କନକ ବ୍ୟୁରୋ : ଶନିବାର ଚଳିତ ବିଶ୍ୱକପର ଶେଷ କ୍ଲାସିଫିକେସନ ମ୍ୟାଚରେ ବିଜୟ ସହ ସମ୍ମାନ ରକ୍ଷା କରିଛି ଭାରତ । ନିଜର ଦୁଇ କ୍ଲାସିଫିକେସନ ମ୍ୟାଚ ଜିତି ଦଳ ନବନ ସ୍ଥାନରେ ରହିଛି । ଗତ ୨୬ ତାରିଖରେ ଜାପାନଙ୍କୁ ୮-୦ରେ ହରାଇଥିବା ଭାରତ ଗତକାଲି ଦକ୍ଷିଣ ଆଫ୍ରିକାକୁ ୫-୨ ଗୋଲରେ ହରାଇଛି । ଏପଟେ ଆର୍ଜେଣ୍ଟିନା ୱେଲ୍ସକୁ ହରାଇ ଭାରତ ସହ ଯୁଗ୍ମ ଭାବେ ନବମ ସ୍ଥାନରେ ରହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମ୍ୟାଚ୍ ଆରମ୍ଭରୁ ଶନିବାର ଭାରତୀୟ ଖେଳାଳି ଆକ୍ରମଣ ଆରମ୍ଭ କରିଥିଲେ। ଚତୁର୍ଥ ମିନିଟ୍ରେ ଅଭିଷେକ ଏକ ଚମତ୍କାର ଫିଲ୍ଡ ଗୋଲ୍ ଦେଇ ଦଳକୁ ୧-୦ରେ ଆଗୁଆ କରିଥିଲେ । ଏହାପରେ ହର୍ମନପ୍ରୀତ ସିଂହ ୧୧ତମ ମିନିଟ୍ରେ ଏକ ପେନାଲଟି କର୍ଣ୍ଣର୍କୁ ଗୋଲ୍ରେ ରୂପାନ୍ତରିତ କରିଥିଲେ । ଫଳରେ ଦଳ ୨-୦ରେ ଆଗୁଆ ରହିଥିଲା । ଦ୍ବିତୀୟ କ୍ବାର୍ଟର ଶେଷ ସୁଦ୍ଧା ସ୍କୋର୍ରେ କୌଣସି ପରିବର୍ତ୍ତନ ଆସିନଥିଲା। ତେବେ ତୃତୀୟ କ୍ବାର୍ଟରରେ ଭାରତୀୟ ଖେଳାଳି ଆକ୍ରମଣକୁ ଶାଣିତ କରିଥିଲେ । ସାମସେର ସିଂହ ଓ ଆକାଶଦୀପ ସିଂହ ଗୋଟିଏ ଲେଖାଏଁ ଗୋଲ୍ ଦଳର ବ୍ୟବଧାନକୁ ୪-୦କୁ ବୃଦ୍ଧି କରିଥିଲା । କିନ୍ତୁ ଆକାଶଦୀପଙ୍କ ଗୋଲ୍ର କେଇ ସେକେଣ୍ଡ୍ ପରେ ଦକ୍ଷିଣ ଆଫ୍ରିକାର ସେମକେଲୋ ମିମ୍ବି ଗୋଟିଏ ଫିଲ୍ଡ ଗୋଲ୍ ଦେଇ ବ୍ୟବଧାନକୁ ହ୍ରାସ କରିଥିଲେ। ମ୍ୟାଚ୍ର ୫୮ତମ ମିନିଟ୍ରେ ସୁଖଜିତ ସିଂହ ଆଉ ଏକ ଗୋଲ୍ ଦେଇ ସ୍କୋର୍କୁ ୫-୧କୁ ଆଣିଥିଲେ ।
ତେବେ ମ୍ୟାଚ୍ର ଶେଷ ମିନିଟ୍ରେ ଦକ୍ଷିଣ ଆଫ୍ରିକା ଏକ ପେନାଲ୍ଟି ଷ୍ଟ୍ରୋକ୍ ସୁଯୋଗ ପାଇଥିଲା । ଏହାକୁ କିନ୍ତୁ ମୁସ୍ତାଫା କାସିମ ହାତଛଡ଼ା ନକରି ଗୋଲ୍ରେ ପରିଣତ କରିଥିଲେ। ମ୍ୟାଚ୍ ଶେଷ ସୁଦ୍ଧା ଦକ୍ଷିଣ ଆଫ୍ରିକା ମାତ୍ର ଦୁଇଟି ଗୋଲ୍ ପରିଶୋଧ କରିବାରୁ ୨-୫ରେ ପରାସ୍ତ ହୋଇଥିଲା । ଏହି ମ୍ୟାଚ୍ରେ ଭାରତ ମୋଟ୍ ୭ଟି ପେନାଲଟି କର୍ଣ୍ଣର୍ ସୁଯୋଗ ପାଇଥିଲା । ଅପରପକ୍ଷରେ ଦକ୍ଷିଣ ଆଫ୍ରିକା ଦୁଇଟି ପେନାଲଟି କର୍ଣ୍ଣର୍ ସୁଯୋଗ ପାଇଥିଲେ ମଧ୍ୟ ଭାରତୀୟ ରକ୍ଷଣଭାଗ ତାକୁ ସଫଳତାର ସହ ରୋକିଥିଲେ । ଏତଦ୍ବ୍ୟତୀତ ଏହି ମ୍ୟାଚ୍ରେ ଭାରତୀୟ ଦଳର ଉପଅଧିନାୟକ ଅମିତ ରୋହିଦାସ ଓ ସୁଖଜିତ ସିଂହ ୟେଲୋ କାର୍ଡ ପାଇଥିବା ବେଳେ ନୀଳକାନ୍ତ ଶର୍ମା ଗ୍ରିନ୍ କାର୍ଡ ପାଇଥିଲେ । ସେହିଭଳି ଦକ୍ଷିଣ ଆଫ୍ରିକାର ନିକୋଲାସ ସ୍ପୁନର ଓ ନୋବିଲ୍ ଏନ୍ଟୁଲି ଗ୍ରିନ୍ କାର୍ଡ ପାଇଥିଲେ ।