କନକ ବ୍ୟୁରୋ: ଆଜିର ଦିନରେ କ୍ରିକେଟକୁ ନେଇ ସମସ୍ତେ ଉତ୍ସାହିତ । ବିଶେଷକରି ଫଟାଫଟ କ୍ରିକେଟର ମଜା ଲୁଟିବାକୁ ଯୁବପୀଢୀମାନେ ବେଶ ପସନ୍ଦ କରୁଛନ୍ତିି । ହେଲେ ଦିନ ଥିଲା କ୍ରିକେଟ ମାନେ କେବଳ ଟେଷ୍ଟ କ୍ରିକେଟକୁ ବୁଝୋଉଥିଲା । କ୍ରିକେଟ ଜନ୍ମ ନେବା ପରଠାରୁ ଦୀର୍ଘ ବର୍ଷ ଧରି ଖେଳାଳିମାନେ ଟେଷ୍ଟ ଫର୍ମାଟରେ କ୍ରିକେଟ୍ ଖେଳିଆସୁଥିଲେ । ହେଲେ ଏବେ କ୍ରିକେଟରୁ ଅନେକ ରୂପ । ଦିନିକିଆ, ଟି-୨୦ ପରେ ଏବେ ବିଶ୍ୱର କିଛି ଯାଗାରେ ଟି-ଟେନ୍ ମ୍ୟାଚ୍ ମଧ୍ୟ ଖେଳାଗଲାଣି ।
Kanak News is now on WhatsApp
Join and get latest news updates delivered to you via WhatsApp
ହେଲେ ୫୦ ବର୍ଷ ତଳେ କେମିତି ଆରମ୍ଭ ହୋଇଥିଲା ଦିନିକିଆ କ୍ରିକେଟ୍, ତା ଆଜି ବି ଅନେକ ଲୋକଙ୍କୁ ଅଜଣା । ତେଣୁ ଆଜି ଆମେ ସେହି ୱାନଡେ କ୍ରିକେଟର ଜନ୍ମକାହାଣୀ ବିଷୟରେ ଆପଣଙ୍କୁ କହିବୁ, ଯାହା ଆପଣ କାହାଠୁ କେବେ ବି ଶୁଣିନଥିବେ । ଦୀର୍ଘ ୫୦ ବର୍ଷ ତଳେ ଅର୍ଥାତ ୧୯୭୧ ମସିହାରେ ଜନ୍ମ ନେଇଥିଲା ଦିନିକିଆ କ୍ରିକେଟ୍ । ତା ପୁଣି ଏକ ଅଜବ ଘଟଣା ଭିତରେ । ୧୯୭୦ ମସିହାରେ ଇଂଲଣ୍ଡ ଦଳ ଆଶେଷ ସିରିଜ୍ ଖେଳିବାକୁ ଅଷ୍ଟ୍ରେଲିଆ ଯାଇଥାଏ । ଦୁଇ ଦଳ ଭିତରେ ସେତେବେଳେ ୬ ମ୍ୟାଚ୍ ବିଶିଷ୍ଟ ଆଶେଷ ସିରିଜ୍ ଖେଳାଯିବାକୁ ଥାଏ । ଏହି ସିରିଜର ପ୍ରଥମ ଦୁଇଟି ମ୍ୟାଚ୍ କିନ୍ତୁ ଡ୍ର ହୋଇଯାଇଥିଲା । ଏହାପରେ ଇଂଲଣ୍ଡ-ଅଷ୍ଟ୍ରେଲିଆ ଭିତରେ ତୃତୀୟ ଟେଷ୍ଟ ପର୍ଥରେ ଖେଳାଗଲା । ହେଲେ ପ୍ରବଳ ବର୍ଷା କାରଣରୁ ଏହି ମ୍ୟାଚ୍ ମଧ୍ୟ ବାତିଲ ହୋଇଯାଇଥିଲା । ତେଣୁ ଏହାର କ୍ଷତିକୁ ପୂରଣ କରିବାକୁ ଯାଇଁ ଉଭୟ ଦେଶର କ୍ରିକେଟ୍ ବୋର୍ଡ ପ୍ରଥମ ଥର ପାଇଁ ୪୦ ଓଭର ବିଶିଷ୍ଟ ଏକ ମ୍ୟାଚ୍ ଆୟୋଜନ କରିବାକୁ ଇଚ୍ଛା କରିଥିଲେ ।
ଆଉ ଏହା ସହିତ ୧୯୭୧ ମସିହା ଜାନୁଆରୀ ୫ ତାରିଖରେ ପ୍ରଥମ ଥର ପାଇଁ ଖେଳାଯାଇଥିଲା ବିଶ୍ୱର ପ୍ରଥମ ଦିନିକିଆ ମ୍ୟାଚ୍ । ଆଉ ଏହି ମ୍ୟାଚ ଦେଖିବାକୁ ସେତେବେଳେ ଲୋକଙ୍କର ପ୍ରବଳ ଆଗ୍ରହ ମଧ୍ୟ ଦେଖିବାକୁ ମିଳିଥିଲା । ସେତେବେଳେ ଏହି ମ୍ୟାଚକୁ ମାତ୍ର ୨୦ ହଜାର ଲୋକ ଦେଖିବେ ବୋଲି ଅନୁମାନ କରାଯାଇଥିଲା । ହେଲେ ମେଲବଣ୍ଣ କ୍ରିକେଟ ଗ୍ରାଉଣ୍ଡରେ ଏହାଠାରୁ ଦୁଇଗୁଣ ଦର୍ଶକଙ୍କ ଭିଡ ଦେଖିବାକୁ ମିଳିଥିଲା । ଏହି ମ୍ୟାଚର ଏପରି ଲୋକପ୍ରିୟତା ଦେଖି ଆଇସିସି ମଧ୍ୟ ଏହାକୁ ଅନ୍ତର୍ଜାତୀୟ କ୍ରିକେଟ ମ୍ୟାଚର ମାନ୍ୟତା ଦେଇଥିଲା । ଆଉ ସେବେଠୁ ଆରମ୍ଭ ହୋଇଥିଲା ଦିନିକିଆ ମ୍ୟାଚ୍ ।
ପ୍ରଥମେ ପ୍ରଥମେ ୱାନଡେ କ୍ରିକେଟ୍ ୬୦ ଓଭର ବିଶିଷ୍ଟ ହେଉଥିଲା । ଅର୍ଥାତ ପ୍ରତିଦଳ ଗୋଟିଏ ଇଂନିସରେ ୬୦ ଓଭର ବ୍ୟାଟିଂ କରୁଥିଲା । ହେଲେ ଲାଇଟ୍ ଅଭାବରୁ ଭାରତ ଭଳି ଉପମହାଦ୍ୱୀପରେ ଏହି ମ୍ୟାଚ୍ ଆୟୋଜନ ସମ୍ଭବ ହେଉନଥିଲା । ସେତେବେଳେ ଷ୍ଟାଡିୟମରେ ଫ୍ଲଡ ଲାଇଟ୍ ଭଳି ସୁବିଧା ମଧ୍ୟ ରହୁନଥିଲା । ତେଣୁ ସମୟ ବଦଳିବା ସହିତ ଏବେ ଦିିନିକିଆ କ୍ରିକେଟ୍ ୫୦ ଓଭର ବିଶିଷ୍ଟ ହେବା ସହିତ ଡେ-ନାଇଟ୍ ମ୍ୟାଚ୍ ବି ଖେଳାଯାଉଛି । ୧୯୭୧ ମସିହାରୁ ଆଜି ପଯ୍ୟନ୍ତ ବିଶ୍ୱର ବିଭିନ୍ନ ଷ୍ଟାଡିୟମରେ ଅନେକ ୱାନଡେ ମ୍ୟାଚ୍ ଖେଳାସରିଲାଣି । ୱାନଡେ ମ୍ୟାଚର ଲୋକପ୍ରିୟତାକୁ ଦେଖି ଆଇସିସି ବିଶ୍ୱକପ୍ କ୍ରିକେଟର ଆୟୋଜନ ମଧ୍ୟ କରୁଛି । ଯାହା ଆଜିର ଦିନରେ କ୍ରିକେଟ ଜଗତର ସବୁଠୁ ବଡ ଟୁଣ୍ଣାମେଂଟ ଭାବେ ଗଣା । ଦିିନିକିଆ ମ୍ୟାଚ୍ ପରେ ଏବେ ଟି-୨୦ ଓ ଟି-ଟେନର ଜମାନା ମଧ୍ୟ ଆରମ୍ଭ ହୋଇଛି..ହେଲେ ଦୀର୍ଘ ୫୦ ବର୍ଷ ଧରି ଦିନିକିଆ ମ୍ୟାଚ ନିଜର ଲୋକପ୍ରିୟତା ବଜାୟ ରଖିଛି ।