ଯଦି ଭୁବନେଶ୍ୱରକୁ ପଶି ଆସନ୍ତି ଆତଙ୍କବାଦୀ... କେମିତି କରାଯିବ ସଶସ୍ତ୍ର ମୁକାବିଲା ?

କନକ ବ୍ୟୁରୋ: ଟ୍ରେନ ଭିତରେ ଆତଙ୍କବାଦୀ, ଟ୍ରେନ ବାହାରେ ସଶସ୍ତ୍ର ସେନା । ପୋଲିସ ଛାଉଣୀରେ ପୂରା ଷ୍ଟେସନ । ସବୁ ରାସ୍ତାକୁ ସିଲ କରିଛନ୍ତି ସେନା । ରାଜଧାନୀ ଭୁବନେଶ୍ୱରର ରେଳଧାରଣାରେ ଅଟକିଥିବା ଟ୍ରେନକୁ ନିଜ କବଜାକୁ ନେଇଛନ୍ତି ଯବାନ । ଆତଙ୍କବାଦୀଙ୍କୁ ଧରିବାକୁ ଟ୍ରେନର କବାଟ ପାଖରେ, ଟ୍ରାକର ଅନତି ଦୂରରେ ଲୁଚି ରହିଛନ୍ତି ସଶସ୍ତ୍ର ସେନାବାହିନୀ ।

ହାତରେ ଅତ୍ୟାଧୁନିକ ବନ୍ଧୁକ ଧରି ପ୍ରାୟ ୨୦ ମିନିଟ ଖୋଜାଖୋଜି କରି ଟ୍ରେନରେ ପଶିଥିଲେ ସଶସ୍ତ୍ର ସେନା । ଟ୍ରେନ ଭିତରେ ଯାତ୍ରୀଙ୍କୁ ବନ୍ଦୀ ରଖିଥିବା ଆତଙ୍କବାଦୀଙ୍କୁ ଧରିବାକୁ ଭୁବନେଶ୍ୱର ରଙ୍ଗାମାଟିଆ ପାଖରେ ଛାଇ ଯାଇଥିଲେ ଯବାନ । ଆତଙ୍କବାଦୀର ଭୟ ଆଉ ସଶସ୍ତ୍ର ସେନାଙ୍କୁ ଦେଖି ଡରି ଯାଇଥିଲେ ସ୍ଥାନୀୟ ଲୋକେ । ଦୀର୍ଘ ସମୟର ଅପରେସନ ପରେ ଶେଷରେ ଟ୍ରେନ ବଗି ଭିତରୁ ଆତଙ୍କବାଦୀକୁ ଧରିଥିଲେ ଯବାନ ଆଉ କରିଥିଲେ ଯାତ୍ରୀଙ୍କୁ ଉଦ୍ଧାର ।

୨୨ ମିନିଟର ଏ ତମାମ ଅପରେସନ ସତସତିକା ନଥିଲା ବରଂ ମକଡ୍ରିଲ ଥିଲା । ଯଦି ଭବିଷ୍ୟତରେ ଭୁବନେଶ୍ୱରକୁ ଆତଙ୍କବାଦୀ ପଶି ଆସନ୍ତି କିମ୍ବା ଟ୍ରେନରେ ଯାତ୍ରୀଙ୍କ ଜୀବନ ନେବାକୁ ସେମାନଙ୍କୁ ବନ୍ଦୀ କରି ରଖନ୍ତି ତେବେ କେମିତି କରାଯିବ ଏହାର ମୁକାବିଲା ? କେଉଁ କୌଶଳ ଆପଣେଇ ଆତଙ୍କବାଦୀଙ୍କୁ କବଜା କରିବେ ପୋଲିସ, ଯବାନ ? ସେନେଇ ଯବାନଙ୍କ ପକ୍ଷରୁ ଏକ ମକଡ୍ରିଲ କରାଯାଇଛି । ନକ୍ସଲ, ଆତଙ୍କବାଦୀଙ୍କୁ ଉଚିତ ଜବାବ ଦେବାକୁ ଏହି ମକଡ୍ରିଲରେ ଶିଖାଯାଇଛି ।