କନକ ବ୍ୟୁରୋ : ଜେଲ ଭିତରେ ବିଭିନ୍ନ କାରଣକୁ ନେଇ କଏଦୀ ମାନଙ୍କ ମଧ୍ୟରେ ସଂଘର୍ଷ ଦେଖା ଦେଇଥାଏ । କେହି କେହି ଆହତ ହୋଇଥାନ୍ତି, ହେଲେ କେହି ମରିବା ଏକ ବିରଳ ଘଟଣା । ହେଲେ ଏବେ ଆମେ ଆପଣଙ୍କୁ ଯେଉଁ ଖବର ଦେବାକୁ ଯାଉଛୁ ତାହା ବିରଳରୁ ବିରଳ । କାରଣ ଜେଲ ଭିତରେ ଗୋଷ୍ଠୀ ସଂଘର୍ଷ ଲାଗି ଏକାବେଳେକେ ୭୫ ଜଣ କଏଦୀଙ୍କ ଜୀବନ ଯାଇଛି । ଯାହା ମଧ୍ୟରେ ରହିଛନ୍ତି ୨୯ ଜଣ ମହିଳା ।
Kanak News is now on WhatsApp
Join and get latest news updates delivered to you via WhatsApp
ଦକ୍ଷିଣ ଆମେରିକୀୟ ରାଷ୍ଟ୍ର ଇକ୍ୱେଡର କାରାଗାରରେ କଏଦୀଙ୍କ ମଧ୍ୟରେ ଗୋଷ୍ଠୀ ସଂଘର୍ଷ ଲାଗି ୭୫ ଜଣଙ୍କର ମୃତ୍ୟୁ ହୋଇଥିବା ବେଳେ ଅନେକ କଏଦୀ ଗୁରୁତର ହୋଇଛନ୍ତି । ଦକ୍ଷିଣ ଆମେରିକୀୟ ରାଷ୍ଟ୍ର ମାନଙ୍କରେ ଥିବା କାରାଗାର ଗୁଡିକରେ ଆବଶ୍ୟକତା ଠାରୁ ବହୁ ଅଧିକ କଏଦୀ ରହିଥା’ନ୍ତି । ଫଳରେ ବିଭିନ୍ନ କାରଣକୁ ନେଇ ସେମାନଙ୍କ ମଧ୍ୟରେ ସବୁବେଳେ ସଂଘର୍ଷ ଘଟିଥାଏ ।
ମଙ୍ଗଳବାର ଦିନ ପଶ୍ଚିମାଞ୍ଚଳ ବନ୍ଦରନଗରୀ ଗୁଆକ୍ୱିଲ ଠାରେ ଥିବା ତିନିଟି କାରାଗାରରେ କୌଣସି କାରଣକୁ ନେଇ କଏଦୀଙ୍କ ମଧ୍ୟରେ ଘମାଘୋଟ ଲଢେଇ ଦେଖିବାକୁ ମିଳିଥିଲା । ଏହି ସଂଘର୍ଷ ଏତେ ଭୟାନକ ଥିଲା କି ଗୁଆକ୍ୱିଲ କାରାଗାରରେ ୨୧ କଏଦୀ, କୁଏନକା କାରାଗାରରେ ୩୩ ଓ ଲାଟାଚୁଙ୍ଗା କାରାଗାରରେ ୩୦ ଜଣ କଏଦୀ ପ୍ରାଣ ହରାଇଛନ୍ତି । ସବୁଠାରୁ ବଡ କଥା ପ୍ରାଣ ହରାଇଥିବା କଏଦୀ ମାନଙ୍କ ମଧ୍ୟରେ ୨୯ ଜଣ ମହିଳା ଥିବା ସୂଚନା ମିଳିଛି ।
ଏହି ଘଟଣାକୁ ନେଇ ରାଷ୍ଟ୍ରପତି ଲେନିନ ମୋରେନୋ ଗଭୀର ଦୁଖ ପ୍ରକାଶ କରିବା ସହ ଏହି ହିଂସାକାଣ୍ଡ ପଛରେ କିଛି ଅପରାଧିକ ସଂଗଠନର ଭୂମିକା ଥିବା କହିଛନ୍ତି । ଏହି ସଂଗଠନ ମାନେ କାରାଗାରରେ ବାରମ୍ବାର ହିଂସାକାଣ୍ଡକୁ ଉସୁକାଉଛନ୍ତି । ଏହାସହ ଏହି ସଂଗଠନ ମାନେ ବିଭିନ୍ନ ନିଶାଦ୍ରବ୍ୟ କାରବାରରେ ସଂପୃକ୍ତ ଅଛନ୍ତି । ସେମାନେ କାରାଗାର ଭିତରେ ନିଶାଦ୍ରବ୍ୟ କାରବାର କରିଥା’ନ୍ତି । ଏହି କାରବାରକୁ ନେଇ ବିିଭିନ୍ନ ସମୟରେ ହିଂସାକାଣ୍ଡ ଦେଖା ଦେଇଥାଏ ।
ଏହି ମର୍ମନ୍ତୁଦ ଘଟଣା ପରେ ରାଷ୍ଟ୍ରପତି ହିଂସା ନିୟନ୍ତ୍ରଣ ପାଇଁ ସେନାକୁ ଦାୟିତ୍ୱ ଦେଇଛନ୍ତି । କହିରଖୁ କି ଇକ୍ୱେଡର ଦେଶରେ ପ୍ରାୟ ୬୦ ରୁ ଅଧିକ କାରାଗାର ରହିଛି । ଏହି କାରାଗାର ମଧ୍ୟରେ ୩୮ ହଜାର କଏଦୀ ରହୁଛନ୍ତି । ହେଲେ ସେମାନଙ୍କ ସୁରକ୍ଷା ଦାୟିତ୍ୱରେ ଥିବା କର୍ମୀଙ୍କ ସଂଖ୍ୟା ମାତ୍ର ୧୫୦୦ । ଅନ୍ୟପଟେ କାରାଗାର ଗୁଡିକ ବେଆଇନ ନିଶାଦ୍ରବ୍ୟ କାରବାରର ପେଣ୍ଠସ୍ଥଳୀ ପାଲଟିଛି । ଖୋଲା ବଜାର ଭଳି ସେଠାରେ ଖୋଲମ ଖୋଲା ନିଶା ଦ୍ରବ୍ୟର କାରବାର ଚାଲିଛି । ଗତବର୍ଷ ବି ଏଭଳି ସଂଘର୍ଷ ଘଟି ୫୧ ଜଣ କଏଦୀଙ୍କର ପ୍ରାଣହାନୀ ଘଟିଥଲା । ଜେଲ ଭିତରେ ଏଭଳି ହିଂସା ପାଇଁ ନିଶା ଓ ନିଶାଦ୍ରବ୍ୟ କାରବାର ମୁଖ୍ୟତ ଦାୟି ବୋଲି ସେଠିକାର ଲୋକମାନେ ମତ ଦେଇଛନ୍ତି ।