କିପରି ହେବ ଓଡ଼ିଶା ନିର୍ମାଣ ! ମତ ରଖିଲେ ୩ ରାଜନୈତିକ ଦଳର ବରିଷ୍ଠ ନେତା ।
ଓଡ଼ିଶା ନିର୍ମାଣ କିପରି କରିହେବ ? ନିର୍ବାଚନ ପୂର୍ବରୁ ରାଜ୍ୟର ପ୍ରମୁଖ ଦଳ ବିଜେପି, ବିଜେଡ଼ି ଓ କଂଗ୍ରେସର ପ୍ରମୁଖ ନେତାମାନେ ନିଜର ମତ ରଖିଛନ୍ତି ।
କନକ ବ୍ୟୁରୋ : ଓଡ଼ିଶା ନିର୍ମାଣ ଦାୟିତ୍ୱ ନେଇ ବିଜେପି ବରିଷ୍ଠ ନେତା ବିଶ୍ୱଭୂଷଣ ହରିଚନ୍ଦନ କହିଛନ୍ତି ନିର୍ମାଣ ପାଇଁ ସବୁଠାରୁ ବଡ଼ ଆବଶ୍ୟକତା ହେଲା ମାଟି, ମା’ ଓ ମଣିଷକୁ ଭଲପାଉଥିବା ମଣିଷ । ଓଡ଼ିଶାର ଭାଷା ସଂସ୍କୃତି ଓ ଐତିହ୍ୟକୁ ବୁଝିବା ଦରକାର । ସାଧାରଣ ମଣିଷର ସ୍ୱପ୍ନ ସହ ନିଜକୁ ସାମିଲ କରିବା ପାଇଁ ପଡ଼ିବ । ଏବେ ଶିକ୍ଷା, ସ୍ୱାସ୍ଥ୍ୟ ବିପର୍ଯ୍ୟସ୍ତ ଅବସ୍ଥାରେ ଅଛି । ଜଳସେଚନ ପାଇଁ ଓଡ଼ିଶାରେ ବ୍ୟାପକ ସୁଯୋଗ ରହିଛି । ହେଲେ ରାଜ୍ୟରେ ଆଜିଯାଏ ମାତ୍ର ୩୨ ପ୍ରତିଶତ ଜମିରେ ଜଳସେଚନ ହୋଇଛି । ଓଡ଼ିଶାର ବିକାଶ ପାଇଁ କୃଷିର ବିକାଶ ନିହାତି ଆବଶ୍ୟକ । କୃଷିର ବକାଶ ନହେଲେ ରାଜ୍ୟର ବିକାଶ ହେବା ଅସମ୍ଭବ । ଅନ୍ୟପଟେ ରାଜ୍ୟରେ ଯର୍ଯ୍ୟାପ୍ତ ଶୀତଳ ଭଣ୍ଡାର ନାହିଁ । ସରକାର ଶୀତଳ ଭଣ୍ଡାର ପାଇଁ ଘୋଷଣା ପରେ ଘୋଷଣା କରିଚାଲିଛନ୍ତି । ହେଲେ କିଛି ହୋଇପାରୁନାହିଁ । ନିଯୁକ୍ତି, କୃଷି, ଶିଳ୍ପ ଓ କ୍ଷୁଦ୍ର ଶିଳ୍ପର ବିକାଶ ଦିଗରେ ପ୍ରଯତ୍ନ କରିବା ଦରକାର ।
Kanak News is now on WhatsApp
Join and get latest news updates delivered to you via WhatsApp
ସେହିପରି ଓଡ଼ିଶା ନିର୍ମାଣ କ୍ଷେତ୍ରରେ କେଉଁ କେଉଁ ଦିଗ ଉପରେ ଗୁରୁତ୍ୱ ଦେବାକୁ ପଡ଼ିବ ସେନେଇ ପିସିସି ସଭାପତି ନିରଞ୍ଜନ ପଟ୍ଟନାୟକ ମତ ରଖିଛନ୍ତି । କହିଛନ୍ତି ଯେ, ଆଦି ଅନାଦି କାଳରୁ ଚାଲିଆସୁଥିବା ଭୁଲ ନିଷ୍ପତିର ନିରାକରଣ ନହେଲେ ଓଡ଼ିଶା ନିର୍ମାଣ ସମ୍ଭବ ନୁହେଁ । ଯେପରିକି ବିଶ୍ୱର ଏକ ମାତ୍ର ମନ୍ଦିର ୧୨ ବର୍ଷ ମଧ୍ୟରେ ନିର୍ମାଣ ହୋଇଛି । କିନ୍ତୁ ବର୍ତ୍ତମାନ କିଛି ଇଂଜିନିୟରଙ୍କ ଡ଼ିଜାଇନ୍ ଏବଂ ଭୁଲ ନିଷ୍ପତି ଯୋଗୁଁ କୋଣାର୍କ ମନ୍ଦିରର ଏଭଳି ଅବସ୍ଥା । ତେଣୁ ପ୍ରଥମେ ଓଡ଼ିଶା କ’ଣ ଜାଣିବା ଦରକାର । ୧୯୩୬ ମସିହାରେ ଯେତେବେଳେ ଓଡ଼ିଶାକୁ ଗୋଟେ ରାଜ୍ୟର ମାନ୍ୟତା ମିଳିଲା ତା’ପରଠାରୁ ଲୋକଙ୍କ ଆର୍ଥିକ ବ୍ୟବସ୍ଥାରେ କିପରି ସୁଧାର ଆସିବ ସେନେଇ ଚିନ୍ତାକରାଗଲା । କିନ୍ତୁ ଏବେ ଯୋଜନା ପରେ ଯୋଜନା ହେଉଛି ଫଳ ମିଳୁନି । ପ୍ରଥମେ ଯୁବ ଶକ୍ତି ଓ ଚାଷକୁ ଗୁରୁତ୍ୱ ଦେବାକୁ ପଡ଼ିବ । ଏହା ହିଁ କଲେ ଓଡ଼ିଶା ନିର୍ମାଣ ହୋଇପାରିବ ବୋଲି କହିଛନ୍ତି ପିସିସି ସଭାପତି ।
ଅପରପକ୍ଷେ ଅର୍ଥମନ୍ତ୍ରୀ ଶଶିଭୂଷଣ ବେହେରା କହିଛନ୍ତି ଯେ, ପ୍ରଥମେ ଜାଣିବା ଦରକାର ଓଡ଼ିଶାର ସ୍ଥିତି କ’ଣ ରହିଛି । ୧୯୩୬ ମସିହାରେ ଯେତେବେଳେ ଓଡ଼ିଶାକୁ ଏକ ରାଜ୍ୟର ମାନ୍ୟତା ମିଳିଲା ଏହାପରେ ଏକ ସ୍ୱର୍ଣ୍ଣିମ ଓଡ଼ିଶା ଗଢ଼ିବା ପାଇଁ ସମସ୍ତେ ଉଦ୍ୟମ ଚଳାଇଲେ । ସ୍ୱାଧିନତା ପରେ ପରେ ରାଜ୍ୟର ବଜେଟ୍ ଲୋକସଂଖ୍ୟାକୁ ଦୃଷ୍ଟିରେ ରଖି ୮୭ କୋଟି ଟଙ୍କାରେ ଥିଲା ଯାହା ବର୍ତ୍ତମାନ ୧ଲକ୍ଷ ୩୨ ହଜାର କୋଟି ଟଙ୍କାରେ ପହଁଚିଲାଣି । ରାଜ୍ୟର ଅଭିବୃଦ୍ଧି ବା ଗ୍ରୋଥ୍ ରେଟ୍ ଭାରତ ବର୍ଷର ଜାତୀୟ ଅଭିବୃଦ୍ଧି ହାରଠାରୁ ଅଧିକ । ଓଡ଼ିଶା ନିର୍ମାଣ ରାଜ୍ୟର କୃଷକ ଓ ଯୁବକମାନଙ୍କୁ ନେଇ ହିଁ କରାଯାଇପାରିବ ବୋଲି ଅର୍ଥମନ୍ତ୍ରୀ ଶଶିଭୂଷଣ ବେହେରା ମତ ରଖିଛନ୍ତି ।