କେମିତି ହିସାବ ହୁଏ ନେଟ୍ ରନରେଟ ? ଭାରତର ସେମିଫାଇନାଲ ଆଶାକୁ ବଢାଇଛି, ଦକ୍ଷିଣ ଆଫ୍ରିକାକୁ ବିଶ୍ୱକପରୁ ବିଦା କରିଛି ।
କନକ ବ୍ୟୁରୋ : ଟି-୨୦ ବିଶ୍ୱକପ ଶେଷ ପର୍ଯ୍ୟାୟରେ ପହଞ୍ଚିଲାଣି । ସୁପର-୧୨ ପର୍ଯ୍ୟାୟର ଆଉ କିଛି ମ୍ୟାଚ୍ ବାକି ଥିବା ବେଳେ ୩ଟି ଦଳ ସେମିଫାଇନାଲ ଟିକେଟ ହାତେଇ ସାରିଲାଣି । ଏବେ ସେମିଫାଇନାଲ ରେସରେ ଆଉ ଗୋଟିଏ ସ୍ଥାନ ବାକି ରହିଛି । ଆଉ ଏହି ଟିକେଟ କିଏ ହାତେଇବ ତାହା ଗ୍ରୁପ-୨ରେ ହେବାକୁ ଥିବା ବଳକା ମ୍ୟାଚର ଫଳାଫଳ ସ୍ଥିର କରିବ । କାରଣ ଗ୍ରୁପ-୨ରୁ ଏବେ ଆଫଗାନିସ୍ତାନ, ଭାରତ ଓ ନ୍ୟୁଜିଲାଣ୍ଡ ସେମିଫାଇନାଲ ରେସରେ ରହିଛନ୍ତି । ଯଦି ଆଫଗାନିସ୍ତାନ ନ୍ୟୁଜିଲାଣ୍ଡକୁ ହରାଉଛି ତେବେ ଭାରତ ପାଇଁ ସେମିଫାଇନାଲ ଖେଳିବାର ସମ୍ଭାବନା ସୃଷ୍ଟି ହେବ । କିନ୍ତୁ ଏଥିପାଇଁ ନାମ୍ବିଆ ବିପକ୍ଷରେ ଭାରତକୁ ନିଶ୍ଚିତ ବିଜୟ ଆବଶ୍ୟକ । ଆଉ ଏଭଳି ସ୍ଥଳେ ଉପରୋକ୍ତ ୩ଟି ଟିମର ପଏଣ୍ଟ ସମାନ ରହିବ । ତେଣୁ ରନରେଟ ଆଧାରରେ ସେମିଫାଇନାଲ ଟିକେଟ ମିଳିବ । କିନ୍ତୁ ଆପଣଙ୍କ ମନରେ ପ୍ରଶ୍ନ ଉଠିବା ସ୍ୱାଭାବିକ ଏହି ରନ ରେଟ କଣ ଓ ଏହା କିଭଳି ହିସାବ କରାଯାଏ ।
Kanak News is now on WhatsApp
Join and get latest news updates delivered to you via WhatsApp
ଆଇସିସି ଯେତେବେଳେ ଏକାଧିକ ଟିମକୁ ନେଇ ଟୁଣ୍ଣମେଣ୍ଟ ଆୟୋଜନ କରେ ସେତେବେଳେ ରନ ରେଟର ଗୁରୁତ୍ୱ ଦେଖିବାକୁ ମିଳିଥାଏ । ଖାସକରି ଏବେ ଟି-୨୦ ଫର୍ମାଟରେ ରନ୍ ରେଟର ଗୁରୁତ୍ୱ ଯଥେଷ୍ଟ ଅଧିକ ରହିଛି । କାରଣ ପଏଣ୍ଟ ସମାନ ଥାଇ ସୁଦ୍ଧା ଚଳିତ ବିଶ୍ୱକପର ସେମିଫାଇନାଲ ରେସରୁ ବିଦା ହୋଇଛି ଦକ୍ଷିଣ ଆଫ୍ରିକା । କାରଣ ରନ୍ ରେଟରେ ପଛୁଆ ରହିବା ଦଳକୁ ମହଙ୍ଗା ପଡିଛି ।
ସାଧାରଣତଃ କୌଣସି ଦଳର ରନ୍ ରେଟ ହିସାବ କରିବାକୁ ମ୍ୟାଚର ଦୁଇଟି ପାଳିରେ ଟିମର ପ୍ରଦର୍ଶନ ଦେଖିବାକୁ ପଡିଥାଏ । ବ୍ୟାଟିଂ କରୁଥିବା ବେଳେ ଟିମ୍ କେତେ ଓଭର ଖେଳିଲା ଓ କେତେ ରନ କଲା, ଏବଂ ବୋଲିଂ ସମୟରେ କେତେ ଓଭରରେ କେତେ ରନ୍ ପ୍ରଦାନ କଲେ ତାହା ଆଧାରରେ ରନ୍ ରେଟ ହିସାବ କରାଯାଏ । ଉଦାହରଣ ସ୍ୱରୂପ କୌଣସି ଟିମ୍ ପ୍ରଥମେ ବ୍ୟାଟିଂ କରି ୨୦ ଓଭରରେ ଯଦି ୧୨୦ ରନ୍ କରିଥାଏ ତେବେ ଏହାର ରନ୍ ରେଟ ୬ ରହିଥାଏ । କିନ୍ତୁ ବୋଲିଂରେ ମାତ୍ର ୧୫ ଓଭରରେ ଯଦି ଏହି ରନ ବ୍ୟୟ କରିଦିଏ ତେବେ ରନ୍ ରେଟ ୮ ରହିଥାଏ । ଆଉ ଏଭଳିସ୍ଥଳେ ଦଳର ମୋଟ ନେଟ୍ ରନରେଟ୍ -୨.୦୦୦ରେ ପହଞ୍ଚିଯାଏ । ସେହିଭଳି ଯଦି ୨୦ ଓଭର ବ୍ୟାଟିଂ କରି ଦଳ ୧୨୦ ରନ କରୁଛି, ଏବଂ ୨୦ ଓଭର ବୋଲିଂ କରି ୧୦୦ ରନରେ ପ୍ରତିପକ୍ଷଙ୍କୁ ସୀମିତ ରଖୁଛି ସେତେବେଳେ ବିଜୟୀ ଟିମର ନେଟ ରନରେଟ +୧.୦୦୦କୁ ଚାଲି ଆସିବ ।
ନେଟ ରନରେଟ ହିସାବ : ଟିମର ମୋଟ ସ୍କୋର/ଟିମ ଖେଳିଥିବା ଓଭର- ମୋଟ ରନ୍ ବ୍ୟୟ/ ଓଭର ବ୍ୟୟ
ସେହିଭଳି ମ୍ୟାଚରେ ଦୁଇଟି ଟିମର ରନରେଟ ଯେତେବେଳେ ହିସାବ କରାଯାଏ ସେତେବେଳେ ପରାଜିତ ଟିମର ରନରେଟରୁ ବିଜୟୀ ଟିମର ରନରେଟ ଫେଡିଦେବା ଉଚିତ୍ । ଯଦି ବିଜୟୀ ଟିମର ନେଟ ରନରେଟ ୫ ଥାଏ ଓ ପରାଜିତ ଟିମର ରନ୍ ରେଟ ୪ ଥାଏ ତେବେ ପଏଣ୍ଟ ଟେବୁଲରେ ବିଜୟୀ ଟିମର ନେଟ୍ ରନରେଟ୍ +୧.୦୦୦ ଓ ପରାଜିତ ଟିମର ନେଟ୍ ରନରେଟ -୧.୦୦୦ରେ ରହିଥାଏ । ତେବେ ନେଟ୍ ରନ୍ ରେଟ ହିସାବ କଲା ବେଳେ କୌଣସି ୱିକେଟକୁ ହିସାବ କରାଯାଇନଥାଏ । ତେବେ ପ୍ରତି ମ୍ୟାଚ ପରେ ରନରେଟ ବଦଳିଥାଏ ।