କନକ ବ୍ୟୁରୋ: କଳାହାଣ୍ଡିର ଜଣେ ସ୍କୁଲ ଅଧ୍ୟକ୍ଷା ହଠାତ୍ ରାସ୍ତାରୁ ନିଖୋଜ୍ ହେବା ଏବଂ ଏହି ଘଟଣାରେ ଆଜି ମହାଲିଙ୍ଗ୍ ସ୍ଥିତ ଷ୍ଟାଡିୟମରୁ ଏକ ଗଳିତ ଶବ ଉଦ୍ଧାର ହେବା ଏହି ମାମଲାକୁ ଏବେ ଅଧିକ ରହସ୍ୟମୟ କରିଦେଇଛି । ପୋଲିସର ତଦନ୍ତ ଯେତେ ଯେତେ ଆଗକୁ ବଢୁଛି, ଲୋକଙ୍କ ମନରେ ସେତେ ଅଧିକ ପ୍ରଶ୍ନ ତିଆରି ହେଉଛି ।
Kanak News is now on WhatsApp
Join and get latest news updates delivered to you via WhatsApp
ମମିତା ମେହେର ନିଖୋଜ ଘଟଣାରେ ଆଜି ସକାଳୁ ପୋଲିସ ମହାଲିଙ୍ଗ ସ୍ଥିତ ଷ୍ଟାଡିୟମରେ ହଠାତ୍ ଖୋଳାଖୋଳି ଆରମ୍ଭ କରିଥିଲା । ଯେଉଁଠୁ ଏବେ ଗୋଟିଏ ଗଳିତ ଶବ ଉଦ୍ଧାର ହୋଇଛି । ହେଲେ ଏହି ଶବ ଉଦ୍ଧାର ହେବା ସହିତ ଏବେ ସାଧାରଣରେ କେତେକ ପ୍ରଶ୍ନ ମଧ୍ୟ ଉଙ୍କି ମାରିଛି । ମମତାଙ୍କ ଜଣେ ସମ୍ପର୍କୀୟଙ୍କ କହିବା ମୁତାବକ, ଷ୍ଟାଡିୟମରେ ମୃତଦେହ ପୋତା ହୋଇଛି ବୋଲି ପୋଲିସ୍ କେମିତି ଜାଣିବାକୁ ପାଇଲା? ପୋଲିସକୁ ଏ ସମ୍ବନ୍ଧରେ କିଏ ସୂଚନା ଦେଲା? ମୃତଦେହ ପୋତା ଯାଇଥିବା ନିର୍ଦ୍ଧିଷ୍ଟ ସ୍ଥାନକୁ ପୋଲିସ କେମିତି ଜାଣିଲା ବୋଲି ସେ ପ୍ରଶ୍ନ କରିଛନ୍ତି ।
ସୂଚନା ଯୋଗ୍ୟ ଯେ, କଳାହାଣ୍ଡି କେଗାଁ ଥାନା ମହାଲିଙ୍ଗରେ ଥିବା ସନସାଇନ ପବ୍ଲିକ ସ୍କୁଲର ଅଧ୍ୟକ୍ଷା ଥିବା ମମିତା ମେହେର ଗତ ୧୨ ଦିନ ତଳେ ହଠାତ୍ ନିଖୋଜ ହୋଇଯାଇଥିଲେ । ସ୍କୁଲ ମାଲିକ ଗୋବିନ୍ଦ ସାହୁ ମମିତାଙ୍କୁ ସ୍କୁଲକୁ ଡାକିଥିବାବେଳେ, ସେ ସ୍କୁଲ ଯିବା ବାଟରେ ହିଁ ନିଖୋଜ ହୋଇଯାଇଥିଲେ । ଏହାପରେ ପୋଲିସ ଗୋବିନ୍ଦ ସାହୁଙ୍କୁ ଏହି ଘଟଣାରେ ଉଠାଇ ଆଣିଥିଲେ ବି ସେ ପୋଲିସ ହେପାଜତରୁ ଫେରାର୍ ହୋଇଥିଲେ । ଯାହା ପଛରେ ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ହାତ ଥିବା ମମିତା ମେହେରଙ୍କ ପରିବାର ଲୋକେ ଅଭିଯୋଗ କରିଆସୁଛନ୍ତି । ଅନ୍ୟପଟେ ଆଜି ମହାଲିଙ୍ଗ ସ୍ଥିତ ଷ୍ଟାଡିୟମରୁ ଏକ ଗଳିତ ମୃତଦେହ ଉଦ୍ଧାର କରାଯାଇଛି । ଘଟଣାସ୍ଥଳରୁ ଏକ ସୁନା ଚେନ ଓ ପାଉଁଜିକୁ ଜବତ କରିଛି ପୋଲିସ । ତେବେ ଏହି ମୃତଦେହ କାହାର ସେନେଇ ଏପର୍ଯ୍ୟନ୍ତ ପୋଲିସ କୌଣସି ସୂଚନା ଦେଇନି ।