ରାଜ୍ୟର ଶିଳ୍ପସଂସ୍ଥା ଗୁଡିକରେ କେତେ ଓଡ଼ିଆ ନିଯୁକ୍ତି ପାଇଛନ୍ତି ? କ’ଣ ଉତ୍ତର ରଖିଲେ ଶ୍ରମମନ୍ତ୍ରୀ, ପଢ଼ନ୍ତୁ…
କନକ ବ୍ୟୁରୋ: ରାଜ୍ୟର ଶିଳ୍ପସଂସ୍ଥା ଗୁଡ଼ିକରେ କେତେ ସ୍ଥାନୀୟ ଓଡ଼ିଆ ଯୁବକ-ଯୁବତୀ ନିଯୁକ୍ତି ପାଇଛନ୍ତି ସେନେଇ ବିଧାନସଭାରେ ଉତ୍ତର ରଖିଛନ୍ତି ଶ୍ରମମନ୍ତ୍ରୀ ସୁଶାନ୍ତ ସିଂ । ବିଜେପି ବିଧାୟକ ମୋହନ ମାଝୀଙ୍କ ତାରକା ପ୍ରଶ୍ନର ଉତ୍ତର ରଖି ସୁଶାନ୍ତ ସିଂ କହିଛନ୍ତି କି, ରାଜ୍ୟରେ ଥିବା ବିଭିନ୍ନ ଶିଳ୍ପାନୁଷ୍ଠାନରେ ୨ ଲକ୍ଷ ୬୬ ହଜାର ୮୫୪ ଜଣ ନିଯୁକ୍ତି ପାଇଛନ୍ତି ଏବଂ ସେମାନଙ୍କ ମଧ୍ୟରୁ ରାଜ୍ୟ ଭିତରୁ ୨ଲକ୍ଷ ୨୬ ହଜାର ୯୬୧ଜଣ ନିଯୁକ୍ତି ପାଇଛନ୍ତି । ଅର୍ଥାତ୍ ନିଯୁକ୍ତିର ୮୫ ପ୍ରତିଶତ ରାଜ୍ୟ ଭିତରୁ ନିଯୁକ୍ତି ଦିଆଯାଇଛି । ସରକାରଙ୍କ ଚୁକ୍ତି ଅନୁଯାୟୀ ଘରୋଇ ଶିଳ୍ପାନୁଷ୍ଠାନଗୁଡିକ ଅଣକୁଶଳୀ ଓ ଅର୍ଦ୍ଧକୁଶଳୀ ୯୦ ପ୍ରତିଶତ, ପ୍ରଶାସନିକ କ୍ଷେତ୍ରରେ ୪୦ ପ୍ରତିଶତ ଏବଂ କୁଶଳୀ କ୍ଷେତ୍ରରେ ୬୦ ପ୍ରତିଶତ ନିଯୁକ୍ତି ଦେବାର ବ୍ୟବସ୍ଥା ରହିଛି ।
Kanak News is now on WhatsApp
Join and get latest news updates delivered to you via WhatsApp
ସେହିପରି ବିଧାୟକ ମୋହନ ମାଝୀଙ୍କ ଆଉ ଏକ ପ୍ରଶ୍ନର ଉତ୍ତରରେ କହିଛନ୍ତି କି, କେନ୍ଦୁଝର ଜିଲାରେ ୨୨ଟି ଶିଳ୍ପରେ ୧୦ହଜାର ୯୯୨ ଜଣଙ୍କୁ ନିଯୁକ୍ତି ଦିଆଯାଇଛି । ସେଥିରୁ ରାଜ୍ୟରୁ ୯ହଜାର ୩୫୯ ଅର୍ଥାତ୍ ୯୨% ସ୍ଥାନୀୟ ଯୁବତୀଯୁବକଙ୍କୁ ନିଯୁକ୍ତି ଦିଆଯାଇଛି। ଆମ ରାଜ୍ୟରେ ବହୁ ଇଞ୍ଜିନିୟରିଂ କଲେଜ ଓ ଆଇଟିଆଇ ରହିଛି କିନ୍ତୁ ସେ ସବୁ ଜାଗାରେ ବାହାର ଲୋକ ଚାକିରି କରୁଛନ୍ତି । କେନ୍ଦ୍ର ସରକାର ୫ ବର୍ଷରେ ୨ କୋଟି ଯୁବତୀଯୁବକଙ୍କୁ ନିଯୁକ୍ତି ଦେବା ଲାଗି ଘୋଷଣା କରିଥିଲେ । ଗତ ୫ ବର୍ଷରେ ଓଡ଼ିଶାରେ ଥିବା କେନ୍ଦ୍ରୀୟ ସଂସ୍ଥାରେ କେତେଜଣଙ୍କୁ ନିଯୁକ୍ତି ଦିଆଯାଇଛି ବୋଲି ବିଜେଡି ସଭ୍ୟଗଣ ପଚାରିଥିଲେ । ଉତ୍ତରରେ ମନ୍ତ୍ରୀ କହିଥିଲେ ଖୋର୍ଦ୍ଧା ଜିଲ୍ଲାରେ ବିଭିନ୍ନ ଶିଳ୍ପ ସଂସ୍ଥାରେ ୮ ହଜାର ୪୦ ଜଣଙ୍କୁ ନିଯୁକ୍ତି ଦିଆଯାଇଛି । ସେଥିମଧ୍ୟରେ ୭ହଜାର ୫୦୯ ଜଣଙ୍କୁ ରାଜ୍ୟ ଭିତରୁ ଏବଂ ୫୩୧ ଜଣଙ୍କୁ ରାଜ୍ୟ ବାହାରୁ ନିଯୁକ୍ତି ଦିଆଯାଇଛି ।
ସେହିପରି କେନ୍ଦ୍ର ସରକାରଙ୍କ ଅଧିନରେ ଥିବା ବିଭିନ୍ନ ସଂସ୍ଥାରେ କେତେଜଣ ଓଡ଼ିଆଙ୍କୁ ନିଯୁକ୍ତି ଦିଆଯାଇଛି, ସେ ସମ୍ପର୍କରେ ତଥ୍ୟ ନାହିଁ । ନିୟମ ଅନୁସାରେ ୮୫ ପ୍ରତିଶତ ନିଯୁକ୍ତି ରାଜ୍ୟ ଭିତରେ ହୋଇଛି । ତେବେ ପାରାଦୀପରେ କେଉଁ ସଂସ୍ଥାରେ କେତେ ନିଯୁକ୍ତ ହୋଇଛନ୍ତି ତାହାର ତର୍ଜମା କରାଯିବ। ଯଦି ସ୍ଥାନୀୟ ଲୋକଙ୍କୁ ନିଯୁକ୍ତି ଦିଆଯାଇ ନ ଥିବ ତେବେ ଆଇନ ଅନୁସାରେ ପଦକ୍ଷେପ ନିଆଯିବ ବୋଲି ଶ୍ରମମନ୍ତ୍ରୀ ବିଧାନସଭାରେ କହିଛନ୍ତି ।