ମୃତ ରୋଗୀଙ୍କୁ ଔଷଧ ଦେବା ପାଇଁ ଟଙ୍କା ଦାବି କଲା ଘରୋଇ ହସ୍ପିଟାଲ୍ । ଭୁବନେଶ୍ୱରରୁ ଆସିଲା ଚିକିତ୍ସା ନାଁରେ ଶୋଷଣର ସାଂଘାତିକ ଅଭିଯୋଗ, ହସ୍ପିଟାଲ୍ କର୍ତ୍ତୃପକ୍ଷ ଚୁପ୍ ।
କନକ ବ୍ୟୁରୋ : ରାଜଧାନୀ ଭୁବନେଶ୍ୱରରେ ଚିକିତ୍ସା ନାଁରେ ଶୋଷଣର ସାଂଘାତିକ୍ ଅଭିଯୋଗ । ମୃତ ରୋଗୀଙ୍କୁ ଔଷଧ ଦେବା ପାଇଁ ଟଙ୍କା ଦାବି କଲେ ହସ୍ପିଟାଲ କର୍ମଚାରୀ । ଆଉ ରୋଗୀଙ୍କ ସମ୍ପର୍କୀୟଙ୍କୁ ବଢ଼ାଇ ଦେଇଛନ୍ତି ପ୍ରାୟ ୮୦ ହଜାର ଟଙ୍କାର ବକେୟା ବିଲ୍ । ଏନେଇ ମୃତବ୍ୟକ୍ତିଙ୍କ ପୁଅ, ଭୁବନେଶ୍ୱର ଚନ୍ଦ୍ରଶେଖରପୁର ଥାନାରେ ଅଭିଯୋଗ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଫିଲ୍ମ ପରଦାରେ ଦେଖାଯାଉଥିବା ଦୃଶ୍ୟ, କେବଳ କାଳ୍ପନିକ କାହାଣୀ ତାହା ନୁହେଁ ବରଂ ବେଳେବେଳେ ବାସ୍ତବ ଜୀବନ ସହ ଏହା ଏଭଳି ସାମଞ୍ଜସ୍ୟ ରଖେ, ଯାହା ଚିକିତ୍ସା ନାଁରେ ଚାଲିଥିବା ବ୍ୟବସାୟର କାହାଣୀକୁ ପଦାରେ ପକାଇଦିଏ । ଠିକ୍ ଏଭଳି ଏକ ଘଟଣା ଘଟିଛି ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ।
ମୃତ ରୋଗୀଙ୍କ ପାଇଁ ମେଡ଼ିସିନ୍ ! ଔଷଧ ଦେବା ପାଇଁ ଟଙ୍କା ଦାବି । ମରିଯାଇଥିବା ଜଣେ ରୋଗୀଙ୍କୁ ଔଷଧ ଦେବା ଜରୁରୀ କହି, ହସ୍ପିଟାଲ ପକ୍ଷରୁ ଟଙ୍କା ଦାବି କରାଯାଇଥିବା ନେଇ ଅଭିଯୋଗ ହୋଇଛି । ଏନେଇ ଚନ୍ଦ୍ରଶେଖରପୁର ଥାନାରେ ଅଭିଯୋଗ ହୋଇଛି । ମୃତକଙ୍କ ପୁଅଙ୍କ ଅଭିଯୋଗ ଅନୁସାରେ, ସୋମବାର ଦିନ ସାଢେ ୧୧ଟା ବେଳେ ଡାକ୍ତର କହିଲେ, ରୋଗୀଙ୍କ ଅବସ୍ଥା ସଂକଟାପର୍ଣ୍ଣ ଅଛି । ପରେ ଅଧଘଂଟାଏ ପରେ ଅର୍ଥାତ୍ ଦିନ ୧୨ଟାରୁ ଚିକିତ୍ସାଧୀନ ଅବସ୍ଥାରେ ତାଙ୍କ ବାପାଙ୍କର ମୃତ୍ୟୁ ହୋଇଥିବା ଡାକ୍ତର ସୂଚନା ଦେଇଥିଲେ । ହେଲେ ଦିନ ପ୍ରାୟ ୨ରୁ ୩ଟା ବେଳେ ରୋଗୀଙ୍କୁ ଔଷଧ ଦେବା ପାଇଁ ଟଙ୍କା ପଇଠ କରିବା ପାଇଁ ଦାବି ହୋଇଥିଲା ।
ଗଂଜାମ ଜିଲ୍ଲା ବେଲଗୁଣ୍ଠା ଅଂଚଳର ଜଣେ ୬୨ ବର୍ଷିୟ ବ୍ୟକ୍ତି ଜୁଲାଇ ୨୨ ତାରିଖରେ ଶ୍ୱାସକ୍ରିୟ ଜନିତ ସମସ୍ୟା ଯୋଗୁଁ ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ଭର୍ତି ହୋଇଥିଲେ । ସେଠି କରୋନା ପଜିଟିଭ ଜଣାପଡିବା ପରେ ବି ରୋଗୀଙ୍କୁ କୋଭିଡ ହସ୍ପିଟାଲକୁ ସ୍ଥାନାନ୍ତର କରାଯାଇନଥିଲା । ଏବଂ ମୃତ୍ୟୁ ପରେ ବି ଔଷଧ ପାଇଁ ଟଙ୍କା ଦାବି କରାଯାଇଥିବା ନେଇ ଅଭିଯୋଗ ହୋଇଛି ।
ସବୁଠାରୁ ବଡ କଥା ହେଉଛି ଅଣକୋଭିଡ ହସ୍ପିଟାଲରେ କିଭଳି କୋଭିଡ ରୋଗୀଙ୍କ ଚିକିତ୍ସା କରାଯାଉଥିଲା ? କରୋନା ପଜିଟିଭ ରିପୋର୍ଟ ଆସିବା ପରେ ବି କାହିଁକି କୋଭିଡ ହସ୍ପିଟାଲକୁ ସ୍ଥାନନ୍ତର କରାଗଲା ନାହିଁ ? ଏବଂ ମୃତ ବ୍ୟକ୍ତିଙ୍କ ସମ୍ପର୍କୀୟ ଆଣିଥିବା ଅଭିଯୋଗରେ କେତେ ସତ୍ୟତା ରହିଛି ? ସେ ସମ୍ପର୍କରେ ସଂପୃକ୍ତ ହସ୍ପିଟାଲର କୌଣସି ପ୍ରତିକ୍ରିୟା ମିଳିପାରିନାହିଁ ।