ବଳିପଡ଼ିଥିବା ଛେନାରୁ ବିଶ୍ୱସ୍ତରୀୟ ‘ଛେନାପୋଡ଼’ ! ଇତିହାସ, ପ୍ରସ୍ତୁତି ଓ ପରିଚିତିକୁ ନେଇ ଏକ ରୋଚକ କାହାଣୀ...

କନକ ବ୍ୟୁରୋ: ଛେନାପୋଡ଼ର ଇତିହାସ, ପ୍ରସ୍ତୁତି ଓ ତାର ପରିଚିତିକୁ ନେଇ ରହିଛି ଏକ ରୋଚକ କାହାଣୀ । ଛେନାପୋଡର ପ୍ରସ୍ତୁତି ଏବଂ ଏହାର ଆରମ୍ଭ ଦିନର କଥା ବେଶ ରୋଚକ । କିଭଳି ଏବଂ କେଉଁ ପରିସ୍ଥିତିରେ ଛେନା ନଷ୍ଟ ହୋଇଯିବା ଆଶଙ୍କାରେ ଏହାକୁ ନୂଆ ଢଙ୍ଗରେ ପ୍ରସ୍ତୁତି କରିବା ବେଳେ ଏହା ଛେନାପୋଡର ରୂପ ନେଇଗଲା, ତାକୁ ବଖାଣିଛନ୍ତି ମିଠାର ସ୍ରଷ୍ଟା ସୁଦର୍ଶନ ସାହୁଙ୍କ ପୁଅ ସୁମ୍ ସାହୁ । ସୁମ୍ କହିଛନ୍ତି କି, ଦିନେ ବଳିପଡିଥିବା ଛେନାକୁ ବ୍ୟବହାର କରିବାକୁ ଯାଇ ସୁଦର୍ଶନ ସାହୁ କରିଥିବା ଉଦ୍ୟମ ଆଜି ଛେନାପୋଡର ରୂପ ନେଇ ଲୋକ ମାନଙ୍କ ହୃଦୟର ବେଶ ନିକଟତର ହୋଇପାରିଛି । ଖାଲି ନୟାଗଡ ନୁହେଁ, ପୁରା ରାଜ୍ୟରେ, ଦେଶରେ ଏପରିକି ବିଦେଶରେ ମଧ୍ୟ ଏହା ବେଶ ଆଦୃତି ଲାଭ କରିଛି । ଏବେ ନୟାଗଡ ଛେନାପୋଡକୁ ବିଶ୍ୱସ୍ତରୀୟ କରାଇବା ପାଇଁ ଆରମ୍ଭ ହୋଇଛି ଉଦ୍ୟମ ।

ଏପ୍ରିଲ ୧୧ ଅବା ଆଜିର ଦିନକୁ ଛେନାପୋଡ ଦିବସ ଭାବେ ପାଳନ କରିବା ପାଇଁ ସୋସିଆଲ ମିଡିଆରେ ହାସଟ୍ୟାଗ୍ ଛେନାପୋଡ଼ ଦିବସ ଟ୍ରେଣ୍ଡ୍ ହେବାରେ ଲାଗିଛି । କାରଣ ଆଜି ଛେନାପୋଡର ସ୍ରଷ୍ଟା ଭାବେ ପରିଚିତ ସୁଦର୍ଶନ ସାହୁଙ୍କ ଜନ୍ମଦିନ । ତେଣୁ ପଖାଳ ଦିବସ ଓ ରସଗୋଲା ଦିବସ ପରି ଛେନାପୋଡ ଦିବସକୁ ପାଳନ କରି ଏହି ମିଠାର ଗ୍ରହଣୀୟତା ଜାତୀୟ ଅନ୍ତର୍ଜାତୀୟ ସ୍ତରରେ ପହଞ୍ଚାଇବା ପାଇଁ ଉଦ୍ୟମ କରିବାକୁ ସୋସିଆଲ ମିଡିଆରେ ଚେଷ୍ଟା ଆରମ୍ଭ ହୋଇଛି ।

ପଖାଳ ଦିବସ, ରସଗୋଲା ଦିବସ ଭଳି ଛେନାପୋଡ ଦିବସ ପାଳନ କରିବାକୁ ସୋସିଆଲ ମିଡିଆରେ ଚର୍ଚ୍ଚା ଜୋର୍ ଧରିଥିବା ବେଳେ, କେଉଁ ତାରିଖରେ ଏହା ପାଳନ ହେବ ସେନେଇ ଏକାଧିକ ମତ ସାମ୍ନାକୁ ଆସିଥିଲା । ଏହାରି ଭିତରେ ଛେନାପୋଡର ସ୍ରଷ୍ଟା ସୁଦର୍ଶନ ସାହୁଙ୍କ ଜନ୍ମଦିବସକୁ ଛେନାପୋଡ ଦିବସ ଭାବେ ଉତ୍ସର୍ଗ କରିବାକୁ ଏକାଧିକ ସଂସ୍ଥା, ଅନୁଷ୍ଠାନ ଏବଂ ବ୍ୟକ୍ତିବିଶେଷ ଅଣ୍ଟା ଭିଡ଼ିଥିଲେ । ଏହି କ୍ରମରେ ସୁଦର୍ଶନଙ୍କ ଜନ୍ମ ତାରିଖ ଏପ୍ରିଲ ୧୧କୁ ତଥା ଆଜିର ଦିନକୁ ବିଶ୍ୱ ଛେନାପୋଡ ଦିବସ ଭାବେ ପାଳନ କରିବାକୁ ସୋସିଆଲ ମିଡ଼ିଆରେ ଟ୍ରେଣ୍ଡ୍ ହେଉଛି । ଆଉ ଏଭଳି ଉଦ୍ୟମକୁ ନୟାଗଡରୁ ନୂଆପଡ଼ା, କେଉଁଝରରୁ କେନ୍ଦ୍ରାପଡ଼ା ସବୁଠି ମିଳୁଛି ଢେର ପ୍ରଶଂସା ।