମେଦ ବହୁଳତା ରହିଛି, ଯେଉଁମାନେ ନିୟମିତ ବ୍ୟାୟାମ କରୁନାହାଁନ୍ତି ସେମାନଙ୍କୁ ଏହି ରୋଗ ହେବାର ସମ୍ଭାବନା ସବୁଠୁ ଅଧିକ ରହିଛି । ତା ସହିତ ପରିବାରରେ କାହାକୁ ଡାଇବେଟିସ୍ ହୋଇଥିଲେ, କିମ୍ବା ଉଚ୍ଚ ରକ୍ତଚାପ ଥିଲେ ଜଣେ ବ୍ୟକ୍ତିଙ୍କୁ ଡାଇବେଟିସ୍ ହୋଇପାରେ । ସେହିପରି ଟ୍ରାଇଗ୍ଲାସିରାଇଡର ପରିମାଣ ୨୫୦ ମିଲିଗ୍ରାମ ପର୍ ଡେସିଲିଟରରୁ ଅଧିକ ରହିଲେ ଜଣେ ବ୍ୟକ୍ତିଙ୍କୁ ଡାଇବେଟିସ୍ ରୋଗ ହେବାର ଅଧିକ ଚ୍ୟାନ୍ସ ରହିଛି ।
ଡାଇବେଟିସଠୁ କେମିତି ରହିବେ ଦୂରରେ…
ନିୟନ୍ତ୍ରିତ ଜୀବନଶୈଳୀ ଓ ସଚେତନତା ହିଁ ଆପଣଙ୍କୁ ଡାଇବେଟିସଠାରୁ ଦୂରରେ ରଖିପାରିବ । ଏଥିପାଇଁ ଆପଣଙ୍କ ଖାଦ୍ୟପେୟରେ ପରିବର୍ତନ କରନ୍ତୁ । ତେଲ ମସଲା ଖାଦ୍ୟ ଓ ଚର୍ବି ଥିବା ଖାଦ୍ୟ ଖାଆନ୍ତୁ ନାହିଁ । ଫାଷ୍ଟଫୁଡ୍, ମିଠା, କୋଲଡ୍ ଡ୍ରିଙ୍କସ୍, ଛେଳି ମାଂସ, ଘିଅ, ବଟର, ଚିନି ଆଦିକୁ ସମ୍ପୂର୍ଣ୍ଣ ବନ୍ଦ କରନ୍ତୁ । ଆଉ ଅଧିକ ପରିମାଣରେ ସବୁଜ ପନିପରିବା ଓ ଫଳ ଖାଆନ୍ତୁ ।ଡାଇବେଟିସଠାରୁ ଦୂରରେ ରହିବାକୁ ପ୍ରତିଦିନ ୩୦ ମିନିଟ୍ ବ୍ୟାୟାମ କରନ୍ତୁ । ତା ସହିତ ଯଦି ଆପଣଙ୍କ ଓଜନ ଅଧିକ ଅଛି, ତେବେ ଏହାକୁ ଯଥାଶୀଘ୍ର କମ କରିବାକୁ ଚେଷ୍ଟା କରନ୍ତୁ । ଧୂମପାନ ଓ ମଦ୍ୟପାନକୁ ସମ୍ପୂର୍ଣ୍ଣ ବନ୍ଦ କଲେ ହିଁ ଆପଣ ଡାଇବେଟିସକୁ ରୋକିପାରିବେ । ଏହି ସବୁ ଛୋଟ ଛୋଟ କଥା ପ୍ରତି ଧ୍ୟାନ ଦେଲେ ଜଣେ ବ୍ୟକ୍ତି ଡାଇବେଟିସ ରୋଗଠାରୁ ନିଜରକୁ ସମ୍ପୂର୍ଣ୍ଣ ଦୂରରେ ରଖିପାରିବେ ।