ତେଲ ତାତିରେ ଉଠିଲା ପଡିଲା ବିଧାନସଭା ! ଗୃହ ଭିତରେ ନେତାଙ୍କ ହଙ୍ଗାମା, କିଏ କେତେ ଟିକସ ନେଉଛି ତାହା ଉପରୁ ପରଦା ଉଠାଇଲେ ଅର୍ଥ ସଚିବ
କନକ ବ୍ୟୁରୋ : ତେଲଦର ବୃଦ୍ଧି ପ୍ରତିବାଦରେ ବିଧାନସଭା ଅଚଳ । ଗୃହ ଆରମ୍ଭରୁ ଆଜି ତେଲଦର ବୃଦ୍ଧି ନେଇ ହଟ୍ଟଗୋଳ କରିଥିଲେ କଂଗ୍ରେସ ସଦସ୍ୟ । ଗୃହରେ ପାଟିତୁଣ୍ଡ କରିବା ସହ ବାଚସ୍ପତିଙ୍କ ପୋଡିୟମ ତଳେ କଂଗ୍ରେସ ବିଧାୟକ ନାରାବାଜି କରିଥିଲେ । ଫଳରେ ଗୃହକୁ ବାରମ୍ବାର ମୁଲତବୀ କରିଥିଲେ ବାଚସ୍ପତି । ସ୍ଥିତିରେ କୌଣସି ସୁଧାର ନଆସିବାରୁ ଶେଷରେ ଗୁରୁବାର ଯାଏଁ ଗୃହକୁ ମୁଲତବୀ ରଖିଛନ୍ତି ବାଚସ୍ପତି ।
Kanak News is now on WhatsApp
Join and get latest news updates delivered to you via WhatsApp
କ୍ରମାଗତ ଭାବରେ ବଢ଼ି ଚାଲିଥିବା ତେଲ ଦର ଜନତାଙ୍କୁ ଯେମିତିିି ଅସୁବିଧାରେ ପକାଉଛି, ସେମିତି କେନ୍ଦ୍ର ସରକାରଙ୍କୁ ଘେରିବା ପାଇଁ ବିରୋଧୀଙ୍କୁ ସେତିକି ବଡ ମୌକା ଆଣି ଦେଇଛି । ଯାହାର ପ୍ରତିଫଳନ ଆଜି ବିଧାନସଭାରେ ଦେଖିବାକୁ ମିଳିଛି । ଗୃହର ମଧ୍ୟ ଭାଗରେ କଂଗ୍ରେସ ସଦସ୍ୟମାନେ ତେଲଦର ବୃଦ୍ଧି ପ୍ରତିବାଦରେ ଧାରଣା ଦେବା ଯୋଗୁଁ ପ୍ରଭାବିତ ହୋଇଛି ଗୃହ କାର୍ଯ୍ୟ । ଯାହା ଫଳରେ ଗୃହକୁ ବାରମ୍ବାର ମୁଲବତୀ କରିବାକୁ ପଡ଼ିଛି ।
ଗୃହ ମଧ୍ୟରେ ସଦସ୍ୟଙ୍କ ହଙ୍ଗାମା ଯୋଗୁଁ ବାଚସ୍ପଚିଙ୍କୁ ଦୁଇ ଦୁଇ ଥର ଗୃହକୁ ମୁଲତବୀ କରିବାକୁ ପଡିଥିଲା । ହେଲେ ସ୍ଥିତିରେ କୌଣସି ସୁଧାର ନ ଆସିବାରୁ ଶେଷରେ ଗୁରୁବାର ଯାଏଁ ଗୃହକୁ ମୁଲତବୀ କରିଛନ୍ତି ବାଚସ୍ପତି । ତେଲଦର ବୃଦ୍ଧି ପାଇଁ କଂଗ୍ରେସ, ଉଭୟ କେନ୍ଦ୍ରର ବିଜେପି ସରକାର ଏବଂ ରାଜ୍ୟର ବିଜେଡି ସରକାରଙ୍କୁ ଦାୟୀ କରିଛି । ପେଟ୍ରୋଲଜାତ ଦ୍ରବ୍ୟକୁ କେନ୍ଦ୍ର, ଜିଏସଟି ପରିସର ଭୁକ୍ତ କରିବା ପାଇଁ କଂଗ୍ରେସ ଦାବି କରୁଥିବା ବେଳେ ରାଜ୍ୟ, ଭାଟ୍ କମ୍ କରୁ ବୋଲି ଯୁକ୍ତି ରଖିଛି । ଏପଟେ ବିଜେପି ଓ ବିଜେଡି ପରସ୍ପରକୁ ଦୋଷାରୋପ କରିଛନ୍ତି ।
ରାଜନୀତିର ଏହି ଆରୋପ-ପ୍ରତ୍ୟାରୋପ ଭିତରେ ଅର୍ଥ ସଚିବ, ତୁହିନୀକାନ୍ତ ପାଣ୍ଡେ ରଖିଥିବା ତେଲ ଗଣିତର ପରିସଂଖ୍ୟାନ, କେନ୍ଦ୍ର ସରକାରଙ୍କୁ କାଠଗଡ଼ାରେ ଠିଆ କରିଦେଇଛି । କିଏ କେତେ ଟ୍ୟାକ୍ସ ଦେଉଛି ଏବଂ କିଏ କେତେ କମାଇଛି, ତାର କଚ୍ଚା ଚିଠା ରଖିଛନ୍ତି ଅର୍ଥ ସଚିବ । ପେଟ୍ରୋଲ ଲିଟର ପିଛା କେନ୍ଦ୍ର ସରକାର ୧୯.୪୮ ଟଙ୍କା ନେଉଥିବା ବେଳେ ରାଜ୍ୟ ସରକାର ମାତ୍ର ୧୫.୪୪ ଟଙ୍କା ନେଉଛନ୍ତି । ସେହିଭଳି ଡିଜେଲ ଲିଟର ପିଛା ଉଭୟ ରାଜ୍ୟ ଓ କେନ୍ଦ୍ର ସରକାର ୧୫.୩୩ ଟଙ୍କା ନେଉଛନ୍ତି । ଆଉ ଏସବୁ ମଧ୍ୟରେ ଗୃହ ଭିତରେ ନେତାଙ୍କ ହଙ୍ଗାମା, ଗୃହ ବାହାରେ ଜନତାଙ୍କ ଅସନ୍ତୋଷ । ଆଉ ଏସବୁ ଭିତରେ କ୍ରମାଗତ ୧୧ ଦିନ ହେଲା ବଢ଼ି ଚାଲିଛି ପେଟ୍ରୋଲ ଓ ଡିଜେଲ ଦର ।