କରୋନା ପାଇଁ କୋକୁଆ ଭୟ : ୮୪ ହଜାର କୋଟିରୁ ଅଧିକ ଟଙ୍କା ନଷ୍ଟ କରିଦେବ ଚୀନ୍!
କରୋନା ଭାଇରସର କରୁଣ ପରିଣତି ଭୋଗୁଛି ଚୀନ୍ । କେବଳ ଚୀନ୍ ନୁହେଁ ଏହି ପ୍ରାଣଘାତୀ ଭାଇରସ ପୂରା ବିଶ୍ୱରେ ଆତଙ୍କ ଖେଳାଇଛି । ଏହି ଭାଇରସ ଏବେ ୧୮୦୦ରୁ ଅଧିକ ଲୋକଙ୍କ ଜୀବନ ନେଇଥିବା ବେଳେ କେବଳ ଚୀନରେ ମୃତାହତଙ୍କ ସଂଖ୍ୟା ୧୭୫୦ରୁ ଅଧିକ । ପୂରା ବିଶ୍ୱରେ ୭୨ ହଜାର ଲୋକ ଏହି ଭାଇରସରେ ସଂକ୍ରମିତ ହୋଇ ଜୀବନ ଓ ମୃତ୍ୟୁ ସହ ଲଢେଇ କରୁଥିବା ବେଳେ କେବଳ ଚୀନରେ ଏହି ସଂଖ୍ୟା ୭୦ ହଜାରରୁ ଅଧିକ ରହିଛି । ଏଭଳି ସ୍ଥିତିରେ ଚୀନରେ ମାସ୍କ ମିଳୁନଥିବା ବେଳେ ରୋଗୀମାନଙ୍କ ପାଇଁ ପର୍ଯ୍ୟାପ୍ତ ଔଷଧ ନଥିବା ବିଭିନ୍ନ ରିପୋର୍ଟରେ ସାମ୍ନାକୁ ଆସୁଛି । ମୋଟାମୋଟି ଭାବେ କହିବାକୁ ଗଲେ କରୋନା ଭାଇରସ ଚୀନ୍ ପାଇଁ ଘାତକ ସାବ୍ୟସ୍ତ ହୋଇଛି । କାରଣ କରୋନା ଭାଇରସରେ ମଣିଷ ସଂକ୍ରମିତ ହେବା ସହ ଚୀନର ଅର୍ଥବ୍ୟବସ୍ଥା ମଧ୍ୟ ଗୁରୁତର ଭାବେ ପ୍ରଭାବିତ ହୋଇଛି । ଆଉ ଏଭଳିସ୍ଥଳେ କରୋନା ଭାଇରସରେ ସଂକ୍ରମିତ ବ୍ୟକ୍ତି ବ୍ୟବହାର କରିଥିବା ହଜାର ହଜାର କୋଟି ଟଙ୍କା ଚୀନ୍ ନଷ୍ଟ କରିବାକୁ ଯାଉଛି ।
Kanak News is now on WhatsApp
Join and get latest news updates delivered to you via WhatsApp
କରୋନା ସଂକ୍ରମିତ ବ୍ୟକ୍ତି ବ୍ୟବହାର କରିଥିବା ନୋଟ ଗୁଡିକୁ ନଷ୍ଟ କରିବାକୁ ଚୀନ ସରକାର ପ୍ରୟାସ ଆରମ୍ଭ କରିଛନ୍ତି । ଏଥିପାଇଁ ନୋଟ୍ ବଦଳାଇବା ପ୍ରକ୍ରିୟା ଆରମ୍ଭ ହୋଇଛି । ଚୀନର ସେଣ୍ଟ୍ରାଲ ବ୍ୟାଙ୍କର କହିବା ଅନୁଯାୟୀ, ବଜାରରୁ ଆସିଥିବା ନୋଟ ଗୁଡିକୁ ଖୁବଶୀଘ୍ର ନଷ୍ଟ କରାଯିବ । ଖାସକରି ହସ୍ପିଟାଲ, ବଜାର ଓ ବସରୁ ଅଣାଯାଇଥିବା ନୋଟ ଗୁଡିକୁ ନଷ୍ଟ କରିବା ଉପରେ ଗୁରୁତ୍ୱ ଦେଇଛି ବ୍ୟାଙ୍କ୍ ।
ସେହିଭଳି ପିପୁଲ୍ସ ବ୍ୟାଙ୍କ୍ ଅଫ୍ ଚାଇନା ମଧ୍ୟ ସମସ୍ତ କାଗଜ ନୋଟକୁ ନଷ୍ଟ କରିବାକୁ ଆଦେଶ ଦେଇଛି । ତେବେ ଚୀନ୍ ସେଣ୍ଟ୍ରାଲ ବ୍ୟାଙ୍କ୍ କେତେ ଟଙ୍କା ନଷ୍ଟ କରିବାକୁ ନିଷ୍ପତି ନେଇଛି ତାହା ଏଯାଏଁ ସ୍ପଷ୍ଟ ହୋଇନାହିଁ । ତେବେ କାଗଜ ଟଙ୍କାକୁ ନଷ୍ଟ କରିବା ପୂର୍ବରୁ ୧୭ ଜାନୁଆରୀରୁ ଏବେ ପର୍ଯ୍ୟନ୍ତ ପୂରା ଦେଶରେ ୬୦୦ ବିଲିୟନ ୟୁଆନ ଭାରତୀୟ ମୁଦ୍ରାରେ ପାଖାପାଖି ୬.୧୧ ଲକ୍ଷ କୋଟି ନୂଆ ଟଙ୍କା ବଜାରକୁ ଛାଡିଛି । ଏଥିରୁ ୪ ବିଲିୟନ ୟୁଆନ ଅଥାର୍ତ ୨୮ ହଜାର ୫୮୧ କୋଟି ଟଙ୍କାର ନୂଆ ନୋଟ କେବଳ ବୁହାନ ଅଞ୍ଚଳକୁ ପଠାଯାଇଛି ।
ଚୀନର ସେଣ୍ଟ୍ରାଲ ବ୍ୟାଙ୍କ୍ ଅନୁଯାୟୀ, ପୂର୍ବରୁ ବଜାରରେ ଥିବା କାଗଜ ଟଙ୍କାକୁ ପ୍ରଥମେ ନଷ୍ଟ କରିବାକୁ ପଡିବ । ଏହାବାଦ୍ ଜାନୁଆରୀ ପରେ ବଜାରକୁ ଛଡାଯାଇଥିବା ନୋଟକୁ କ୍ୱାରଣ୍ଟିନ କରାଯିବ । ଏଥିପାଇଁ ନୋଟକୁ ଅଲଟ୍ରାଭାୟଲେଟ କିରଣରେ ସଫା କରାଯିବ । ଏହି ନୋଟ ଗୁଡିକୁ ୧୪ ଦିନ ପର୍ଯ୍ୟନ୍ତ କ୍ୱାରଣ୍ଟିନ କରାଯିବା ପରେ ପୁଣିଥରେ ବଜାରକୁ ଛଡାଯିବ ।
ବଜାର ବିଶେଷଜ୍ଞଙ୍କ କହିବା ଅନୁଯାୟୀ ଚୀନ, ବୁହାନ ଓ ଦକ୍ଷିଣ ଅଞ୍ଚଳରେ ଥିବା ରାଜ୍ୟଗୁଡିକରେ ଯେଉଁ ୮୪,୩୨୧ କୋଟି ଟଙ୍କାର କାଗଜ ନୋଟ ଛାଡିଛି ତାହାକୁ ନଷ୍ଟ କରିପାରେ । ଏପରିକି ଏଥିପାଇଁ ପାଖରେ ଥିବା ପୁରୁଣା ନୋଟକୁ ବ୍ୟାଙ୍କରେ ଜମା କରିବାକୁ ଲୋକଙ୍କୁ ନିବେଦନ କରିଛି ସେଣ୍ଟ୍ରାଲ ବ୍ୟାଙ୍କ୍ । ଏସବୁ ଭିତରେ ଚୀନରେ କରୋନା ଭାଇରସକୁ ରୋକିବାକୁ ଭାରତ ମଧ୍ୟ ବଡ ପଦକ୍ଷେପ ଗ୍ରହଣ କରିଛି । ଆଗାମୀ ସପ୍ତାହରେ ଔଷଧ ଭର୍ତ୍ତି ଏକ ବିମାନ ଚୀନକୁ ପଠାଇବ ଭାରତ ଓ ସେଠାରୁ ଫେରିବା ବେଳେ ବୁହାନ ବିମାନବନ୍ଦରରେ ଥିବା ଭାରତୀୟ ନାଗରିକଙ୍କୁ ମଧ୍ୟ ସାଥୀରେ ଆଣିବ ।