ଆସନ୍ତାକାଲି ବିଜେପୁର ମୈଦାନରେ ମେଗା ସୋ’ ! ମୁଖ୍ୟମନ୍ତ୍ରୀ ବନାମ କେନ୍ଦ୍ରମନ୍ତ୍ରୀ । ଭୁବନେଶ୍ୱରରୁ ନବୀନ, ଦିଲ୍ଲୀରୁ ଆସିବେ ସ୍ମୃତି
କନକ ବ୍ୟୁରୋ :ଆସନ୍ତାକାଲି ପ୍ରଚାର ମୈଦାନକୁ ଓହ୍ଲାଉଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ବିଜେଡିର ସମ୍ମାନ ବାଜିରେ ଲାଗିଥିବା ବେଳେ ପ୍ରଥମ ଥର ପାଇଁ ନିର୍ବାଚନୀ କ୍ୟାମ୍ପେନରେ ଯାଇ ରାତ୍ରିଯାପନ କରିବେ ନବୀନ । ସେପଟେ କେନ୍ଦ୍ରମନ୍ତ୍ରୀ ସ୍ମୃତି ଇରାନୀ ମଧ୍ୟ ଆସନ୍ତାକାଲି ପ୍ରଚାର ଲଢେଇକୁ ଓହ୍ଲାଇବେ । ପ୍ରଚାର ମୈଦାନରେ ସାମ୍ନାସାମ୍ନି ହେବେ ମୁଖ୍ୟମନ୍ତ୍ରୀ ଏବଂ କେନ୍ଦ୍ରମନ୍ତ୍ରୀ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବରପାଲିରୁ କୁମ୍ଭାରୀ ଯାଏଁ ଏକ ମେଗା ରୋଡ୍ ସୋ କରୁଥିବା ବେଳେ କେନ୍ଦ୍ରମନ୍ତ୍ରୀ ସ୍ମୃତି ଇରାନୀ ବରପାଲିରେ ଏକ ନିର୍ବାଚନୀ ସଭାକୁ ସମ୍ବୋଧିତ କରିବେ । ଘନଘନ ନେତା ଓ ଅଭିନେତାଙ୍କ ପ୍ରଚାର ଭିତରେ ବିଜେପୁର ମୈଦାନରେ ମୁଖ୍ୟମନ୍ତ୍ରୀଙ୍କ ଗାଡ଼ି ଓହ୍ଲାଉଥିବା ବେଳେ ଦିଲ୍ଲୀରୁ ମୋଦିଙ୍କ ମନ୍ତ୍ରୀ ଧରି ଆସୁଛନ୍ତି ସ୍କୃତି ଇରାନୀ ।
Kanak News is now on WhatsApp
Join and get latest news updates delivered to you via WhatsApp
ଦୀର୍ଘ ୧୭ ବର୍ଷ ଧରି କ୍ଷମତାରେ ଥିବା ନବୀନ ସରକାର ପାଇଁ ବିଜେପୁର ସମ୍ମାନର ପ୍ରଶ୍ନ ବୋଲି କୁହାଯାଉଥିବା ବେଳେ ବିଜେପି ପଂଚାୟତ ନିର୍ବାଚନର ସଫଳତାକୁ ବଜାୟ ରଖିବା ଏକ ବଡ ଚ୍ୟାଲେଂଜ୍ । ଆଉ ଏହି ସମ୍ମାନରେ ଲଢ଼େଇରେ ପ୍ରଚାରର ମଙ୍ଗ ଧରୁଛନ୍ତି ମୁଖ୍ୟମନ୍ତ୍ରୀ । ଆଉ ମୁଖ୍ୟମନ୍ତ୍ରୀଙ୍କୁ ଟକ୍କର ଦେବା ପାଇଁ ବିଜେପି ମୈଦାନକୁ ଓହ୍ଲାଇଛି କେନ୍ଦ୍ରମନ୍ତ୍ରୀ ସ୍ମୃତି ଇରାନୀଙ୍କୁ ।
ମାଳ ମାଳ ନେତା ଓ ଅଭିନେତାଙ୍କ ପ୍ରଚାର ଭିତରେ ମଙ୍ଗଳବାର ବିଜେପୁରରେ ଗଡିବ ମୁଖ୍ୟମନ୍ତ୍ରୀଙ୍କ ପ୍ରଚାର ଗାଡ଼ି । ଦୀଘ ୪ ମାସ ଧରି ବିଜେଡି ନେତା ଓ କର୍ମୀ ପ୍ରସ୍ତୁତ କରିଥିବା କ୍ଷେତ୍ରରେ ଚୁଡ଼ାନ୍ତ ସ୍ପର୍ଶ ଦେବା ସହ ୬ କିଲୋମିଟର ଧରି ରୋଡ୍ ସୋ କରିବେ ନବୀନ । ଆଉ ମୁଖ୍ୟମନ୍ତ୍ରୀଙ୍କ ଏହି ରୋଡ୍ ସୋ’କୁ ଟକ୍କର ଦେବା ପାଇଁ ଦିଲ୍ଲୀରୁ ଆସୁଛନ୍ତି କେନ୍ଦ୍ରମନ୍ତ୍ରୀ ସ୍ମୃତି ଇରାନୀ । ଯିଏ ବରପାଲିରେ ଏକ ଜନସଭା ଜରିଆରେ ବଖାଣିବେ ମୋଦିଙ୍କ ମନ୍ତ୍ର । ଜଣେ ଲୋକପ୍ରିୟ ମୁଖ୍ୟମନ୍ତ୍ରୀ, ଯିଏ ୧୭ ବର୍ଷ ଧରି ଓଡ଼ିଶାର ଶାସନ ଗାଦିରେ ଅଛନ୍ତି । ଆଉ ଜଣେ ଛୋଟ ପରଦାର ଅଭିନେତ୍ରୀରୁ ମୋଦି କ୍ୟାବିନେଟର ଜଣେ ଦକ୍ଷ ମନ୍ତ୍ରୀ ।
ସାଧାରଣତଃ ଯାହା ଦେଖିବାକୁ ମିଳେନି, ତାହା ଦେଖିବାକୁ ଯାଉଛି ବିଜେପୁରରେ । ଉପ-ନିର୍ବାଚନ ପାଇଁ ମୁଖ୍ୟମନ୍ତ୍ରୀ ବରଗଡ଼ରେ ରାତ୍ରୀ ଯାପନ କରିବେ । ଆଉ ବୁଧବାର ଦିନ ବିଜେପୁର ଏବଂ ବରପାଲିରେ ପ୍ରଚାର କରିବେ ମୁଖ୍ୟମନ୍ତ୍ରୀ । ଯେଉଁ ଦିନ କେନ୍ଦ୍ରମନ୍ତ୍ରୀ ରାମ କ୍ରିପାଲ ଯାଦବଙ୍କ ସହ ପ୍ରଚାର ଲଢ଼େଇରେ ସାମ୍ନା ସାମ୍ନି ହେବ ।
ଆଉ ଏସବୁ ଭିତରେ ମୁଖ୍ୟମନ୍ତ୍ରୀଙ୍କ ବିଜେପୁର ଗସ୍ତ ପୂର୍ବରୁ ନିର୍ବାଚନ କମିଶନ ପାଖରେ ଫେରାଦ୍ ହୋଇଛି ଭାରତୀୟ ଜନତା ପାର୍ଟି । ବିଜେପି ଆଶଙ୍କା କରୁଛି- ମୁଖ୍ୟମନ୍ତ୍ରୀଙ୍କ ଗସ୍ତ ବେଳେ ଆଚରଣବିଧି ଉଲଂଘନ ହୋଇପାରେ । ସରକାରୀ ଖର୍ଚ୍ଚରେ ମୁଖ୍ୟମନ୍ତ୍ରୀ ହେଲିକପ୍ଟରରେ ନିର୍ବାଚନ ପ୍ରଚାର ପାଇଁ ଯାଉଥିବା ଅଭିଯୋଗ କରିଛି । ବିଜେଡି- ବିଜେପିର ଏହି ଛକାପଂଝା ଭିତରେ ଉପ-ନିର୍ବାଚନ ଜିତିବା ପାଇଁ ବିଜେପୁରରେ ଦେଖିବାକୁ ମିଳୁଛି ଏକ ବଡ ରାଜନୈତିକ ପ୍ରତିନ୍ଦ୍ୱନ୍ଦିତା । ଆଉ ଆସନ୍ତା ୨୮ ତାରିଖରେ ହିଁ ଜଣାପଡ଼ିବ ଏହି ପ୍ରତିଦ୍ୱନ୍ଦିତାର ଫଳ କ’ଣ ହେବାକୁ ଯାଉଛି ।