ଚିନ୍ତା ବଢାଉଛି କୋଭିଡ୍-୧୯ ସଂକ୍ରମଣ: ବଦଳିପାରେ କରୋନାର ହଟସ୍ପଟ; ବିହାର, ଓଡିଶା, ଉତ୍ତର ପ୍ରଦେଶ ଓ ଉତ୍ତରପୂର୍ବାଂଚଳ ରାଜ୍ୟକୁ ନେଇ ବିଶେଷଜ୍ଞଙ୍କ ଚିନ୍ତା
ଜାତୀୟ ଗଣମାଧ୍ୟମରେ ଚର୍ଚ୍ଚା
କନକ ବ୍ୟୁରୋ: ବିଶେଷଜ୍ଞଙ୍କ ମତରେ କରୋନାର ହଟସ୍ପଟ୍ ବଦଳିବା ସମ୍ଭାବନା ରହିଛି । ବିଭିନ୍ନ ସ୍ଥାନରେ ବଢୁଥିବା ସଂକ୍ରମଣ ଏଭଲି ସମ୍ଭାବନା ସୃଷ୍ଟି କରିଥିବା ନେଇ ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି । ବର୍ତମାନ ସୋଲାପୁର, ଥାଣେ, ନାସିକ, ପାଲଘର, ସୁରଟ, ଦକ୍ଷିଣ କନ୍ନଡର କଂଟେନମେଂଟ ଅଂଚଳରେ ଆକ୍ରାନ୍ତଙ୍କ ସଂଖ୍ୟା ହଜାରେରୁ ଅଧିକ ରହିଛି । ଅନ୍ୟପଟେ ଆଣ୍ଡାମାନ-ନିକୋବର, ଲକ୍ଷାଦୀପ, ଗୋଆ, ଆନ୍ଧ୍ର ପ୍ରଦେଶ ଓ ପୁଡୁଚେରୀ ପରି ସ୍ଥାନରେ ଆକ୍ରାନ୍ତଙ୍କ ସଂଖ୍ୟା ବଢିବାରେ ଲାଗିଛି ।
Kanak News is now on WhatsApp
Join and get latest news updates delivered to you via WhatsApp
ହିସାବ ଅନୁସାରେ ଏସବୁ ସ୍ଥାନରେ ପ୍ରତି ୧୦ ଲକ୍ଷ ଜନସଂଖ୍ୟାରେ ଆକ୍ରାନ୍ତଙ୍କ ସଂଖ୍ୟା ୧୯୦ରୁ ୨୪୯ ମଧ୍ୟରେ ରହୁଛି । ଜୁଲାଇ ୩୦ ଅନୁସାରେ ସକ୍ରୀୟ ଆକ୍ରାନ୍ତ ହିସାବରେ ପୁନେ, ବାଙ୍ଗାଲୁର. ଥାଣେ, ମୁମ୍ବାଇ, ଚେନ୍ନାଇ, ପୂର୍ବ ଗୋଦାବରୀ ଜିଲ୍ଲା ସର୍ବାଧିକ ଆକ୍ରାନ୍ତ ତାଲିକାରେ ରହିଥିଲେ । କିନ୍ତୁ ଧିରେ ଧିରେ ସ୍ଥିତିରେ ପରିବର୍ତନ ଆସୁଛି । ଅନ୍ୟ ରାଜ୍ୟ ତଥା ଜିଲ୍ଲାର ସଂକ୍ରମଣରେ ବୃଦ୍ଧି ପାଉଛି । ଫଳରେ ହଟ୍ସ୍ପଟ ତାଲିକାରେ ଅନ୍ୟ ଜିଲ୍ଲାଗୁଡିକ ନାଁ ଆଗାମୀ ଦିନରେ ଆସିବା ସମ୍ଭାବନା ବଢିଛି ବୋଲି ଜାତୀୟ ଗଣମାଧ୍ୟମରେ ଚର୍ଚା ହେଉଛି । ବିହାର, ଓଡିଶା, ପୂର୍ବ ଉତର ପ୍ରଦେଶ ଓ ଉତର-ପୂର୍ବାଂଚଳ ରାଜ୍ୟଗୁଡିକରେ ସଂକ୍ରମଣ ବୃଦ୍ଧିର ଆଶଙ୍କା ବଢିଛି ।
ତେବେ ଏହି ସବୁ ରାଜ୍ୟରେ କୋଭିଡ ପରୀକ୍ଷା ବୃଦ୍ଧି କରାଯାଉ ନଥିବା ଜଣେ ସ୍ୱାସ୍ଥ୍ୟ ମନ୍ତ୍ରାଳୟ ଅଧିକାରୀ ସୂଚନା ଦେଇଥିବା ଉଲ୍ଲେଖ ରହିଛି । ଏପରିକି ପରୀକ୍ଷା ସଂଖ୍ୟା ବୃଦ୍ଧି କରିବା ପାଇଁ କେନ୍ଦ୍ର ସରକାରଙ୍କ ସ୍ପଷ୍ଟ ନିର୍ଦ୍ଦେଶ ଥିଲେ ମଧ୍ୟ ତାହା କରାଯାଉ ନଥିବା ଏଥିରେ ଉଲ୍ଲେଖ ରହିଛି । ତେବେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀଙ୍କ ଅନୁସାରେ ଦେଶରେ କଂଟାନମେଂଟ ରଣନୀତି ଯୋଗୁଁ ଦେଶକୁ ବହୁତ ଲାଭ ହୋଇଛି । ୫୦ ପ୍ରତିଶତ ୩ଟି ରାଜ୍ୟରୁ ଆସୁଥିବା ବେଳେ ଅବଶିଷ୍ଟ ୩୨ ପ୍ରତିଶତ ଅନ୍ୟ ୭ଟି ରାଜ୍ୟରେ ଚିହ୍ନଟ ହୋଇଛନ୍ତି ।