କନକ ବ୍ୟୁରୋ : ଜମ୍ମୁ-କାଶ୍ମୀର ପୁନଃଗଠନ ବିଧେୟକକୁ ନେଇ ସଂସଦରେ ଆଲୋଚନା କରିଛନ୍ତି ଗୃହମନ୍ତ୍ରୀ ଅମିତ ଶାହ । ସଂସଦରେ ଏହି ଆଲୋଚନା ବେଳେ ଅମିତ ଶାହା କଂଗ୍ରେସକୁ ଟାର୍ଗେଟ କରିବାକୁ ଭୁଲିନାହାନ୍ତି । ନିଜ ସମ୍ବୋଧନରେ ଶାହା କହିଛନ୍ତି, ଜମ୍ମୁ-କାଶ୍ମୀରରୁ ଧାରା-୩୭୦ ଉଚ୍ଛେଦ କରିବା ନିଷ୍ପତ୍ତି କିଛି ଲୋକଙ୍କୁ ଖରାପ ଲାଗୁଛି । ଧାରା ୩୭୦ ପାଇଁ ୪୫ ହଜାର ଲୋକ ମୃତ୍ୟୁବରଣ କରିଛନ୍ତି । କିନ୍ତୁ ଏହି ଧାରାକୁ ମୋଦୀ ସରକାର ଉଚ୍ଛେଦ କରିଛନ୍ତି ।
ଅମିତ ଶାହା କହିଛନ୍ତି, ପିଓକେକୁ ନେଇ ଯେଉଁ ସମସ୍ୟା ଅଛି ତାହା ଦିବଙ୍ଗତ ପ୍ରଧାନମନ୍ତ୍ରୀ ଜବାହରଲାଲ ନେହେରୁଙ୍କ ପାଇଁ ସୃଷ୍ଟି ହୋଇଛି । ଯେତେବେଳେ ଭାରତୀୟ ସେନା ବିଜୟୀ ହେଉଥିଲା ସେତେବେଳେ ପଞ୍ଜାବ ପ୍ରଦେଶରେ ପହଞ୍ଚିବା କ୍ଷଣି ସିଜଫାୟାର ଘୋଷଣା କରାଯାଇଥିଲା । ଯାହାଦ୍ୱାରା ପୂରା କାଶ୍ମୀରକୁ ନିଜ ନିୟନ୍ତ୍ରଣକୁ ଆଣିବା ପୂର୍ବରୁ ହିଁ ଅସ୍ତ୍ରବିରତି ଘୋଷଣା କରାଯାଇଥିଲା । ୩ ଦିନ ପରେ ଯଦି ସିଜଫାୟାର କରାଯାଇଥାନ୍ତା ତେବେ ଆଜି ବି ପିଓକେ ଭାରତର ଅଭିନ୍ନ ଅଙ୍ଗ ହୋଇ ରହିଥାନ୍ତା । ତେବେ ଶାହାଙ୍କ ଏହି ବୟାନକୁ ନେଇ ସଂସଦରେ ବିରୋଧୀ ହଙ୍ଗାମା କରିବା ସହ କକ୍ଷତ୍ୟାଗ କରିଛନ୍ତି । ଏହି ବିଲ୍ ସହ ସମ୍ମାନ ଯୋଡି ହୋଇ ରହିଛି । ଏହି ବିଲର ପ୍ରକୃତ ଉଦ୍ଦେଶ୍ୟ ସେହିମାନେ ବୁଝିପାରିବେ ଯେଉଁମାନେ ପଛରେ ରହି ଯାଇଥିବା ଲୋକଙ୍କୁ ପୁଣିଥରେ ହାତ ଧରି ଆଗକୁ ବଢାଇବାକୁ ଚାହୁଁଛନ୍ତି । କିନ୍ତୁ ଏହି ବିଲ ସେମାନଙ୍କ ପାଇଁ ଅଡୁଆ ସୃଷ୍ଟି କରିବ ଯେଉଁମାନେ ଭୋଟବ୍ୟାଙ୍କ ପାଇଁ ଏହାର ଉପଯୋଗ କରୁଥିଲେ ।
#WATCH | Union Home Minister Amit Shah says, "Two mistakes that happened due to the decision of (former PM) Pandit Jawaharlal Nehru due to which Kashmir had to suffer for many years. The first is to declare a ceasefire - when our army was winning, the ceasefire was imposed. If… pic.twitter.com/3TMm8fk5O1
— ANI (@ANI) December 6, 2023
ଧାରା ୩୭୦ ଉଚ୍ଛେଦ କିଛି ଲୋକଙ୍କୁ ଭଲ ଲାଗୁନାହିଁ । ଯେତେବେଳେ ଏହି ଧାରା ଉଚ୍ଛେଦ କରାଗଲା ସେତେବେଳେ କିଛି ଲୋକ କହିଥିଲେ ଏହାଦ୍ୱାରା କାଶ୍ମୀରରେ ରକ୍ତର ନଦୀ ବହିବ । କିନ୍ତୁ ରକ୍ତର ନଦୀ ତ ଛାଡନ୍ତୁ ବରଂ କେହି ପଥର ଉଠାଇବାକୁ ମଧ୍ୟ ସାହସ କରିନଥିଲେ । ଧାରା-୩୭୦କୁ ପୂର୍ବରୁ ହିଁ ହଟାଇବାର ଆବଶ୍ୟକତା ଥିଲା । ପୂର୍ବରୁ କାଶ୍ମୀରର ଲାଲଚୌକରେ ତ୍ରିରଙ୍ଗା ଉଡାଇବାକୁ ଦିଆଯାଉନଥିଲା । ଏବେ କିନ୍ତୁ ପ୍ରତି ଘରେ ତ୍ରିରଙ୍ଗା ଉଡୁଛି । ଯେତେବେଳେ କାଶ୍ମୀର ପଣ୍ଡିତଙ୍କୁ ବିସ୍ଥାପିତ କରାଗଲା, ସେତେବେଳେ ସେମାନେ ନିଜ ଦେଶରେ ଶରଣାର୍ଥୀ ଜୀବନ କାଟିବାକୁ ବାଧ୍ୟ ହେଲେ । ଏବେ ଲକ୍ଷାଧିକ ଲୋକ ବିସ୍ଥାପିତ ଜୀବନ କାଟୁଛନ୍ତି । ସେମାନଙ୍କୁ ନିଜ ଅଧିକାର ଫେରାଇଦେବାକୁ ଏହି ନୂଆ ବିଲ୍ ଆସିଛି । ଯାହାଦ୍ୱାରା ସେମାନଙ୍କୁ ମଧ୍ୟ ପ୍ରତିନିଧିତ୍ୱ କରିବାକୁ ସୁଯୋଗ ମିଳିବ ।