କନକ ବ୍ୟୁରୋ: ଓଡିଶାର ଜୀବନ ରେଖା, ମହାନଦୀରେ ଚଳିତ ବର୍ଷ ପ୍ରଥମ ଥର ପାଇଁ ବନ୍ୟା ଆଶଙ୍କା ସୃ୍ଷ୍ଟି ହୋଇଛି । ବିପଦସଂକେତ ତଳେ ଜଳସ୍ତର ରହିଥିଲେ ବି ହୀରାକୁଦରୁ ଆସୁଥିବା ପାଣି ପହଁଚିବା ପରେ, ମୁଣ୍ଡୁଳିଠାରେ ସାଢ଼େ ସାତ ଲକ୍ଷରୁ ୮ ଲକ୍ଷ କ୍ୟୁସେକ୍ ଜଳ ପ୍ରବାହିତ ହେବାର ଆଶଙ୍କା ରହିଛି । ଯାହାକି ମହାନଦୀର ଅବବାହିକାରେ ଥିବା ତଳିଆ ଅଂଚଳରେ ବନ୍ୟା ଆଣିବାର ଆଶଙ୍କା ରହିଛି ।
Kanak News is now on WhatsApp
Join and get latest news updates delivered to you via WhatsApp
ମହାନଦୀରୁ ବଡ ବିପଦ ନଥିବା ସରକାର କହୁଥିଲେ ବି ମହାନଦୀ ତଳ ମୁଣ୍ଡରେ ଥିବା କଟକ, ପୁରୀ, କେନ୍ଦ୍ରାପଡା, ଓ ଜଗସିଂହପୁର ଜିଲ୍ଲାର ବିଭିନ୍ନ ଅଂଚଳରେ ପାଣି ପଶିବା ଆଶଙ୍କାକୁ ଏଡାଇ ହେବ ନାହିଁ ।
କେନ୍ଦ୍ରାପଡାର ମହାକାଳପଡା, ଗରଦପୁର, ଡେରାବିଶ୍, ମାର୍ଶାଘାଇ ଓ କେନ୍ଦ୍ରାପଡା ବ୍ଲକର ତଳିଆ ଅଂଚଳ ପ୍ରଭାବିତ ହେବାର ଆଶଙ୍କା ରହିଛି । କଟକର ଆଠଗଡ, ବାଙ୍କି, ସାଲେପୁର, କିଶନଗର ଓ ନିଆଳି ବ୍ଲକର ବିଭିନ୍ନ ତଳିଆ ଅଂଚଳକୁ ଭୟ ରହିଛି । ଜଗତସିଂହପୁରର ରଘୁନାଥପୁର, ତିର୍ତୋଲ, ଧୋୟା ଅଂଚଳକୁ ଭୟ ରହିଛି । ସେହିପରି ପୁରୀ ଜିଲ୍ଲାର କଣାସ, ସତ୍ୟବାଦୀ, କାକଟପୁର, ନିମାପଡ଼ା ଓ ପିପିଲି ବ୍ଲକର ତଳିଆ ଅଂଚଳରେ ପାଣି ପଶିବାର ଆଶଙ୍କା ସୃଷ୍ଟି ହୋଇଛି ।
ବର୍ଷା କମିଥିଲେ ବି ବଙ୍ଗୋପସାଗରରେ ଲଘୁଚାପ ସୃଷ୍ଟି ହେବା ସମ୍ଭାବନା ଚିନ୍ତାର କାରଣ ହୋଇଛି । ସେହିପରି ଆଗକୁ ପୂଣ୍ଣମି ଥିବାରୁ ସମୁଦ୍ରକୁ ନଦୀ ଜଳ ନିଷ୍କାସନ ହେବାର ସମସ୍ୟା ହୋଇପାରେ । ଯାହାକି ତଳିଆ ଅଂଚଳ ପାଇଁ ବିପଦର କାରଣ ହୋଇପାରେ ।
ଭଲ ଖବର ହେଉଛି ଛତିଶଗଡରେ ବର୍ଷା କମିବା ଯୋଗୁଁ କଲମା ବ୍ୟାରେଜରୁ ମହାନଦୀକୁ ଜଳ ନିଷ୍କାସନ ପରିମାଣ କମି ଯାଇଛି । ଫଳରେ ହୀରାକୁଦ ଜଳଭଣ୍ଡାରକୁ କମ୍ ପାଣି ଆସୁଛି । ଯାହାଫଳରେ ହୀରାକୁଦର ଅଧିକ ଗେଟ୍ ଖୋଲିବା ସମ୍ଭାବନା ଆଉ ନାହିଁ । ଆଗକୁ କିଛି ଗେଟ୍ ମଧ୍ୟ ବନ୍ଦ କରାଯାଇପାରେ ।