ଲୋକମାନ୍ୟ ଏକ୍ସପ୍ରେସ ଲାଇନଚ୍ୟୁତ ଘଟଣାର ହେବ ଉଚ୍ଚସ୍ତରୀୟ ତଦନ୍ତ । ଘଟଣାକୁ ଗୁରୁତ୍ୱର ସହ ନେଲେ ରେଳ ମନ୍ତ୍ରୀ, ଉଦ୍ଧାର କାର୍ଯ୍ୟ ପାଇଁ ସ୍ଥାନୀୟ ଲୋକଙ୍କୁ କୃତଜ୍ଞତା ଜଣାଇଲା ରେଳବାଇ ।
କନକ ବ୍ୟୁରୋ: କାହିଁକି ହେଲା ଲୋକମାନ୍ୟ ତିଲକ ଏକ୍ସପ୍ରେସ ଦୁର୍ଘଟଣା? ଏନେଇ ହେବ ଉଚ୍ଚସ୍ତରୀୟ ତଦନ୍ତ । ଆଉ ଏହାର ତଦନ୍ତ ନିର୍ଦ୍ଦେଶ ମଧ୍ୟ ଦିଆଯାଇଛି ବୋଲି କହିଛନ୍ତି ପୂର୍ବତଟ ରେଳବାଇ ମୁଖ୍ୟ ଜନସମ୍ପର୍କ ଅଧିକାରୀ ଜେ.ପି ମିଶ୍ର । ଏପରିକି ଏହା ସାମାନ୍ୟ ନୁହେଁ ବରଂ ବଡ ଧରଣର ଦୁର୍ଘଟଣା । ତେଣୁ କେଉଁ କାରଣ ପାଇଁ ଏ ଦୁର୍ଘଟଣା ହେଲା ଏହାର ପୁଙ୍ଖନୁପୁଙ୍ଖ ଯାଞ୍ଚ ନିର୍ଦ୍ଦେଶ ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଦୁର୍ଘଟଣା ସମୟରେ ଘନ କୁହୁଡ଼ି ଥିଲା କିନ୍ତୁ କେଉଁ କାରଣରୁ ଏଭଳି ଘଟଣା ଘଟିଲା ତାହାର ଚିତ୍ର ସ୍ପଷ୍ଟ ହୋଇନାହିଁ । ସୁରକ୍ଷା ସମ୍ବନ୍ଧୀୟ ସମସ୍ତ ପ୍ରକାର ତଦନ୍ତ କରାଯିବ । ପ୍ରଥମେ ଟ୍ରେନର ସ୍ପିଡୋ ମିଟରକୁ ଜବତ କରାଯିବ । କିନ୍ତୁ ପ୍ରଥମେ ଆମେ ଯାତ୍ରୀଙ୍କ ସୁରକ୍ଷାକୁ ପ୍ରାଥମିକତା ଦେଇଛୁ । ଗୁରୁତର ଆହତମାନଙ୍କୁ ଉପଯୁକ୍ତ ଚିକିତ୍ସା ଏବଂ ଆଂଶିକ ଆହତ ଯାତ୍ରୀଙ୍କୁ କିଭଳି ତାଙ୍କ ଗନ୍ତବ୍ୟସ୍ଥଳରେ ପହଁଚାଯାଉଛି ।
ଏଠାରେ ଉଲ୍ଲେଖ ଥାଉ କି, ମୁମ୍ବାଇ – ଭୁବନେଶ୍ୱର ଲୋକମାନ୍ୟ ତିଲକ ଟର୍ମିନସ୍ ଏକ୍ସପ୍ରେସ ଲାଇନଚ୍ୟୁତ । କଟକର ଶାଳଗାଁ ନିର୍ଗୁଣ୍ଡି ନିଟକରେ ଏକ୍ସପ୍ରେସ ଟ୍ରେନର ୮ଟି ବଗି ଲାଇନଚ୍ୟୁତ ହୋଇଛି । ମାଲବାହୀ ଟ୍ରେନକୁ ପଛରୁ ଧକ୍କା ଦେବା ଯୋଗୁଁ ଏଲଟିଟିଇ ଦୁର୍ଘଟଣାଗ୍ରସ୍ତ ହୋଇଥିବା ପୂର୍ବତଟ ରେଳବାଇ ପକ୍ଷରୁ ସୂଚନା ଦିଆଯାଇଛି । ଏଥିରେ ୩୦ଜଣ ଯାତ୍ରୀ ଆହତ ହୋଇଛନ୍ତି । ସେମାନଙ୍କ ମଧ୍ୟରୁ ୧୦ଜଣଙ୍କୁ ଏସସିବି ସ୍ଥାନାନ୍ତରିତ କରାଯାଇଛି । କଟକ ବଡ ମେଡିକାଲରେ ଭର୍ତି ହୋଇଥିବା ୧୦ଜଣଙ୍କ ମଧ୍ୟରେ ୫ଜଣ ପୁରୁଷ, ୩ଜଣ ମହିଳା ଓ ୨ଶିଶୁ ଅଛନ୍ତି ।
ସେପଟେ ହେଲ୍ପଲାଇନ ନମ୍ବର ଜାରି କରିଛି ରେଳ ବିଭାଗ । ୦୬୭୧-୧୦୭୨ ଓ ୦୬୭୪-୧୦୭୨ ନମ୍ବରରେ ଫୋନ କରି ଯାତ୍ରୀଙ୍କ ସମ୍ପର୍କରେ ସୂଚନା ପାଇପାରିବେ ସମ୍ପର୍କୀୟ । ଏହାସହ ୧୨୮୭୯ନମ୍ବର ମୁମ୍ବାଇ – ଭୁବନେଶ୍ୱର ଲୋକମାନ୍ୟ ତିଲକ ଟର୍ମିନସ୍ ଏକ୍ସପ୍ରେସ ଦୁର୍ଘଟଣା ଫଳରେ ୫ଟି ଟ୍ରେନର ଗତିପଥ ବଦଳାଯାଇଛି । କଟକ ଦେଇ ଆସୁଥିବା ଟ୍ରେନ ଗୁଡିକର ନରାଜ ଦେଇ ଯାତାୟତ କରୁଛି । ଭୁବନେଶ୍ୱର – ଏଲଟିଟି, ପୁରୀ – ରାଉରକେଲା ପାସେଂଜର ଟ୍ରେନ, ଦୁର୍ଗ – ପୁରୀ ଏକ୍ସପ୍ରେସ, ଧନବାଦ – ଭୁବନେଶ୍ୱର ରାଜ୍ୟରାଣୀ ଏକ୍ସପ୍ରେସ ଓ ତାଳଚେର ପୁରୀ ମେମୁ ଟ୍ରେନ ନରାଜର ଗତିପଥ ବଦଳା ଯାଇଛି ।