କନକ ବ୍ୟୁରୋ : ୨୦୨୪ ଭିତରେ ପାକ୍ ଅଧିକୃତ କାଶ୍ମୀର ବା ପିଓକେ ଭାରତ କବଜାକୁ ଆସିପାରେ । ଏକ ସଭାରେ କେନ୍ଦ୍ରମନ୍ତ୍ରୀ କପିଲ ପାଟିଲ କିଛି ଏଭଳି କହିଛନ୍ତି । କେବଳ ଏତିକି ଆଳୁ, ପିଆଜର ଦାମ କମାଇବା ପାଇଁ ମୋଦୀ ପ୍ରଧାନମନ୍ତ୍ରୀ ହୋଇନାହାନ୍ତି । ଦେଶ ପାଇଁ ସାହସିକ ପଦକ୍ଷେପ ନେଉଥିବା ପ୍ରଧାନମନ୍ତ୍ରୀ ମୋଦୀ ଓ ଗୃହମନ୍ତ୍ରୀ ଅମିତ ଶାହାଙ୍କୁ ମଧ୍ୟ ପ୍ରଂଶସା କରିଛନ୍ତି କେନ୍ଦ୍ରମନ୍ତ୍ରୀ ।

Advertisment

ମହାରାଷ୍ଟ୍ରର ଏକ କାର୍ଯ୍ୟକ୍ରମରେ ଯୋଗ ଦେଇ କପିଲ କହିଛନ୍ତି, ଲୋକେ ପିଆଜ, ଆଳୁ ଦରବୃଦ୍ଧିକୁ ନେଇ ଅଭିଯୋଗ କରୁଛନ୍ତି । କିନ୍ତୁ ପିଜ୍ଜା ଓ ମଟନ କିଣିବାରେ କୁଣ୍ଠାବୋଧ କରୁନାହାନ୍ତି । ତେବେ ମୋଦୀ ପିଆଜ ଓ ଆଳୁ ଦର କମ କରିବାକୁ ପ୍ରଧାନମନ୍ତ୍ରୀ ହୋଇନାହାନ୍ତି । ସବୁ ସାମଗ୍ରୀର ଦର ବଢିବା ପଛର କାରଣ ଜାଣିଲେ ଆପଣ ମଧ୍ୟ ମୋଦୀ ସରକାରଙ୍କୁ ଦୋଷ ଦେବେ ନାହିଁ ।

ଏହାସହ କପିଲ କହିଛନ୍ତି, ନରସିଂହ ରାଓ ଯେବେ ପ୍ରଧାନମନ୍ତ୍ରୀ ଥିଲେ ସେତେବେଳେ ମିଳିତ ସଂସଦ ଅଧିବେଶନ ଡାକିଥିଲେ ଏବଂ ଏଥିରେ ଏକ ବିଲ୍ ପାସ କରାଇଥିଲେ । ଏଥିରେ କାଶ୍ମୀର ବାବଦରେ ଉଲ୍ଲେଖ ଥିଲା । କାଶ୍ମୀରର କିଛି ଅଞ୍ଚଳ ପାକିସ୍ତାନରେ ଥିବାରୁ ଏହା ଦେଶ ପାଇଁ ସମସ୍ୟା ସୃଷ୍ଟି କରୁଛି । ତେଣୁ ଏହାକୁ ପୁଣିଥରେ ଫେରାଇ ଆଣିବାକୁ ପଡିବ, ଯାହାଦ୍ୱାରା କାଶ୍ମୀରକୁ ନେଇ ଦେଖାଦେଉଥିବା ସମସ୍ୟାର ସମାଧାନ ହେବ । ଆଉ ଏବେ ମୋଦୀ ସରକାରରେ ଅମିତ ଶାହାଙ୍କ ଭଳି ଚାଣକ୍ୟ ଅଛନ୍ତି । ଅପେକ୍ଷା କରନ୍ତୁ, ହୋଇପାରେ ୨୦୨୪ ସୁଦ୍ଧା ପାକ୍ ଅଧିକୃତ କାଶ୍ମୀର ବା ପିଓକେ ଭାରତର ହୋଇଯିବ । ଆଉ ଏଭଳି ଆଶା ରଖିବା ନିରର୍ଥକ ମଧ୍ୟ ନୁହେଁ କାରଣ ଏଭଳି କାମ ମୋଦୀ କରିପାରିବେ । ତେଣୁ ଆଳୁ, ପିଆଜ, ଡାଲିର ଦରବୃଦ୍ଧିର ଅଭିଯୋଗରୁ ଆମକୁ ବାହାରକୁ ଆସିବାକୁ ପଡିବ । କୌଣସି ବ୍ୟକ୍ତି ମହଙ୍ଗା ଓ ଜରୁରୀ ସାମଗ୍ରୀର ଦାମ ବୃଦ୍ଧିକୁ ସମର୍ଥନ କରିବେ ନାହିଁ ଏକଥା ସତ । କିନ୍ତୁ ବାସ୍ତବରେ ପ୍ରଧାନମନ୍ତ୍ରୀ ମୋଦୀ ଓ ଅମିତ ଶାହା ହିଁ ଦେଶକୁ ଆଗକୁ ନେବାକୁ କିଛି କରିପାରିବେ ।
ଆଉ ଏଥିପାଇଁ ପ୍ରଧାନମନ୍ତ୍ରୀ ମୋଦୀଙ୍କୁ ଲଗାତାର ଦେଶର ନେତୃତ୍ୱ ନେବାର ଆବଶ୍ୟକତା ରହିଛି । କାରଣ ମୋଦୀ ସରକାରରେ ହିଁ ସିଏଏ ଆଇନ ଆସିଛି. ସମ୍ବିଧାନରୁ ଧାରା ୩୭୦ ଓ ୩୫ ଏ ହଟିଛି । ଆଉ ଏହା ହିଁ ଦର୍ଶାଉଛି ଯେ, ଆସନ୍ତା ୨୦୨୪ ସୁଦ୍ଧା ପିଓକେ ମଧ୍ୟ ଭାରତର ଅଂଶବିଶେଷ ହୋଇ ସାରିଥିବ ।