ସାଇବର ଠକଙ୍କ ନୂଆ ଷ୍ଟାଇଲ୍ । ସାମନାକୁ ଆସିଲା ନାଇଜେରିଆ ଗ୍ୟାଙ୍ଗର ହନିଟ୍ରାପ । ଜର୍ମାନୀ ଯୁବତୀ ଜେନେଫରଙ୍କ ଜାଲରୁ ଅଳ୍ପକେ ବର୍ତିଗଲେ ଭୁବନେଶ୍ୱରର ଯୁବକ
କନକ ବ୍ୟୁରୋ : ଭୁବନେଶ୍ୱର ଖଣ୍ଡଗିରି ଅଂଚଳରେ ରହୁଥିବା ଶୁଭେନ୍ଦୁଙ୍କ ସହ ଜଣେ ବିଦେଶୀ ଯୁବତୀ, ଫେସବୁକ୍ରେ ବନ୍ଧୁତା ସ୍ଥାପନ କରିଥିଲେ । ଯୁବତୀ ଜଣକ ଜଣେ ଜର୍ମାନ ନିବାସୀ ଓ ତାଙ୍କ ନାଁ ଜେନିଫର ୱିଲିୟମ ବୋଲି ପରିଚୟ ଦେଇଥିଲେ । ପ୍ରଥମେ ମେସେଜ୍ ପଠାଇବା ପରେ ଫୋନ ନମ୍ବର ଆଦାନପ୍ରଦାନ ଓ ହ୍ୱାଟ୍ସଆପ୍ରେ ଘଂଟା ଘଂଟା ଚ୍ୟାଟିଂ ।
Kanak News is now on WhatsApp
Join and get latest news updates delivered to you via WhatsApp
ଚାରି ପାଂଚ ଦିନ ମଧ୍ୟରେ ବିଦେଶିନୀଙ୍କ ସହ ବନ୍ଧୁତା ଏତେ ବଢ଼ି ଯାଇଥିଲା ଯେ ଖୁସିରେ ମସଗୁଲ ହୋଇ ଯାଇଥିଲେ ଶୁଭେନ୍ଦୁ । ଜେନିଫର ନାମକ ଏହି ଯୁବତୀ ଯେତେବେଳେ ଭୁବନେଶ୍ୱର ଆସୁଥିବା କହିଥିଲେ, ସେତେବେଳେ ଶୁଭେନ୍ଦୁ ସେତେବେଳେ ଜାଣିନଥିଲେ ଯେ, ସେ ହନିଟ୍ରାପ୍ ବା ଠକଙ୍କ ମଧୁର ଜାଲରେ ସେ ଛନ୍ଦି ହୋଇ ଯାଇଛନ୍ତି ।
କିଛି ଦିନ ପରେ ଶୁଭେନ୍ଦୁଙ୍କୁ ଫୋନ କରି ବିମାନରେ ଭାରତ ଆସୁଛନ୍ତି ବୋଲି ଜଣାଇଲେ ଜେନିଫର । ବିଶ୍ୱାସ ଜନ୍ମାଇବା ପାଇଁ ବିମାନ ଟିକେଟ୍, ବିମାନରେ ବସିଥିବାର ସେଲଫି ପଠାଇଲେ । ଆଉ ଏହା ପରେ ଆରମ୍ଭ ହୋଇଗଲା ଅସଲ ଖେଳ । ଶୁଭେନ୍ଦୁଙ୍କୁ ଫୋନ କଲେ ଜେନିଫର । କହିଲେ, ମୁମ୍ବାଇ ବିମାନ ବନ୍ଦରରେ ସେ ଫସି ଯାଇଛନ୍ତି, ତାଙ୍କ ପାଖରେ ଷାଠିଏ ହଜାର ପାଉଣ୍ଡର ଡ୍ରାଫ୍ଟ ଅଛି, ଯାହାର ଭାରତୀୟ ମୁଦ୍ରାରେ ଆନୁମାନିକ ମୁଲ୍ୟ ୫୮ ଲକ୍ଷ ଟଙ୍କା, ଯାହାକୁ ଭ୍ଙ୍ଗେଇବା ପାଇଁ ୪୫ ହଜାର ୫୦୦ ଟଙ୍କା ଦରକାର ।
ସେହି ଟଙ୍କା ଦେଲେ ସେ ବିମାନ ବନ୍ଦରରୁ ମୁକୁଳିବେ ଓ ଭୁବନେଶ୍ୱରରେ ପହଁଚିଲେ ସେ ଶୁଭେନ୍ଦୁଙ୍କୁ ଟଙ୍କା ଫେରେଇ ଦେବେ ବୋଲି କହିଲେ । ଏଥିସହ ଏକ ବ୍ୟାଙ୍କ ଆକାଉଂଟ ନମ୍ବର ମଧ୍ୟ ଶୁଭେନ୍ଦୁଙ୍କ ନିକଟକୁ ପଠାଇଥିଲେ ଜେନିଫର । ତେବେ ଟଙ୍କା କଥା ଉଠିବାରୁ ସାଇବର ଏକ୍ସପର୍ଟଙ୍କ ସହ ଯୋଗାଯୋଗ କରିଥିଲେ ଶୁଭେନ୍ଦୁ । ତାଙ୍କ ପରାମର୍ଶ କ୍ରମେ ବଡ଼ ଧରଣର ଠକେଇରୁ ସେ ବର୍ତି ଯାଇଥିଲେ ।
ଗୁଗୁଲ ପେ, ଫୋନ ପେ ଆଦି ଜରିଆରେ ଲୋକଙ୍କୁ ଠକିବା ଷ୍ଟାଇଲ୍ ଏବେ ପୁରୁଣା ହୋଇଯିବାୁ ନୂଆ ନୂଆ ଫନ୍ଦି ଆପଣେଇଲେଣି ସାଇବର ଠକ । ନାଇଜେରିଆର ଠକ ଗ୍ୟାଙ୍ଗ୍ ଏହାକୁ ପରିଚାଳନା କରୁଥିବା ଜଣାପଡ଼ିଛି ।