ରଥଯାତ୍ରାକୁ ନେଇ ଦୋଛକିରେ ସରକାର ! ଯାତ୍ରା ହେଲେ ସଂକ୍ରମଣର ଭୟ, ଏପଟେ ନହେଲେ କୋଟିକୋଟିଙ୍କ ଭାବାବେଗ ଉପରେ ଆଘାତ । ୧୮ ତାରିଖରେ ଶୁଣାଣି କରିପାରନ୍ତି ସୁପ୍ରିମକୋର୍ଟ ।
କନକ ବ୍ୟୁରୋ: ଦିନ ପାଖଉଛି, ଦ୍ୱନ୍ଦ୍ୱ ବଢୁଛି । ରଥଯାତ୍ରାକୁ ନେଇ ପରିସ୍ଥିତି କିଛି ଏହି ଭଳି । ଆସନ୍ତା ୧୮ ତାରିଖ ଦିନ ସୁପ୍ରିମକୋର୍ଟ ଏନେଇ ଶୁଣାଣି କରିପାରନ୍ତି । କିନ୍ତୁ ଏପଟେ ରଥଯାତ୍ରାକୁ ରହିଲା ଆଉ ମାତ୍ର ୬ ଦିନ । ଓଡିଶା ସରକାର ହାଇକୋର୍ଟରେ କହିଥିଲେ, ରଥଯାତ୍ରାର ଅଳ୍ପଦିନ ପୂର୍ବରୁ ଏନେଇ ଚୂଡାନ୍ତ ନିଷ୍ପତି ନିଆଯିବ । ସେପଟେ ବିରୋଧୀଙ୍କ ସ୍ୱର ତେଜିବାରେ ଲାଗିଛି ଯେ ଖୁବ୍ ଶୀଘ୍ର ସରକାର ନିଷ୍ପତି ଘୋଷଣା କରନ୍ତୁ । କିନ୍ତୁ କହିବାକୁ ଗଲେ ଏହି ନିଷ୍ପତି ଏକ ସାଧାରଣ ନିଷ୍ପତି ନୁହେଁ । ଗୋଟିଏ ପଟେ ମହାମାରୀ କରୋନା ଓ ଅନ୍ୟପଟେ କୋଟି କୋଟି ଭକ୍ତଙ୍କ ଭାବାବେଗ । କଣ ହୋଇପାରେ ସରକାର ଦ୍ୱନ୍ଦ୍ୱରେ ପଡିବାର କାରଣ ?
Kanak News is now on WhatsApp
Join and get latest news updates delivered to you via WhatsApp
ରଥଯାତ୍ରାକୁ ନେଇ କାହିଁକି ଦ୍ୱନ୍ଦ୍ୱରେ ପଡିଛନ୍ତି ଓଡିଶା ସରକାର?
କାହିଁକି ରଥଯାତ୍ରାର ଅଳ୍ପଦିନ ଆଗରୁ ନିଷ୍ପତି ନେବେ ବୋଲି କହିଲେ ସରକାର?
କାରଣ -୧: ରଥଯାତ୍ରା କରିବାକୁ ନିଷ୍ପତି ନେଲେ ମହାମାରୀ ସଂକ୍ରମଣର ଭୟ ରହିଛି । ଭକ୍ତଙ୍କୁ ସାମିଲ ନକଲେ ମଧ୍ୟ ବହୁ ସଂଖ୍ୟାରେ ସେବାୟତ ଏକାଠି ହେବାକୁ ପଡିବ ।
କାରଣ -୨: ଯଦି ରଥଯାତ୍ରା ପରେ ପୁରୀରେ ସଂକ୍ରମଣ ବଢେ, ତେବେ ସରକାରଙ୍କ ଉପରେ ଅଙ୍ଗୁଳି ଉଠିବ । ଏହା ଦ୍ୱାରା ସରକାର ବଦନାମ ହେବାର ଆଶଙ୍କା ରହିଛି ।
କାରଣ-୩: ଏଯାଏଁ କରୋନା ମୁକାବିଲାରେ ଓଡିଶା ସ୍ଥିତି ଭଲ ରହିଛି । ସଂକ୍ରମଣ ବଢିଥିଲେ ମଧ୍ୟ ମୃତ୍ୟୁ ହାର ସାରା ଦେଶ ଅନୁପାତରେ ଢେର କମ୍ ରହିଛି । ଏହି ଲଢେଇକୁ ବେଶ୍ ଗୁରୁତ୍ୱ ଦେଉଛନ୍ତି ସରକାର ।
କାରଣ -୪: ସ୍ନାନଯାତ୍ରାରେ ରାତିରେ ପହଣ୍ଡି ହେବାରୁ ସାମାଜିକ ଦୂରତା କଥା ଲୋକ ଲୋଚନକୁ ଆସିଲା ନାହିଁ । କିନ୍ତୁ ରଥଯାତ୍ରାରେ ଦିନ ପହଣ୍ଡି ଥିବାରୁ ଏହାକୁ କେମିତି ପାଳନ କରାଯିବ ତାହା ବଡ ଚ୍ୟାଲେଂଜ ।
କାରଣ-୫: ସାମାଜିକ ଦୂରତା ନିୟମ ପାଳନ କରିବା ସବୁଠାରୁ ବଡ ଚ୍ୟାଲେଂଜ ହେବ । ଏବଂ ସାମାଜିକ ଦୂରତା ନରହିଲେ, ଆଇନ୍ ଉଲ୍ଲଂଘନ ହେବ. ଯାହାକୁ ସାରା ବିଶ୍ୱ ଦେଖିବ ।
କାରଣ-୬: ଏପଟେ ଯଦି ରଥଯାତ୍ରା କରିବାକୁ ସରକାର ମନା କରିବେ, ତେବେ କୋଟି କୋଟି ଭକ୍ତଙ୍କ ଭାବାବେଗ ଉପରେ ଆଘାତ ଲାଗିବ ।
କାରଣ-୭: ରଥଯାତ୍ରା ନକଲେ ପ୍ରଶ୍ନ ଉଠିପାରେ, ରଥଯାତ୍ରା କରିବାକୁ ସାମର୍ଥ୍ୟ ଥିଲେ ମଧ୍ୟ ସରକାର କାହିଁକି ପଛଘୁଂଚା ଦେଲେ ?
ସରକାରଙ୍କ ଆଗରେ ଏସବୁ ଦ୍ୱନ୍ଦ୍ୱ ରହିଥାଇପାରେ । ସେପଟେ ମାମଲା ଏବେ ସୁପ୍ରିମକୋର୍ଟରେ ରହିଛି । ତେଣୁ ସର୍ବୋଚ୍ଚ ନ୍ୟାୟାଳୟଙ୍କ ଆଦେଶ ସରକାରଙ୍କ କାମକୁ ଟିକିଏ ସହଜ କରିଦେଇ ପାରେ । ସେପଟେ ରଥଯାତ୍ରା ଟାଣିବା ପାଇଁ ଆଗ୍ରହ ପ୍ରକାଶ କରି ମନ୍ତ୍ରୀ ଅରୁଣ ସାହୁଙ୍କୁ ଭେଟିଛନ୍ତି ଦଇତାପତିଙ୍କ ପ୍ରତିନିଧି ଦଳ । ଏସବୁ ଭିତରେ ଏବେ ସମସ୍ତଙ୍କ ନଜର ରହିଛି , ସୁପ୍ରିମକୋର୍ଟ କଣ ନିଷ୍ପତି ନେବେ ।