ଗଣତନ୍ତ୍ରର ଆଉ ଏକ କଳା ଅଧ୍ୟାୟ, ଦେଶରେ ଗୋଟିଏ ବର୍ଷରେ କୁପୋଷିତ ପିଲାଙ୍କ ସଂଖ୍ୟା ୯୧ ପ୍ରତିଶତ ବୃଦ୍ଧି

କନକ ବ୍ୟୁରୋ : ଦେଶରେ ୩୩ ଲକ୍ଷରୁ ଅଧିକ ପିଲା କୁପୋଷଣରେ ଶିକାର । ତାହା ମଧ୍ୟରୁ ୧୭ ଲକ୍ଷରୁ ଅଧିକ ପିଲା ଗମ୍ଭୀର ଭାବେ କୁପୋଷଣରେ ଶିକାର ହୋଇଛନ୍ତି । ସବୁଠାରୁ ଅଧିକ ପୁପୋଷିତ ପିଲା ମହାରାଷ୍ଟ୍ର, ଦ୍ୱିତୀୟରେ ବିହାର ଓ ତୃତୀୟରେ ଗୁଜୁରାଟରେ ରହିଛନ୍ତି । ଏହି ପରିସଂଖ୍ୟାନ କୌଣସି ବେସରକାରୀ ସଂସ୍ଥା ନୁହେଁ ବରଂ ନିଜେ ଭାରତ ସରକାର ଦେଇଛନ୍ତି ।

ମହିଳା ଓ ବାଳ ବିକାଶ ମନ୍ତ୍ରଣାଳୟ ଜାତୀୟ ଗଣମାଧ୍ୟମ ପିଟିଆଇ ସୂଚନା ଅଧିକାର ଆଇନ ବଳରେ ମାଗିଥିବା ତଥ୍ୟର ଜବାବ ଦେଇ ଏହି ପରିସଂଖ୍ୟାନ ଜାରି କରିଛନ୍ତି । ମହିଳା ଓ ବାଳବିକାଶ ମନ୍ତ୍ରଣାୟର ସୂଚନା ମୁତାବକ ୨୦୨୦ ତୁଳନାରେ ୨୦୨୧ ରେ କୁପୋଷିତ ପିଲାଙ୍କ ସଂଖ୍ୟା ସର୍ବାଧିକ ବୃଦ୍ଧି ପାଇଛି ।

ଏନେଇ ମହିଳା ଓ ବାଳବିକାଶ ମନ୍ତ୍ରଣାଳୟ ଚିନ୍ତା ବ୍ୟକ୍ତ କରି କହିଛନ୍ତି କି, କୋଭିଡ ମହାମାରୀ କାରଣ ଗରୀବ ଶ୍ରେଣୀର ଲୋକମାନଙ୍କ ପାଇଁ ମୁସ୍କିଲ ବଢିଛି । ଏହା ସହ ଆଗାମୀ ଦିନରେ ଖାଦ୍ୟ ଓ ସ୍ୱାସ୍ଥ୍ୟ ସଂକଟ ସେମାନଙ୍କ ପାଇଁ ଆହୁରି ଚିନ୍ତାଜନକ ହେବ ବୋଲି କୁହାଯାଇଛି ।

ଗତବର୍ଷ ନଭେମ୍ବର ୨୦୨୦ ରେ ବି ମହିଳା ଓ ବାଳବିକାଶ ମନ୍ତ୍ରଣାଳୟ କୁପୋଷଣ ପରିସଂଖ୍ୟାନ ଜାରି କରିଥିଲେ । ଏହି ପରିସଂଖ୍ୟାନ ମୁତାବକ ନଭେମ୍ବର ୨୦୨୦ ମଧ୍ୟରେ ଦେଶରେ ମୋଟ ୯,୨୭,୬୦୬ ଜଣ ପିଲା କୁପୋଷଣରେ ଶିକାର ହୋଇଥିଲେ । ହେଲେ ଏବେର ପରିସଂଖ୍ୟାନକୁ ତୁଳନା କଲେ ଗତବର୍ଷ ତୁଳନାରେ ଚଳିତ ବର୍ଷ କୁପୋଷିତ ପିଲାଙ୍କ ସଂଖ୍ୟା ୯୧ ପ୍ରତିଶତ ବୃଦ୍ଧି ପାଇଛି । ଏହାର ଉତ୍ତରରେ ମହିଳା ଓ ବାଳବିକାଶ ମନ୍ତ୍ରଣାଳୟ କହିଛି କି କୁପୋଷିତ ପିଲାଙ୍କ ସଂଖ୍ୟା ଗୋଟିଏ ବର୍ଷରେ ଏତେ ବଢିବାର ଦୁଇଟି କାରଣ ରହିଛି । ପ୍ରଥମଟି କରୋନା ମହାମାରୀ ଓ ଦ୍ୱିତୀୟଟି ଯେଉଁ ଆଧାରରେ ସର୍ଭେ କରାଯାଉଛି ।

ବିଶ୍ୱ ସ୍ୱାସ୍ଥ୍ୟ ସଂଗଠନ ମୁତାବକ ବୟସ ତୁଳନାରେ ଉଚ୍ଚତା ଓ ଓଜନ କମ ରହିବା ଓ ବାହୁର ମୋଟେଇ ୧୫ ମିଲିମିଟରରୁ କମ ହୋଇଥିଲେ ସେହି ପିଲାକୁ ଗମ୍ଭୀର କୁପୋଷଣ ଶ୍ରେଣୀରେ ଅନ୍ତର୍ଭୂକ୍ତ କରାଯିବ । ଅନ୍ୟପଟେ ବିଶ୍ୱ ସ୍ୱାସ୍ଥ୍ୟ ସଂଗଠନ ମୁତାବକ କୁପୋଷିତ ପିଲାଙ୍କୁ ରୋଗର ଭୟର ସର୍ବାଧିକ ରହିଥାଏ ।

ପିଟିଆଇକୁ ଆରଟିଆଇ ମାଧ୍ୟମରେ ମିଳିଥିବା ତଥ୍ୟ ମୁତାବକ ମହାରାଷ୍ଟ୍ରରେ କୁପୋଷିତ ପିଲାଙ୍କ ସଂଖ୍ୟା ୬,୧୬,୭୭୨ ହୋଇଥିବା ବେଳେ ସେମାନଙ୍କ ମଧ୍ୟରୁ ୪,୫୮,୭୮୮ ଜଣ ପିଲା ଗମ୍ଭୀର କୁପୋଷଣରେ ଶିକାର ହୋଇଛନ୍ତି । ସେହିଭଳି କୁପୋଷଣ ମାମଲାରେ ଦ୍ୱିତୀୟରେ ରହିଛି ବିହାର । ଏଠାରେ କୁପୋଷିତ ପିଲାଙ୍କ ସଂଖ୍ୟା ୪,୭୫,୮୨୪ ହୋଇଥିବା ବେଳେ ସେମାନଙ୍କ ମଧ୍ୟରୁ ଗମ୍ଭୀର କୁପୋଷିତ ପିଲାଙ୍କ ସଂଖ୍ୟା ୧,୫୨,୦୮୩ ରହିଛି । ଅନ୍ୟପଟେ ଗୁଜୁରାଟରେ ମୋଟ ୩,୨୦େ,୪୬୫ ଜଣ ପିଲା କୁପୋଷଣରେ ଶିକାର ହୋଇଥିବା ବେଳେ ୧,୬୫,୩୬୪ ଜଣ ପିଲା ଗମ୍ଭୀର କୁପୋଷଣରେ ପୀଡିତ ।