ଜଣେ ବ୍ୟକ୍ତି ପାଞ୍ଚ ପାଞ୍ଚ ଜଣ ଲୋକଙ୍କୁ ମାରିଲେ କେମିତି ? ମାହାଙ୍ଗା ଗଣହତ୍ୟାକୁ ନେଇ ଉଠିଲା ଅନେକ ପ୍ରଶ୍ନ ।
କନକ ବ୍ୟୁରୋ : ମାହାଙ୍ଗା ଗଣହତ୍ୟା ଘଟଣା ଅନେକ ପ୍ରଶ୍ନ ସୃଷ୍ଟି କରିଛି । ସବୁଠାରୁ ବଡ ସନ୍ଦେହ ହେଉଛି, ଜଣେ ବ୍ୟକ୍ତି ପାଞ୍ଚ ପାଞ୍ଚ ଜଣ ଲୋକଙ୍କୁ ମାରିଲେ କେମିତି । ଏହାପରେ ଅତି ସହଜ ମନରେ ଭିଡିଓ ବନାଇ ଭାଇରାଲ କଲେ କେମିତି । ସେପଟେ କେନ୍ଦ୍ରାଞ୍ଚଳ ଆଇଜି କହିଛନ୍ତି, ହତ୍ୟାକାଣ୍ଡରେ ଆଉ କେହି ମଧ୍ୟ ସାମିଲ ଥାଇ ପାରନ୍ତି ।
Kanak News is now on WhatsApp
Join and get latest news updates delivered to you via WhatsApp
ବଡ ଭାଇର ପୂରା ପରିବାରକୁ ହତ୍ୟା କରିଥିବା ଶିବ ସାହୁ ନିଜ ଦୋଷ ସ୍ୱୀକାର କରିଥିଲେ ବି ଏକ ଭିଡିଓକୁ ନେଇ ସନ୍ଦେହ ସୃଷ୍ଟି ହୋଇଛି । ଭିଡିଓରୁ ଜଣାପଡୁଛି, ପାଂଚ ପାଂଚ ଜଣଙ୍କୁ ହତ୍ୟା କରିବା ପରେ ବି ଶିବ ବିଚଳିତ ନାହାଁନ୍ତି । ଏତେ ବଡ କାଣ୍ଡ ଘଟାଇଥିଲେ ବି ଯେମିତି ସାମାନ୍ୟ ଅପରାଧ ଘଟାଇଥିବା ଭଳି ସ୍ୱାଭାବିକ ଭାବେ ଆଚରଣ କରୁଛନ୍ତି । ଆଉ ଭିଡିଓ କରି ଅତି ସହଜରେ କହି ଦେଉଛନ୍ତି ଜମିବାଡି ବିବାଦ ଓ ପାରିବାରିକ କଳହ ଯୋଗୁଁ ବଡ ଭାଇ ପରିବାରର ପାଂଚ ଜଣଙ୍କୁ ହତ୍ୟା କରିଛନ୍ତି । ଯାହାକୁ ନେଇ ସନ୍ଦେହ ସୃଷ୍ଟି ହୋଇଛି ।
ସ୍ଥାନୀୟ ଲୋକଙ୍କ କହିବା ଅନୁସାରେ ଶିବ ସାହୁ କୌଣସି ପେଶାଦାର ଅପରାଧି ନୁହଁନ୍ତି । ସେ ଜଣେ ସାମାନ୍ୟ ଗାଡି ଚାଳକ । ଦୁଇ ଭାଇଙ୍କ ମଧ୍ୟରେ ପାରିବାରିକ ବିବାଦ ଥିଲା । କିନ୍ତୁ ତାହା ଏମିତି ଏକ ରୂପ ନେବ ତାହା କେହି ବିଶ୍ୱାସ ବି କରିପାରୁନାହାଁନ୍ତି । ଶିବ ସାହୁଙ୍କ ଦୋଷ ସ୍ୱୀକାରକୁ ବି ସହଜରେ ଗ୍ରହଣ କରିପାରୁ ନାହାଁନ୍ତି । ଯେମିତି ହତ୍ୟାକାଣ୍ଡ ଘଟିଛି ଏହା ପଛରେ କେବଳ ଶିବ ନୁହେଁ ଆଉ କିଛିି ଲୋକ ଥିବା ସନ୍ଦେହ ବଢ଼ିବାରେ ଲାଗିଛି । ପାରିପାଶ୍ୱିକ ସ୍ଥିତିକୁ ଦେଖି ପୁଲିସର ମଧ୍ୟ ସନ୍ଦେହ ସୃଷ୍ଟି ହୋଇଛି । ଶିବ ଏକା ଏହି ଜଘନ୍ୟ କାଣ୍ଡରେ ଆଉ କାହାର ସମ୍ପୃକ୍ତି ଅଛି ସେସବୁକୁ ଦୃଷ୍ଟିରେ ରଖି ତଦନ୍ତ କରାଯିବ ବୋଲି କହିଛନ୍ତି ଆଇଜି ।
ତେବେ ପ୍ରଶ୍ନ ଉଠୁଛି,
– ଜଣେ ପାଂଚ ଜଣଙ୍କୁ ମାରିଲେ କେମିତି ?
– ନିଜର ରକ୍ତ ସମ୍ପର୍କୀୟ ପାଂଚ ଜଣଙ୍କୁ ହତ୍ୟା କରିବା ପରେ କେମିତି ବିଚଳିତ ହୋଇନଥିଲେ ଶିବ ?
– କିଏ କରିଥିଲା ଭିଡିଓ ?
– ଶିବଙ୍କୁ ଆଉ କିଏ ସହଯୋଗ କରିଥିଲେ କି ?
ପୋଲିସ ତଦନ୍ତ ପରେ ଏହି ସବୁ ପ୍ରଶ୍ନର ଉତ୍ତର ସାମ୍ନାକୁ ଆସିବ ।