କନକ ବ୍ୟୁରୋ : ନୋଟବନ୍ଦୀ ବା ବିମୁଦ୍ରାକରଣକୁ ୫ ବର୍ଷ ପୂରି ସାରିଛି । ୨୦୧୬ ନଭେମ୍ବର ୮ରେ ପ୍ରଧାନମନ୍ତ୍ରୀ ମୋଦୀ ଦେଶକୁ ସମ୍ବୋଧନ କରିବା ସହ ୫୦୦ ଓ ୧୦୦୦ ଟଙ୍କିଆ ନୋଟ ଅଚଳ ହେବା ନେଇ ଘୋଷଣା କରିଥିଲେ । ଆଉ ମୋଦୀଙ୍କ ଏହି ଘୋଷଣା ପୂରା ଦେଶବାସୀଙ୍କୁ ବେଶ କିଛି ସମୟ ପାଇଁ ଚକିତ କରି ଦେଇଥିଲା । ମୋଦୀଙ୍କ ଏହି ଘୋଷଣାରେ ପ୍ରାୟ ୧୫.୪୧ ଲକ୍ଷ କୋଟି ଟଙ୍କାର ୫୦୦ ଓ ୧୦୦୦ ଟଙ୍କିଆ ନୋଟ ଅଚଳ ହୋଇଯାଇଥିଲା । ଯାହା ଦେଶର ମୋଟ ପ୍ରଚଳିତ ଟଙ୍କାର ୮୬ ପ୍ରତିଶତ ଥିଲା । କିନ୍ତୁ ଏତେ ଅଚଳ ଟଙ୍କା ଗଲା କୁଆଡେ ତାହା ବାବଦରେ ଅନେକ ଥର ଭିନ୍ନ ଭିନ୍ନ କଥା ଶୁଣିବାକୁ ମିଳିଥାଏ ।
Kanak News is now on WhatsApp
Join and get latest news updates delivered to you via WhatsApp
ତେବେ ଜାତୀୟ ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁଯାୟୀ, ଏହି ଅଚଳ ନୋଟରୁ କିଛି ଭାଗ ଦକ୍ଷିଣ ଆଫ୍ରିକା ପଠାଯାଇଥିଲା । ଅଚଳ ହୋଇଯାଇଥିବା ନୋଟର ଓଜନ ହଜାର ହଜାର ଟନ୍ ଥିଲା । କିନ୍ତୁ ଏଥିରୁ ୮୦୦ ଟନର ନୋଟକୁ ପ୍ରୋସେସ କରି ଦକ୍ଷିଣ ଆଫ୍ରିକା ପଠାଯାଇଥିଲା । ଦକ୍ଷିଣ ଆଫ୍ରିକାକୁ ଏହା ପଠାଯିବା ପୂର୍ବରୁ କେରଳର ଏକ ପ୍ଲାଇବୋର୍ଡ ଫ୍ୟାକ୍ଟ୍ରିକୁ ପଠାଯାଇଥିଲା । ଆଉ ଏହିଠାରେ ଏହି ନୋଟକୁ ଟୁକୁଡା ଟୁକୁଡା କରାଯିବା ହାର୍ଡ ବୋର୍ଡ ପ୍ରସ୍ତୁତ କରାଯାଇଥିଲା । ଆଉ ଏହି ହାର୍ଡ ବୋର୍ଡର ବ୍ୟବହାର ଦକ୍ଷିଣ ଆଫ୍ରିକାରେ କ୍ଷତିଗ୍ରସ୍ତ ହୋଇଥିବା ମହାତ୍ମା ଗାନ୍ଧୀଙ୍କ ମୂର୍ତ୍ତିରେ କରାଯାଇଥିଲା ।
ରିପୋର୍ଟ ମୁତାବକ, ଭାରତୀୟ ରିଜର୍ଭ ବ୍ୟାଙ୍କ ଟନ ଟନ୍ ଅଚଳ ନୋଟକୁ ନଷ୍ଟ କରିବା ପାଇଁ ପୂରା ଦେଶରେ ୨୭ଟି ସେଣ୍ଟର ଖୋଲାଯାଇଥିଲା । ଯେଉଁଥିରୁ କେରଳରେ ମଧ୍ୟ ଏକ ସେଣ୍ଟରକୁ ପ୍ରସ୍ତୁତ କରାଯାଇଥିଲା । ବିମୁଦ୍ରାକରଣର ଗୋଟିଏ ମାସ ପୂର୍ବରୁ ଉକ୍ତ ସେଣ୍ଟରକୁ ଅଗ୍ରୀମ ଦିଆଯାଇଥିଲା । ଅଚଳ ଟଙ୍କା ପହଞ୍ଚିବା ପରେ ଏହାକୁ ହାର୍ଡ ବୋର୍ଡ ଏବଂ ସଫ୍ଟ ବୋର୍ଡ ନିର୍ମାଣରେ ବ୍ୟବହାର କରାଯାଇଥିଲା । ୮୦୦ ଟନ୍ ଓଜନର ନୋଟକୁ କାଟିବା ସହ ପାଖାପାଖି ଏକବର୍ଷ ପର୍ଯ୍ୟନ୍ତ ଏଠାରେ ହାର୍ଡ ବୋର୍ଡ ନିର୍ମାଣ ଚାଲିଥିଲା । ନୋଟବନ୍ଦୀ ପୂର୍ବରୁ ଆରବିଆଇ ସହ ମିଶି କାମ କରୁଥିଲା ଉକ୍ତ କମ୍ପାନି । ତେବେ ପରବର୍ତ୍ତୀ ସମୟରେ ଟଙ୍କା ଛପା କାମ ବଦଳରେ ହାର୍ଡବୋର୍ଡ ପ୍ରସ୍ତୁତ କରିବାକୁ ନିଷ୍ପତ୍ତି ନେଇଥିଲା କମ୍ପାନି । ନୋଟବନ୍ଦୀ ପୂର୍ବରୁ ହିଁ କିଛି ଖରାପ ବା ନଷ୍ଟ ହୋଇଯାଇଥିବା ନୋଟକୁ ନଷ୍ଟ କରିବାକୁ ଅକ୍ଟୋବର ୨୦୧୬ରେ ପ୍ରଥମ ଅର୍ଡର ମିଳିଥିଲା ।